Şair Kamandar Eyvazlı-54

Tarix: 12.06.2014 / 11:43
Bölmə: Mədəniyyət

Sözü yaradan Tanrıdır, ancaq onu yazıya çevirib dünya ilə bir edən şairdir, yazıçıdır, qələm adamıdır. Şairin həyatda ən böyük var-dövləti, qazancı şeirləri və onları oxuyub ibrət götürən oxucularıdır.
Şair-jurnalist Kamandar Eyvazlı sözünün sahibi olan şairlərdəndir. Özünü yazan və daxilindən keçənləri ifadə edən şairin şeirləri həmişə maraq doğurur. Hər şairin sözü özünə oxşayır. Elə Kamandar Eyvazlının da sözünü özünə tən görmüşük həmişə. Bu gün istedadlı şair, təəssübkeş vətəndaş, kəsərli publisist Kamandar Eyvazlının doğum günüdür. 54 yaşının tamam olması münasibətilə şairi təbrik edir, ona can sağlığı, yeni şeirlər yazmasını arzulayırıq.
Onu da deyək ki, son zamanlar Kamandar Eyvazlının səhhətində ciddi problemlər yaranmışdı. Artıq ağrı-acı şairi tərk edib, şair də ki, öz can hücrəsinə çəkilib yeni şeirlər yaradır. O şeirlərdən də bir neçəsini "Bakı-Xəbər"ə təqdim edib Kamandar Eyvazlı.

Gələrmi
Dedilər xəstəsən, nədən xəstəyəm,
Onu söyləməyə dilim gələrmi?
Gedir, əldən gedir bədən, xəstəyəm,
Bu sözü yazmağa əlim gələrmi?
Kasıblıq sarıdan dərdim olmadı,
Qoçağım, igidim, mərdim olmadı.
Evim tikilmədi, yurdum olmadı,
Boş qalan yerimə gülüm gələrmi?
Yaşadım, dolandım, adıma layiq,
İş gördüm dostuma, yadıma layiq.
Dad gəzdim ağzımın dadına layiq,
Bir daha o ayım, ilim gələrmi?
Dönüb kəndimizə uzaqdan bir də,
İçəydim dupduru bulaqdan bir də.
Dərədən, təpədən, o dağdan bir də
Şimşəyim çaxarmı, selim gələrmi?
Sarsıldım doğrumu, düzü biləndə,
Üşüdüm alnımdan təri siləndə.
Günahım nə idi? Görən gələndə
Bir sona bu qədər zülm gələrmi?
Belimdə şələm var, çiynimdə yüküm,
Onları nə qədər aparım, çəkim?
Desələr daşı da şumlayım, əkim,
Göylərdən külüngüm, bilim gələrmi?
Üz tutub Tanrıdan pay istəyirəm,
Köməyə çatmağa hay istəyirəm.
Öləndə dünyanı titrədən vay istəyirəm,
Məni ağlamağa elim gələrmi?
Yalannan sevməyib doğrular məni,
Kamandar deyəsən çağrırlar məni.
Başqa cür incidir ağrılar məni,
Allah, bu yaşda da ölüm gələrmi?

Eyni ağlayır
Titrəyir əlləri dodaqlarında,
Göz yaşı iz açır yanaqlarında.
Solur təravəti yanaqların da,
Qızların hamısı eyni ağlayır.
Durulur su kimi, sudan içəndə,
Açılır gül kimi, güldən seçəndə.
Bəzənib-düzənib gəlin köçəndə
Qızların hamısı eyni ağlayır.
Ürək isindirib, könül vermişəm,
Bağ salıb, bar tutub, meyvə dərmişəm.
Mən də eşitmişəm, mən də görmüşəm,
Qızların hamısı eyni ağlayır.
Ağlayır ürəkdən, bəsimi olmur,
Yanında bir doğma kəsimi olmur.
Görəsən ayrıca səsimi olmur,
Qızların hamısı eyni ağlayır.
Ayırıb seçənin fərqini bilmir,
Nə cürün, necənin fərqini bilmir.
Gündüzün-gecənin fərqini bilmir,
Qızların hamısı eyni ağlayır.
Həsrətdən qövr edib könlü dolanda,
Qəlbində bir arzu, istək solanda,
Atadan-anadan yetim olanda,
Qızların hamısı eyni ağlayır.
Sözündə amandı, kəlməsində ah,
Dünyada bir dəfə etdimi günah?
Elə ki, ağlayır, inanın vallah,
Qızların hamısı eyni ağlayır.

