Minsk Qrupu həmsədrlərinin regiona indiki səfər cəhdlərinin pərdəarxası məqamları - 28 il iş görməyən qurum...

img

ATƏT-in Minsk Qrupu həmsədrlərinin nümayəndə heyəti rəhbərləri Qarabağla bağlı bəyanat veriblər. Bəyanatda həmsədrlər yenə regiona səfər etmək istədiklərini açıq, ermənilərə xidmət etmək istədikləini isə dolaysıyla ifadə ediblər.

ATƏT Xarici İşlər Nazirləri Şurasının 27-ci iclasının ilk gününün yekununa görə yayılmış bəyanatda Rusiya xarici işlər naziri Sergey Lavrov, Fransa Avropa və xarici işlər naziri Jan-İv Lö Drian, ABŞ dövlət katibinin müavini Steven Biqan Azərbaycan prezidentinin, Ermənistan baş nazirinin, Rusiya prezidentinin 9 noyabr 2020-ci il tarixli birgə bəyanatına uyğun olaraq Qarabağ münaqişəsi bölgəsində hərbi əməliyyatların başa çatmasını alqışlayıblar. Həmçinin, hərbi əsirlərin və həlak olanların meytlərini qarşılıqlı təhvil vermək barədə beynəlxalq humanitar hüququn müddəalarının yerinə yetirilməsinin vacibliyi də bəyanatda əks olunub:

"ATƏT-in Minsk Qrupunun həmsədr ölkələri Dağlıq Qarabağ münaqişəsi dövründə, o cümlədən son hərbi əməliyyatlar zamanı didərgin düşmüş insanların könüllü və təhlükəsiz şəkildə geri qayıtması üçün müvafiq şərait yaradılmasının zəruri olduğunu, Dağlıq Qarabağda və ətraf ərazilərdə tarixi, dini mirasın mühafizəsinin əhəmiyyətini də vurğulayıblar".

Bəyanat müəllifləri həmsədrlərin himayəsilə uzunmüddətli sülh razılaşmasına nail olmaq üçün Azərbaycan və Ermənistanı hazırkı atəşkəsdən yararlanmağa da çağırırlar: “Bu baxımdan həmsədr ölkələr ilk fürsətdə həmsədrləri regionda qəbul edərək, razılaşdırılmış cədvələ uyğun olaraq bütün həll olunmamış məsələlərə dair konkret danışıqlara başlamağa israrla çağırırlar”.

28 illik fəliyyətində heç bir uğura imza atmayan təsisat yenidən fəallaşmağa başlayıb. Ən maraqlısı isə budur ki, onlar həll olunmamış məsələlərlə bağlı konkret danışıqlara başlamağa çağırış edirlər. Hətta Qarabağa səfər etmək niyyətlərinin olduğunu belə gizlətməyən bu missiyanın əsl məqsədi nədən ibarətdir?

“Azərbaycanla Ermənistan arasında yeni müharibəyə səbəb olacaq təhlükəli addımlar atırlar”

 Qlobal və Regional Təhlükəsizlik Problemləri Mərkəzinin rəhbəri, politoloq Qabil Hüseynli hesab edir ki, dekabrın 1-də dövlət başçısı bu mövzu ilə bağlı müraciətlərini yekunlaşdırdı: “Prezident yekun nitqində Ermənistanla aparılan müharibə dövründə və ona qədər baş verən bəzi məsələlər barədə ümumiləşdirilmiş məlumatlar verdi. Bu məlumatlardan göründü ki, Qarabağ münaqişəsinin həlli yolunda nə qədər ciddi problemlər var imiş, işğal olunmuş torpaqlarımızın bir hissəsinin bizə qaytarılması üçün nə qədər süni manevrlər edilirmiş. Elə bu problemlərin əksəriyyətini bizə həm də Minsk Qrupunda təmsil olunan ölkələr törədirmiş. Fransanın təmsil olunduğu Minsk Qrupu sülhyaratma prosesi üçün məsul olan bir qurumdur. Onların indiyə kimi heç bir iş görə bilməməsi bir yana, üstəlik bölgədə qarşıdurma yaratmaq istəyi qəbuledilməzdir. Hətta Azərbaycanla Ermənistan arasında yeni müharibəyə səbəb olacaq təhlükəli addımlar atırlar. Bu nöqteyi-nəzərdən mən Fransanı artıq Minsk Qrupunun tərkibində görmürəm. Güman edirəm ki, Azərbaycan bununla bağlı ATƏT rəhbərliyinə, BMT-yə müraciət ünvanlayacaq”.

Politoloqun sözlərinə görə, Türkiyə və Rusiya bölgədə bütün məsələlərin həllini öz üzərlərinə götürməyə çalışır: “Minsk Qrupunu isə yalnız müəyyən prosedurlara yaxın buraxmaq istəyirlər. Amma sülh şərtləri, tərəflər arasında olan razılaşma kimi məsələlərin bu iki dövlət vasitəsilə həyata keçirilməsi nəzərdə tutulur. Ümumiyyətlə, bu bir reallıqdır ki, Azərbaycan Fransanın Minsk Qrupunda təmsil olunmasına ciddi surətdə etiraz edir və bundan sonra da edəcək. Fransaya nota verilməsi, Fransadakı səfirimizin geri çağırılması haqqındakı düşüncələr onu göstərir ki, Fransa bizim üçün bölgədə Ermənistanın özü qədər problemə çevrilib.

Rəsmi Paris neytrallıq, bitərəflik nümayiş etdirmək əvəzinə, açıq şəkildə qanuni ərazilərimizi işğalda saxlamış Ermənistanı müdafiə edir. Bu da azmış kimi, separatçı rejimi - qondarma “Dağlıq Qarabağ respublikasını” müdafiə edir, hətta tanımaq istəyir. Bu baxımdan da Minsk Qrupundan hansısa yeniliyi, töhfəni gözləməyə dəyməz”.

Politoloq bildirdi ki, Minsk Qrupu bu cür cəhdlərlə yalnız mövcudluğunu qorumağa çalışır.

Məhəmmədəli QƏRİBLİ

 

 

 

Son xəbərlər