İcra başçıları ağsaqqallara milli-mənəvi dəyərlərdən "dərs keçir"
Ölkədə fəaliyyət göstərən Ağsaqqallar Şurasının rayon təşkilatlarının iclasları ard-arda davam edir. Kütləvi informasiya vasitələri isə bu iclasları işıqlandırır, orada baş verən “önəmli” hadisələr barədə xəbərlər yayır. Həmin xəbərlərdə yalnız rayon icra başçılarının, ən yaxşi halda həm də başçının müavinlərinin çıxışları dərc edilir.
Yəqin ki, bu iclaslarda ümumiyyətlə ağsaqqallar deyil, yalnız rayon rəhbərliyi, yəni dövlətin idarəetmə elitasının nümayəndələri çıxış edir, ağşaqqallara müəyyən çərçivələr cıxır - onlara nə etməli olduqları barədə göstərişlər verirlər. İcra başçılarının, bələdiyyə sədrlərinin və digər rayon görəvlilərinin çıxışından belə anlaşılır. İcra başçısı ağsaqqallara göstəriş verəcəksə, belə Ağsaqqallar Şurasının fəaliyyətinə nə ehtiyac var idi?
Azərbaycan Ağsaqqallar Şurasının devizi ümummilli lider Heydər Əliyevin bir ifadəsidir: "Ağsaqqal milli-mənəvi dəyərlərimizin qızıl fondudur". Doğrudan da belədir, ahıl və ağsaqqal insanlar daha çox təcrübəyə və tarixi informasiyaya malikdir. Onların həyatı boyu gördüklərini müqayisə edib nəticə çıxarmaq imkanları var. Gənc nəsil üçün bu nəticənin böyük əhəmiyyəti var. Ağsaqqallar Şurasının yaradılmasının da mahiyyəti ondan ibarətdir ki, cəmiyyət onların fikir və məsləhətlərini dinləsin, bununla da onların təcrübəsindən bəhrələnsin.
Lakin Ağsaqqallar Şurasının rayon təşkilatlarının iclaslarından hazırlanmış informasiyalara baxanda görünür ki, məsələ tərsinədi. Rayon icra hakimiyyətlərinin başçıları ağşaqqallara yol göstərir, məsləhət verir, onlar isə etika xatirinə oturub deyilənləri dinləyir.
Əslində Ağsaqqallar Şurası ictimai təşkilat olduğuna görə onun iclaslarında və tədbirlərində icra hakimiyyətinin başçıları və nümayəndələri qonaq qismində iştirak etməli, danışmaqdan daha çox ağsaqqalları dinləməli, onlardan öyrənməlidirlər. Amma rayonlarda özlərini hər şeyin ağası kimi aparan icra başçıları Ağsaqqallar Şurasının rayon şöbələrinin iclaslarında masanın başında rəhbər şəxs qismində əyləşir, iclaslarda ilk söz ona verilir və hər kəs onun direktivlərini əsas sayir. İcra başçıları elə bilir ki, Ağsaqqallar Şurasının rayon şöbələrinin üzvləri onların tabeliyində olan işçilərdir, onlara yol göstərməlıdirlər, nəyi necə etməyi öyrətməlidirlər.
Hesab edirik ki, Azərbaycan Ağsaqqallar Şurasının rəhbərliyi bu biabırçı vəziyyəti dəyişmək istiqamətində addımlar atmalıdır. Ən azı dövlət başçısı səviyyəsində məsələ qaldırılmalı, rayon icra başçılarına tapşırılmalıdır ki, Ağsaqqallar Şurasının rayon şöbələrini öz inhisarçılıqlarından azad etsinlər. Ardınca isə bütün rayon şöbələri buraxılmalı və onların tərkibi yenidən seçilməlidir. Tərkibə həyatın müxtəlif sahələri üzrə təcrübəsi olan rayon sakinləri seçilməlidir.
Yəni təşkilatın fəaliyyəti elə qurulmalıdır ki, cəmiyyət və icra hakimiyyəti orqanlarının müxtəlif strukturlarında çalışan vətəndaşlarımız ağsaqqallardan nəsə öyrənsin. Yəni ağsaqqallar danışsın, icra başçısı, müavinləri, bələdiyyə sədri və üzvləri qulaq assın və örnək götürsun. Yoxsa Ağsaqqallar Şurasının rayon şöbələrinin iclasları Qurbanqulu Berdiməhəmmədovun ağşaqqallar şürasının iclasına bənzəyir. Berdiməhəmmədovun ağsaqqallar şurasının iclasında yalnız prezidentin, yəni özünün danışmaq səlahiyyəti var idi. Ağsaqqalların isə yalnız başı ilə razılıq bildirmək icazəsi var idi. Bilmirəm, vəziyyət dəyişib, yoxsa varisi Sərdar Berdiməhəmmədov də eyni üsulla ağsaqqallar şurasının iclasını idarə edir.
Doğrudan da çox acnacaqlı mənzərədir - 70-80 yaşlı kişilərin üzvü olduğu ictimai təşkilatın iclasında təşkilata heç bir dəxli olmayan, 40-60 yaşlı icra başçısı masanın başında rəhbər kimi əyləşir, ağsaqqallara milli-mənəvi dəyərlərdən dərs keçir, məsləhətlər verir, iclası acır və qapadır. Bu acınacaqlı duruma nə qədər tez son qoyulsa bir o qədər faydası var.
Dəniz NƏSİRLİ
