Fransada satirik “Şarl Hebdo” jurnalı üz qabığında Məhəmməd Peyğəmbərin karikatüralarına görə hücuma məruz qaldığı zaman, Fransa başda olmaqla, bütün Avropa ölkələri ayağa qalxdı, həmrəylik göstərdi. Fransa mətbuatı isə yaşanmış olayı təkcə “Şarl Hebdo”ya qarşı işlənmiş bir cinayət kimi yox, Fransa xalqının mənəviyyatına və demokratik dəyərlərinə qarşı işlənmiş bir cinayət kimi dəyərləndirdi.
Təəssüf ki, bütün dünya liderləri “Şarl Hebdo”ya qarşı hadisəni söz azadlığına qəsd kimi qiymətləndirdiyi, buna görə Parisə gəlib əl-ələ verib küçələrdə həmrəylik nümayiş etdirdiyi halda, PKK-nın İstanbulda törətdiyi terrora susqunluq və biganəlik nümayiş etdirirlər.
Bu təzadlı yanaşmanı nə ilə izah etmək olar?
Azərbaycan Milli İstiqlal Partiyası Mərkəzi Şurasının sədri, politoloq Rəşad Bayramov “Bakı-Xəbər”ə açıqlamasında bildirdi ki, ABŞ-ın quru başsağlığından sonra Qərb ölkələri də Türkiyədə baş verən terrora laqeyd yanaşdıqlarını büruzə verdilər: “Təsadüfi deyil ki, Türkiyənin daxili işlər naziri Süleyman Soylu ABŞ-ı məhz verdiyi başsağlığına görə sərt tənqid etdi. Onun cavabından belə çıxdı ki, terroru ABŞ-ın dəstəklədiyi qüvvələr edib. Qərbin susqunluğunun səbəbi bəllidir. Çünki uzun illərdi ki, PKK, PYD, YPG və sonda FETÖ kimi terror təşkilatlarını maliyyələşdirən, onları silah-sürsatla təmin edən siyasi dairələr elə məhz Avropa və ABŞ-da olub. Buna görə də, İstanbuldakı terrora Fransada baş verən hadisə qədər reaksiya vermirlər. Türkiyə 40 ildir ki, terrorla mübarizə aparır. Bu illər ərzində heç bir Qərb ölkəsi Türkiyəyə dəstək ifadə etməyib. Əksinə, mane olublar, terrorçuları himayə ediblər. Biz Avropa ölkələrindən analoji yanaşmanı özümüzə qarşı da dəfələrlə görmüşük. Buna görə də, Türkiyə onların obyektivliyinə güvənməməlidir. Özünün və yaxın müttəfiqlərinin potensialına arxalanıb terrorla mücadiləsini davam etdirməlidir. Maraqlıdır ki, Avropanın hər hansı ölkəsində baş verən kiçik bir insidenti manşetlərə daşıyan Qərbin mediası da bu məsələdə susqun qalmağa üstünlük verir. Biz burada xristian təəssübkeşliyi, antimüsəlman ovqatı da görürük. Əslində isə sözdə bəşəri dəyərləri təbliğ edən həmin ölkələr, dünyanın hansı ölkəsində baş verməsindən asılı olmayaraq, bu hadisəni sərt şəkildə lənətləməliydilər. Məsələ hansısa müsəlman ölkəsinə gələndə biz həmin dairələrin susqunluğunu görürük. Hesab edirəm ki, Türkdilli Dövlətlər Təşkilatı bənzər hallar və ondan çıxış yolları ilə bağlı birgə fəaliyyət proqramı hazırlamalıdır. Bizim özümüz də uzun illərdi ki, erməni terroru ilə mübarizə aparırıq. Biz də görmüşük ki, terrora məruz qalanı deyil, onu törədəni dəstəkləyirlər. Biz onlardan dəstək gözləməkdənsə, qardaş ölkələrlə bir-birimizin gücünə güvənməliyik. Təəssüflər olsun ki, əksər Qərb ölkələri terror təşkilatlarını hansısa ölkəyə qarşı təzyiq vasitəsi kimi himayə edir”.
Xatırladaq ki, noyabrın 13-də İstanbulun Taksim meydanı yaxınlığındakı İstiqlal prospektində terror aktı törədilib. Hadisə nəticəsində altı nəfər ölüb, 81 nəfər yaralanıb.
Məhəmmədəli QƏRİBLİ
