Bədəndə yığılan piylərdən qurtulmaq üçün liposaksiya əməliyyatı (müxtəlif nahiyələrdə olan piyin sovrulması) uzun illərdir tətbiq edilir. Azərbaycanda da bu estetik əməliyyata çox geniş yer verilir. Xüsusən gözəl görünmək istəyən xanımlar diet proqramları, idmanla piylərdən yaxa qurtara bilməyəndə bu əməliyyat üçün müraciət edirlər.
Son illər piylər, artıq çəki ilə vidalaşmaq üçün fərqli metodlar gündəmə gəlsə də, liposaksiya hələ də əvəzolunmazlığını saxlayır. Son bir ayda isə bu əməliyyatla bağlı qeydə alınan iki ölüm faktı liposaksiyanın çox risqli metod olması barədə təəssürat yaradıb. Qeyd olunan əməliyyat zamanı ölən və ya ağır dərəcəli xəsarət alanların sayı artır.
Bu il mayın 28-də isə Elmi-Tədqiqat Ağciyər Xəstəlikləri İnstitutunun əməkdaşı, ginekoloq Sona Gürgün Vəliyeva liposaksiya əməliyyatından sonra dünyasını dəyişib. Sona Gürgün Vəliyevanın yaxınları həkimin ölümündə plastik-estetik cərrah Sirus Qoçqanini və onun assistenti olan həyat yoldaşını günahkar sayırlar. Onlar iddia edirlər ki, Sirus Qoçqani əməliyyatdan əvvəl həkim həmkarını əməliyyatın tam təhlükəsiz olduğuna inandırıb.
İctimai vəkil Samir Zeynalov deyib ki, əməliyyatdan bir müddət öncə Sona Gürgün Vəliyeva Sirus Qoçqani ilə görüşüb, əməliyyatın təhlükəli olub-olmaması haqda söhbət aparıb. S.Zeynalov bildirib ki, Sona Gürgün Vəliyeva ölümü ilə müğənni Zemfira İbrahimovanın həyatını xilas edib: “Sona xanım əməliyyat masasında dünyasını dəyişəndən 1 gün sonra Qoçqani müğənni Zemfira İbrahimovanı eyni əməliyyata götürəcəkdi. Sona xanımın ölümündən sonra Z.İbrahimova bu istəyindən vaz keçib. Bizdə olan məlumata görə, Sirus Qoçqani plastik-estetik cərrah deyil, ixtisası diş texnikidir".
Qeyd edək ki, bu gün tibb müəssisələrində çalışan personalın öz işinin mütəxəssisi olmadığı dəfələrlə ictimaiyyətə açıqlanıb. Adi tibb bacısı, feldşer, diş texnikliyini oxuyan şəxs daha çox pul qazanmaq üçün Türkiyə və ya digər ölkələrdə 6 aylıq kurs keçməklə həkim olur və xəstələri müalicə etməklə məşğul olur. O cür həkimlərin müalicə və ya cərrahiyyə əməliyyatlarının nəticəsi təbii ki, bədbəxt hadisə ilə yekunlaşır. Elə Sona Gürgün Vəliyeva da öz işinin peşakarına deyil, əslində, diş texniki olan, lakin cərrah kimi fəaliyyət göstərən Sirus Qoçqaninin qurbanı oldu.
Maraqlıdır, ixtisasca diş texniki olan şəxs necə plastik cərrah kimi fəaliyyət göstərə bilər?
Rasif Bağırov: “Azərbaycanda ümumi cərrah və ya digər sahədə işləyən həkimlər var ki, özlərini plastik cərrah kimi təqdim edərək plastik əməliyyatlar keçirirlər”
Həkim-ekspert Rasif Bağırov “Bakı-Xəbər”ə açıqlamasında qeyd etdi ki, bu gün Türkiyə və digər ölkələrdən ölkəmizə çalışmaq üçün gələn həkimlər qeyri-ixtisas sahibləridirlər. Türkiyə, İran və digər qonşu ölkələrdən gələn həkimlər əsasən tibbin texniki sahəsində çalışıblar: “Bir-iki kursa gedib, oranın diplomunu alıb, ölkəmizə peşəkar həkim kimi gəlib əhaliyə xidmət göstərməyə başlayırlar. Media da həmin əcnəbi həkimlərin fəaliyyətini və ixtisasını tam araşdırmadan onları reklam etməyə başlayır. Beləliklə, canının hayında olan insanlar həmin reklama inanıb qeyri-peşəkar həkimlərin qurbanına çevrilirlər. Nəticədə isə xoşagəlməz hallar qeydə alınır. O cür həkimlərin qurbanı olan şəxslər, ən yaxşı halda, səhhətləri düzəlmək əvəzinə ağırlaşır, pis halda isə vəfat edirlər. Belə bir hadisə isə bir neçə ay öncə liposaksiya əməliyyatı zamanı qeydə alındı. Ginekoloq-həkim əməliyyat üçün tam müayinə olunmadan o cərrahiyyə masasına uzadıldı və nəticədə isə xanım vəfat etdi.
Hətta bir müddət öncə bir tanışım xaricdən gələn həkimə gözünü əməliyyat etdirdi. Əməliyyat uğursuz alındı və xəstə kor oldu. Bu hallarda heç bir həkim xəstənin səhhətində yaranan problemi həll etməyi üzərinə götürmür və nəticədə xəstənin vəziyyəti daha da ağırlaşır.
Onu da deyim ki, bəzən xaricdən gəlmiş yox, elə öz yerli həkimlərimiz arasında da ixtisasına uyğun olmayan sahədə çalışanlar olur. Azərbaycanda ümumi cərrah və ya digər sahədə işləyən həkimlər var ki, özlərini plastik cərrah kimi təqdim edərək, plastik əməliyyatlar keçirirlər. Nəticədə xəstələrin görünüşü daha pis vəziyyətə düşür. Dəfələrlə plastik cərrah olmayan həkimlər tərəfindən uğursuz əməliyyat olunan xəstələrlə rastlaşmışam. Amma bu hal xaricdən gələn həkimlər deyil, ixtisası başqa olan, özünü plastik cərrah kimi təqdim edən yerli həkimlər tərəfindən baş tutub”.
Həmsöhbətimiz onu da vurğuladı ki, tibbin texniki sahəsində işləyənlər cərrah kimi çalışan zaman xəstəyə həkim kimi deyil, texnik kimi yanaşırlar. Nəticədə isə ölüm halı qeydə alınır. Niyə belə oldu sualını verəndə isə həmin texniklər müəyyən bəhanələr gətirməyə başlayırlar: “Bu gün Azərbaycan səhiyyəsində ixtisasca texnik olub, lakin həkim kimi çalışan şəxslər yetərincədir. O cür şəxslər araşdırılmalı və onlarla bağlı sərt tədbir görülməlidir”.
Günel CƏLİLOVA
