Dualarımız qəbul olunmadı, Adil Mirseyid...

Tarix: 18.07.2014 / 11:39
Bölmə: Mədəniyyət

El arasında əhya gecəsi bütün niyyətlərin, diləklərin hasil olması üçün edilən duaların qəbul edildiyi müqəddəs gecə kimi qəbul edilir. Deyirlər ki, əhya gecəsində Tanrı səbrlə bəndələrinin duasını dinləyir, sonra isə onu həyata keçirir. Bir də dan üzü, qaranlıqla işığın mübarizə apardığı o xoş çağda duaların ünvanına çatdığı haqda inanc var... Əhya gecəsində çox dualar etdik, Tanrıdan ölüm yatağında olan Adil Mirseyidin sağ qalmasını dilədik, ancaq niyyətimiz hasil olmadı. Sübhü Adil Mirseyidin ölüm xəbərilə açdıq...Təəssüf...
Mən bir devdim, bir devdim,
gözlərinə baxdım, dünyanı sevdim.
Rəsm çəkdim, şeir yazdım,
şərab içdim, yuxu yozdum,
qəhr oldum...
Dünən gecə hamımız (qələm əhlini nəzərdə tuturam) Tanrı dərgahına əl açıb yer üzünün saf bəndəsinə sağlıq dilədik...Dilədik ki, ömrünü sözə, rəsmlərə hopduran Mirseyidə şəfa versin. O qədər ümidsizə ümid verib ki, Tanrı...O bir dev idi, nəhəng idi, içi, daxili sevgiylə, yaxşılıqla dopdoluydu, aşıb-daşırdı. Haqq aşiqiydi Adil Mirseyid. Haqqa aşiq olanlar isə sözə, təsvirə aşiq olur. O, işıq idi başdan-başa. Adamın bircə kəlməsindən daxilini görürdü, kim olduğunu, hansı yola qulluq etdiyini hiss edirdi, duyurdu.
Adil Mirseyidi uzaq tələbəliyimin bitməsindən təxminən bir il sonra tanımışam. Dərbənddə yaşayan bir xanım haqda yazı yazmışdım, onu çap etdirmək istəyirdim. Tanınmış alim, professor Məhərrəm Qasımlı mənə məsləhət gördü ki, yazını "Palitra" qəzetinə aparıb orada Adil Mirseyidə verim, o çap edəcək. Getdim...Sözün düzü, Adil müəllimi tamam başqa cür təsəvvür edirdim, amma qarşıma tamam başqa bir adam çıxdı...Sadə, üzündə işıqlı təbəssüm olan bir adam. Mən onu xeyirsevər bir dərvişə bənzətdim, bu duru adamı başqa kimə bənzədə bilərdim ki...Yazını götürdü, baxdı, sonra üzümə baxıb dedi ki, sən şeirlərini də gətir çap edim...Duruxdum. Təəccübləndim ki, o mənim şeir yazdığımı hardan bilir? Günlərin birində şeirlərimi apardım və o çap etdi...Sevincim yerə-göyə sığmırdı, zarafat deyildi, Adil Mirseyid mənim kimi bir arxasız-dayaqsız kəndçi qızının şeirlərin, bəyənmişdi...
Şəhərdə, əsasən də "Sahil" metrosu ətrafında, "Sahil" parkında Adil Mirseyidi tez-tez görürdüm. Qayğılı, fikirli dolaşırdı, deyəsən işsiz günləri idi. Çox fikirli olardı, çantası çiynində parkda var-gəl edirdi. Elə bil kiminləsə, nə iləsə haqq-hesab çürüdürdü. Bəlkə də Tanrısı ilə danışırdı, ondan taleyinin niyə belə yazıldığının, yuxularının tərs yozulduğunun səbəbini soruşurdu.
Adil müəllimlə bir dəfə də həmsöhbət olmuşuq. Tanınmış şair, publisist Hüseyn Əfəndi haqda yazı hazırlayırdım. Təsadüf nəticəsində Azərbaycan Yazıçılar Birliyinin foyesində Adil müəllimlə qarşılaşdıq. Sevindim, dedim ki, Adil müəllim, sizinlə Hüseyn Əfəndi haqda danışmaq istəyirəm. Gülümsəyib razılıq verdi. Hüseyn Əfəndi barədə böyük yanğı ilə danışdı və yazını çox qəribə bir fikirlə tamamladı: "Federiko Fellininin bir sözü var. Deyir ki, şəhərə çıxıram-tanış üzlər azalıb, deyəsən ölüm yaxınlaşıb"...O, "ölümün yaxınlaşdığını" müjdə verəndə hələ onun ömrünün sonuna bir neçə il qalırdı. Demək o öz ölümünə doğru getməyə hazırlaşırmış. Əlbəttə, öz ölüm gününü düşünməyən adam nadan adamdır, ancaq onun kimi adamlar aqil olduqları üçün qara günlərini daha tez duyurlar.
"Güzgüdəki adam"ın gözüylə boylandı qara günlərə, elə ölümü tərəfə də güzgüdən baxdı, orda əcəlini əli qoynunda intizarda gördü...Dedi, əziz ölüm, səni çox gözlətmərəm, gələcəm, çıxar əlini qoynundan...
Adam öz adını unudur bəzən,
Bir saat güzgüyə baxıb görür ki
Gözləri qan çəkib güzgüdəki adamın.
Güzgüdəki adam, çıx güzgüdən,
Çıxmasan güzgünü sındıraram mən.
Amma inanma sözümə,
Gücüm çatmaz bu güzgüyə,
Gücüm çatsa da, əl qaldırmaram,
Güzgüdəki adam, bağışla məni,
Çap etdirə bilmədim sənin şeirlərini.
Satmadım satılmadım,
Bir də, satmaq üçünmü, söylə, öz-özünə oxunan dualar?
Əhya gecəsində çox yerdə adamlar öz-özünə, içində dualar etdi, Adil Mirseyid, Sizə...Amma dualar keçmədi fələyin dəmir hasarından, çatmadı Tanrıya. Çatsaydı, bəlkə Allah bağışlayardı şairi...
Saralmış qızılı yarpaqlar kimi
Boyanıb həyatım payız rənginə,
Ömrümün sonuncu aşırımında
Payız alıb məni xoş ahənginə.
Payızdan yazıb yayın cırhacırında dünyadan vədəsiz köç etdi bu dünyanın sonuncu halal adamlarından biri...
Adil Mirseyidin ölüm xəbəri sözə könül verən hər kəsi yandırdı.
Tanınmış yazıçı-tərcüməçi Kənan Hacı da Adil Mirseyidin ölümünə sarsılıb. Demə ki, Adil Mirseyid can verən məqamlarda Kənan bəy Allaha dua edə-edə onun haqqında yazı yazırmış... "1937.az"-da yer alan "Bu yazını yazanda Adil can verirmiş" yazısı içimi titrətdi...Bu misralar da həmin yazıdandır:
Daha təsəllinin bir önəmi yox,
İçimdə ayrılıq sızıntısı var.
Açıldı yaralar, ölürəm, ox,ox,
Durna olmaq istəyirəm bu bahar.
Adil Mirseyid durnaya dönüb göylərə uçdu, göy üzündə buludların dostu oldu daha. Çünki yer üzündə onu dərdin əlindən qoparmağa heç bir dostun gücü çatmadı. Yaxşı baxın göy üzünə, qəm içində olan dostlar, bu gün artıq sıranızda yeri boş qalan bu saf insanı yəqin bir gün orda görərsiniz. Görəndə təəccüblənməyin, şairlərin ruhu quşa çevrilə bilir axı...

