Ali və orta məktəblərdə tədrisin əyani şəkildə bərpa edilməsi müsbət olsa da, koronavirusa yoluxma hallarının genişlənməsinə rəvac verən amilə çevirilib. Əvvəlcədən proqnozlaşdırıldığı kimi, tədrisin əyani bərpasından sonra yoluxma çoxalıb. Xüsusən də şagirdlər və tələbələr arasında yoluxanların sayı get-gedə artır.
Məlum olduğu kimi, yoluxmanın mövcud olduğu ali tədris ocaqlarından biri Azərbaycan Texniki Universitetidir ki, burada bir neçə tələbədə koronavirus aşkarlandığı bildirilir və onların təhsil aldığı qrup 14 gün müddətində distant təhsilə keçib.
Bakı Dövlət Universitetinin "SABAH qrupları"nda olan 2 qrupda da koronavirus aşkarlandığı üçün həmin qruplar distant təhsilə keçib. Azərbaycan Dövlət Neft və Sənaye Universitetində (ADNSU) 3 qrup distant təhsilə keçib.
Azərbaycan Dövlət Pedaqoji Universitetinin (ADPU) 14 qrupunda təhsil alan tələbələr arasında koronavirusa yoluxma faktı qeydə alındığı üçün həmin qruplar distant təhsilə keçib.
Amma başqa məlumatlara görə, yoluxma aşkarlanan ali məktəblərin bəziləri distant təhsilə keçsə də, bir çox universitetdə yoluxma halları aşkarlandığı halda həmin universitetdə təhsil alan tələbələrin qrupları distant təhsilə keçmir.
Bakı Mühəndislik Universitetində (BMU) təhsil alan tələbələrin 3 nəfərində koronavirus əlamətləri aşkarlanıb. Onların qrupları distant təhsilə keçməyib, yalnız həmin üç tələbə 14 gün müddətində distant təhsilə keçib.
Məlum olduğu kimi, Təhsil Nazirliyi yoluxma aşkarlandıqdan sonra qərar verməyi ali məktəblərin öz ixtiyarına verib. Yəni nazirlik heç bir ali məktəbə “yoluxma artıb distant təhsilə keç” göstərişi vermir, tədrisin formatını universitetlər özləri müəyyən edir. Hətta deyilənə görə, elə ali məktəblər var ki, yoluxma olsa da, distant təhsilə keçmir.
Sevinc İsgəndərova: “COVID-19 testi pozitiv çıxan tələbənin…”
Azərbaycan Texniki Universitetinin mətbuat katibi Sevinc İsgəndərova “Bakı-Xəbər”ə bildirdi ki, bu ali məktəbdə COVID-19 testi pozitiv çıxan tələbələrin təhsil aldığı qrup distant təhsilə keçib: “…Azərbaycan Texniki Universitetində (AzTU) ötən həftəsonu 3 tələbənin COVID-19 testi pozitiv çıxıb. Bu səbəbdən həmin tələbələrin təhsil aldığı qruplar ikihəftəlik onlayn tədrisə keçib. Universitetdə kütləvi yoluxma halı müşahidə edilmir. Həmin qripda təhsil alan digər tələbələrİn səhhətində heç bir problem yoxdur. Buna baxmayaraq, pandemiyanın qaydalarına və tələblırinə uyğun olaraq COVID-19 testi pozitiv çıxan tələbənin təhsil aldığı qrupda təhsil alanlar izolyaziya olunub. Auditoriyalar dezinfeksiya olunub və bu proses hər həftə davam edir.
Tədris ili başlayandan universitetin giriş hissəsində dezinfeksiya tuneli quraşdırılıb. Tələbələr universiteyə daxil olduqda sözügedən aparatdan keçir və dezinfeksiya olunur. Koronavirusa yoluxmuş tələbələrimizin vəziyyəti ilə mütəmadi maraqlanırıq. Hər biri özünü yaxşı hiss edir”.
Vüsalə Ağabəyli: “Universitetlərdə yoluxmanın qarşısını almaq mümkün olmasa, ehtimal ki, problemi qapanma ilə həll etməyə çalışacaqlar”
Filologiya üzrə fəlsəfə doktoru, dosent, ali təhsil üzrə mütəxəssis Vüsalə Ağabəyli bizimlə söhbətində təəssüflə bildirdi ki, son günlər ali və orta məktəblərdə yoluxma halları sürətlə artır. “Artıq bəzi siniflər və qruplar distant, daha doğrusu onlayn təhsilə keçib. Amma elə məktəblər var ki, yoluxma halı çox olduğu üçün iki həftəlik bağlanıb. Lakin bu məsələni universitetlərdə tənzimləmək çətindir, çünki məktəb kontingenti ilə müqayisədə universitet kontingenti daha çox sıxlıq təşkil edir. İstər auditoriyalarda tələbələrin yerləşməsində, istər koridorlarda, istərsə də bufetlərdə çox sıxlıq olur. Əslində, nəzərə alsaq ki, universitetlərdə təhsil alanların və təhsil verənlərin hamısı 18 yaşdan yuxarıdır, əksəriyyət vaksinin hər iki dozasını alıb. Belə baxanda, orta məktəblərlə müqayisədə yoluxma sayı az olmalı idi. 18 yaşdan aşağı yaş qrupları məktəblərdə üstünlük təşkil etdiyinə görə yoluxma burada çox olsa da, ali məktəblərdə az olmalı idi. Universitetlərdə yoluxma halları həddən artıq çoxdur. Belə başa düşürəm ki, yoluxmanın qarşısının alınması ilə bağlı tədbirlərin təşkil edilməsi sahəsində çətinliklər yaranıb. Sıxlıq çoxdur, nəzarəti gücləndirmək isə mümkün deyil. Tənəffüsdə bir dərsdən o biri dərsə keçid zamanı dəhlizlərdə yaranan sıxlıq istər-istəməz yoluxmaya səbəb olur. Müəllim tələsir, tələbə tələsir, qarşılıqlı təmas davam edir, məsafə saxlamaq heç cür mümkün olmur. Təhsil Nazirliyi orta məktəbləri və orta məktəblərdə gedən prosesləri izləyir”.
V.Ağabəyli qeyd etdi ki, yəqin ali məktəblərdə də yoluxmanın qarşısının alınması üçün proseslərə müdaxilə ediləcək. “Universitetlərdə yoluxmanın qarşısını almaq mümkün olmasa, ehtimal ki, problemi qapanma ilə həll etməyə çalışacaqlar”- deyə V.Ağabəyli bildirdi.
İradə SARIYEVA
