Daxili təlatümlər içində çabalayan, iqtisadi cəhətdən diz çökmüş Ermənistandakı hakimiyyət və ona yaxın qüvvələr indi də ortaya yeni ideya atıblar. Xüsusilə də Paşinyanın deputat fraksiyası olan “Mənim addımım” belə təşəbbüslə çıxış edir ki, guya ölkənin Təhlükəsizlik Şurasının fəaliyyəti hazırkı idarəetmə modelinə uyğun deyil. Müxtəlif bəhanələr gətirilərək qeyd edilir ki, belə olan təqdirdə həmin qurum Nazirlər Kabinetinin bir qolu kimi fəaliyyət göstərir.
Erməni KİV-i qeyd edir ki, yeni idarəetmə modeli onlar üçün xarakterik deyil. Hətta bildirilir ki, Paşinyan özünə elə səlahiyyətləri götürüb ki, bu, qətiyyən parlament idarəsinə uyğun gəlmir. Ən sonda bildirilir ki, vəziyyətdən çıxış yolu köhnə idarəetmə üsuluna qayıtmaqdır. Faktiki olaraq bu qənaətə gəlmək olar ki, Paşinyan prezident olmaq iddiasına düşüb. Təbii ki, burada onların iki məqsədi ola bilər. Birincisi, bu üsulla öz hakimiyyətlərini daha da möhkəmləndirmək istəyirlər. İkincisi isə bununla vaxt udub Qarabağla bağlı danışıqları uzatmağı düşünürlər. Paşinyanın prezidentlik sevdasına düşməsinin arxasında daha hansı niyyətlər dayana bilər?
- Elşən Həsənov: “Bununla o həm də danışıqlar prosesində bir müddətlik taym-aut götürə biləcəyini zənn edir”
Təhlükəsizlik məsələləri üzrə ekspert Elşən Həsənov “Bakı-Xəbər”ə bildirdi ki, Təhlükəsizlik Şurasının fəaliyyətinin iflic olması ilə bağlı irəli sürülən arqumentlər inandırıcı deyil: “Bunlar baş aldatmaq, gözdən pərdə asmaq üçün ortaya atılıb. Əvvəlcə gəlin Ermənistanın nə vaxt və niyə idarəetmənin modelini dəyişdiyini yada salaq. Serj Sarkisyan bunu heç də demokratiyaya aşiq olduğu səbəbindən etmədi. Ermənistan Konstitusiyası ona cəmi iki dəfə ard-arda prezident olmaq imkanını verirdi. Bu iki dönəmi də o seçilib işləmişdi. Ancaq hakimiyyəti də əldən vermək istəməyən Sarkisyan yeni modelə keçidi təklif etməklə, öz hakimiyyətinin ömrünü uzatmaq istədi. Prezidentliyi formal bir vəzifəyə çevirdi, bütün səlahiyyətlər baş nazirə keçdi. Özü də asanlıqla baş nazir olub, ölkənin idarə etmək istədi. Paşinyanın özü də hakimiyyətə məhz həmin dalğanın üstündə gəldi. Həssas məsələ olduğu üçün, xalqı öz ətrafına toplaya bildi və nəticədə inqilab baş verdi. Bir ildən artıqdır hakimiyyətdə olan Paşinyan nədənsə indi bu məsələdən danışmağa başlayıb. Paşinyan bütün göstəriciləri ilə avtoritar şəxsdir. Onun davranışlarında demokratlıqdan əsər-əlamət yoxdur. Bu səbəbdən o, mütləq hakimiyyət arzusundadır. İstəmir ki, balaca bir ölkədə, hətta səlahiyyətləri olmasa belə, başının üstündə prezident olsun. Eyni zamanda, istəyir ki, prezident idarəetmə üsulunu bərpa edib, daha da özünü möhkəmlətsin və sərt idarəetmə yürütsün. Biz artıq tez-tez bu təklifləri Ermənistan rəsmilərinin dilindən eşidirik.
Vaqe Qriqoryan Konstitusiya Məhkəməsinin rəhbəri təyin edilməsindən sonra ölkədə Konstitusiya islahatları keçirmək niyyətində olduğunu bəyan edib. Bu məlumatı ilk olaraq Paşinyanın ailəsinə məxsus olan qəzet yayıb.
Baş nazir Nikol Paşinyan əmindir ki, ciddi rəqabətin olmadığı şəraitdə onu asanlıqla prezident seçəcəklər. Bununla o həm də danışıqlar prosesində bir müddətlik taym-aut götürə biləcəyini zənn edir. Çünki bir müddət seçkiyə hazırlığa, sonra isə yeni prezidentin vəzifə səlahiyyətlərinin icrasına gedər. Bununla da Paşinyan bəhanə edib danışıqlar prosesini xeyli uzada bilər. Çünki hazırda ondan konkret addımlar tələb edirlər. O isə daxili rəydən qorxur. Bu səbəbdən də Qarabağla bağlı hansısa addımı ata bilmir. Prosesi yubatmaq məsələsində isə dalana dirənib. Biz bunu Paşinyanın hakimiyyətə gəlişi ilə bağlı prosesdə gördük. Düz bir ilə kimi onun legitimləşməsi gözlənildi. İndi də həmin məsələni təkrar etmək istəyirlər. Ancaq düşünmürəm ki, bu addım Paşinyan üçün məqbul olar. Çünki ölkədəki vəziyyət əvvəlki deyil. Onun nüfuzu çox aşağıdır. Verdiyi vədlərin heç birini yerinə yetirə bilməyib. Xalq artıq ona inanmır. İstənilən halda, biz Qarabağla bağlı danışıqlarda Ermənistanı tələsdirməliyik, onlara əlavə bəhanə üçün əsas verməməliyik”.
Məhəmmədəli QƏRİBLİ
.jpg)
.jpg)
