Qondarma "Arsaxın” oyuncaq prezidentinin "fərmanları" adi kağız parçasıdır...
Samvel Şahramanyanın verdiyi hər iki "fərman"in heç bir yerli və beynəlxalq hüquqi qüvvəsi yoxdur
Erməni icması indiyə qədər çoxlu yalanlar uydurub və bu yalanlara həm ozünü, həm də başqalarını inandıraraq, həmin uydurmaları dünya güclərinin dəstəyi ilə reallığa çevirə bilib.
Məsələn, 1828-ci ildə Rusiya ilə İran arasında bağlanan "Turkmənçay" sülh müqaviləsindən sonra kütləvi şəkildə Osmanlıdan və İrandan Qafqaza köçürülən ermənilər sonra dünya güclərinin dəstəyi ilə indiki Ermənistan dövlətini qurdular. Lakin sonradan uydurdular ki, guya minilliklərlə bu bölgədə yasayıblar, bura onların ata-baba yurdudur. Azərbaycandan qopardıqları hər bir qarış torpağı "qədim erməni torpaqlarının azad edilməsi" kimi qələmə verdilər. Artıq az qala bütün dünyanı inandırıblar ki, guya İrəvan qədim erməni şəhəridir. Əslində isə bu şəhər qədim İrəvan xanlığının mərkəzi olub. Bu o qədər yaxın tarixdir ki, tarixçı olmayan şəxslər belə bunu asanlıqla sübut edə bilir. Məsələn, nəinki müasir İrəvan şəhərində, hətta Ermənistanda yaşı 200 ildən çox olan salamat tarixi abidə mövcud deyil. Ona görə ki, Ermənistandakı bütün orijinal tarixi abidələr türklərə məxsusdur. Çünki Ermənistan dövləti 1918-ci ildə qədim Azərbaycan torpaqları üzərində yaradılıb. Son iki yüz ildə ermənilər bizim tarixi abidələrimizi dağitmaqla məşğuldur. İndi də ara-sıra həmin abidələrin qalıqlarını erməniləşdirməyə çalışırlar.
Bu işdə ermənilər tək deyil, onlara "demokratik dünya" - Avropa ölkələri və ABŞ yardım edir, dəstək verir.
İndi də həmin "demokratik dünya" artıq mövcud olmayan "Artsax" və ya "Dağlıq Qarabağ Respublikası" ətrafında erməni fantaziyalarına stimul verir.
Məsələn, özünü "Artsax" hüquqşünası kimi təqdim edən Roman Yeritsyan öz Facebook səhifəsində Şahramanyanın "Artsax"ın ləğv edilməsi üçün verdiyi müvafiq "fərman"ını şərh edərək yazıb ki, "Artsax"ın buraxılması haqqında "fərman" etibarsızdır, həm "Dağlıq Qarabağ Respublikası"nın "əsas qanunu"na, həm də digər hüquqi aktlara ziddir. Üstəlik, İrəvana köçdükdən sonra "Artsax prezidenti" Samvel Şahramanyan 2023-cü il sentyabrın 26-da "Artsax"ın buraxılması haqqında "fərman"ı qüvvədən salan "fərman" verdi.
Yeritsyan yazır ki, çoxları "Artsax prezidenti"nin "DQR"-in ləğvi haqqında "fərman"ının arxasında dayanan motivlərdən xəbərdardır. O, heç bir məmurun, o cümlədən dövlət başçısının bir fərmanla dövləti ləğv etmək səlahiyyətinin olmadığını xatırladıb. "Bununla belə, ictimaiyyətin müxtəlif dairələri "Artsax"ın ləğvi haqqında "fərman"ın hüquqi akt kimi qüvvəyə minməməsinə belə məhəl qoymayaraq, ictimaiyyətə açıqlanmadığı üçün bu məlumatı manipulyasiya etdilər. Onlar Samvel Şahramanyanı təkcə "Artsax"ı ləğv edən "prezident" adlandırdılar.", - Yeritsyan yazır.
Bu bədbəxt "hüquqşünas"dan soruşan yoxdur ki, "Artsax" və ya "DQR" adlı "dövlət"i kim tanımışdı? Hətta Ermənistan özü belə bu qurumu bir dövlət kimi rəsmən tanımayib. Ermənistan "Artsax"ı ona görə dövlət kimi tanımırdı ki, bu onun beynəlxalq nüfuzuna xələl gətirməsin. Yəni "Artsax" dünyada onu tanıyan dövlətin beynəlxalq imicinə zərbə vura bilən çirkin bir qondarma qurum idi. Bu qondarma qurumun yerləşdiyi məkan BMT və dünya dövlətləri tərəfindən Azərbaycan ərazisi kimi tanınırdı. Bu o deməkdir ki, Samvel Şahramanyanın nə 26 sentyabr 2023-cü ildə verdiyi, nə də sonradan onu quvvədən salmaq üçün verdiyi "fərman"ların heç bir hüquqi qüvvəsi yoxdur. Digər tərəfdən, separatçıların ən yaxın dəstəkçisi olan Ermənistan Respublikası da keçmişdə separatçıların zəbt etdiyi Dağlıq Qarabağ və ətraf rayonları Azərbaycan Respublikasının ərazisi kimi rəsmən tanıyıb. Ona görə də bundan sonra ermənilərin fərdi qaydada nələrisə uydurmasının heç bir hüquqi əsası və əhəmiyyəti yoxdur.
Akif NƏSİRLİ