DİGƏR XƏBƏRLƏR

Tarix: 19.06.2026 / 16:05

Türkiyənin ən gözəl turizm kəndlərinın adı açıqlandı - FOTO

Tarix: 18.06.2026 / 13:51

Birinci Türkoloji Qurultayın 100 illiyinə həsr olunmuş “Türk Dünyası Həftəsi” keçiriləcək

Tarix: 18.06.2026 / 12:55

Bir memar tanıyıram...

Tarix: 18.06.2026 / 12:49

Aspendosda nadir tarixi olay - Roma “çay tanrısı” kəşf edilib

Tarix: 17.06.2026 / 20:14

Professor Asif Rüstəmlinin yeni kitabı çap olunub

Tarix: 17.06.2026 / 17:31

Flora Kərimova Mehriban Əliyevaya təşəkkür etdi

Tarix: 17.06.2026 / 16:46

“Köhnə çamadanlar” Adana tamaşaçısı ilə görüşdü

Tarix: 17.06.2026 / 14:12

Erməni toyları sürətlə “azərbaycanlılaşır”... Baxın necə...

Tarix: 17.06.2026 / 08:22

Rəşid Əzimovun xatirəsinə “Əbədi İşıq” sərgisi keçirildi

Tarix: 17.06.2026 / 07:08

Roma bazilikasında İtaliya Baş nazirinin surəti görənləri şoka saldı

Tarix: 16.06.2026 / 20:47

Parisdə Azərbaycan–UNESCO əməkdaşlığının perspektivləri müzakirə edilib

Tarix: 16.06.2026 / 19:52

Yoldaşlarını mühasirədən xilas edərək özü şəhid oldu -Namazov Orxan Ceyhun oğlu...

VİDEO

Tarix: 27.11.2025 / 11:10

Biri ermənini öpür, biri sovet bayrağı qaldırır... Günümüzə baxın! - VİDEO

Tarix: 12.11.2025 / 11:05

Lavrov işdən kənarlaşdırılır, yoxsa oyun qurulur? - VİDEO

Tarix: 21.06.2025 / 08:15

Dünyada xaos böyüyür, Azərbaycana təhlükə də artır... - VİDEO

Tarix: 18.06.2026 / 17:57

Müəllimlərin geyim forması ilə bağlı yeni standartlar bəzən yanlış başa düşülür...

Tarix: 18.06.2026 / 15:31

"Trampla İranın gizli razılaşdıqları başqa bir mətn var" - İddia...

Tarix: 18.06.2026 / 11:35

Tramp dünyanı yenə heyrətləndirdi...

Prezidentin aqrar müşavirəsi liberal iqtisadiyyat yolunda yeni mərhələ açır...