Ötən günlər sorağında
Qarşımda şəkil var, sənə oxşayır,
Başımda duman var, çənə oxşayır.
Saçına ağ düşüb, dənə oxşayır,
Tanıya bilmirəm həmin gözləri-
Mən necə qaytarım ötən günləri?
Yadına düşürmü, biz görüşərdik?
Verib bir-birinə söz, görüşərdik,
Vaxtına-vədinə düz, görüşərdik,
Bölüb saatları-dəqiqələri-
Mən necə qaytarım ötən günləri?
Səni qısqanardım deyib-güləndə,
Dərsə mənsiz gedib, mənsiz gələndə.
Sən sağa baxanda, sola dönəndə
Cırıb dağıdardım kitab-dəftəri-
Mən necə qaytarım ötən günləri?
Biri elm öyrənib, dərs oxuyardı,
Biri dostlarıyla birgə olardı.
Mənim bir adətim, bir işim vardı-
Gəzərdim arxanca bütün şəhəri,
Mən necə qaytarım ötən günləri?
Budur həmin guşə, həminki təhər,
Səni gözləmişəm burda hər səhər.
Mindiyin avtobus gələnə qədər
Sayardım yığdığım son qəpikləri-
Mən necə qaytarım ötən günləri?

Dağların dərmanı
Günlərim aylara, illərə döndü,
Çəmənim saralmış güllərə döndü.
Göz yaşım sellənib sellərə döndü,
Dağların dərmanı hardadı, Allah?
Kəlbəcər, Zəngilan, Laçın, Xocalı,
Bu dərdim hər dərddən, qəmdən ucalı.
Fikrim dolaşıqdı, yolum haçalı,
Dağların dərmanı hardadı, Allah?
Məcnun dağlarındı, Leyli dağların,
Ən zərif, ən kövrək layla dağların.
Yüz dəfə harayla, hayla, dağların,
Dağların dərmanı hardadı, Allah?
Ovu barəsində vurulmur daha,
Çeşməsi qaynayıb durulmur daha.
Məclisi düzəlib qurulmur daha,
Dağların dərmanı hardadı, Allah?
Yerini bilsəydim, mən gətirərdim!
Tapıb dimdiyində dən gətirərdim.
Yağış gətirərdim, çən gətirərdim,
Dağların dərmanı hardadı, Allah?
Yarpızı dərilmir, otu yığılmır,
Sürüsü mələmir, südü sağılmır.
Yarası göz-gözdü hələ sağalmır,
Dağların dərmanı hardadı, Allah?
Obası elindən ayrı düşübdü,
Ocağı külündən ayrı düşübdü.
Zirvəsi selindən ayrı düşübdü,
Dağların dərmanı hardadı, Allah?
Bu kəndin o kəndə yolu olubmu?
Bu çayın sərhədi, qolu olubmu?
Burda şimşək çaxır, dolu olubmu?
Dağların dərmanı hardadı, Allah?
Hər tərəf qaranlıq, zülmət içində,
Durub, düşünürəm dəhşət içində.
Dağların özüdü dövlət içində,
Dağların dərmanı hardadı, Allah?
Kamandar qəlbində ayrılıq bəslər,
Bu qismət mənimdi, onu kim istər?
Mən tapa bilmirəm, sən mənə göstər,
Dağların dərmanı hardadı, Allah?

DİGƏR XƏBƏRLƏR

Tarix: 10.10.2026 / 17:17

Mollanəsrəddin lətifələrində memarlıq cizgiləri...

Tarix: 10.10.2026 / 11:07

Yazıçılar Birliyi üzvlük haqqını ödəməyənlərə növbəti dəfə xəbərdarlıq etdi - məsuliyyətli davransınlar...

Tarix: 08.10.2026 / 17:49

Susqun fırçanın ölməz fəryadı: Bəhruz Kəngərlinin rəngli irsi...

Tarix: 08.10.2026 / 17:03

Noyabrın 1-dək üzvlük haqqını ödəməyənlər Yazıçılar Birliyindən xaric edəcək - XƏBƏRDARLIQ...

Tarix: 07.10.2026 / 16:58

HAMAM SANDIĞININ İZİ İLƏ: SƏDİDƏN ŞƏKİYƏ, POEZİYADAN MADDİ MƏDƏNİYYƏTƏ

Tarix: 07.10.2026 / 07:03

Ustad aşıq Hüseyn Saraçlının 110 illik yubileyinə həsr olunan beynəlxalq elmi konfrans keçiriləcək

Tarix: 06.10.2026 / 22:01

Nizaminin qəzəli, Xətainin türkcə şeirləri hələ də Ermənistanda əsir saxlanılır...

Tarix: 06.10.2026 / 14:14

Beynəlxalq memarlıq arenasında Azərbaycan memarlığının yeri və rolu: Tarixi irslik və müasir parametrlər...

Tarix: 05.10.2026 / 21:34

Afina ilə Londonun “incəsənət davası” Azərbaycanın da sərvətlərini yada saldı...

Tarix: 03.10.2026 / 15:15

Faiq Ələkbərlinin Türk fəlsəfəsinə həsr olunmuş əsərinə dair düşüncələrim

Tarix: 30.09.2026 / 22:20

Dağlıq ərazilərdə unudulmuş və dağılmış Alban məbədlərinin bərpası gündəmdə...

Tarix: 29.09.2026 / 11:02

Şair-publisist Dəyanət Osmanlının yeni nəşrləri oxuculara təqdim edilib

VİDEO

Tarix: 27.11.2025 / 11:10

Biri ermənini öpür, biri sovet bayrağı qaldırır... Günümüzə baxın! - VİDEO

Tarix: 12.11.2025 / 11:05

Lavrov işdən kənarlaşdırılır, yoxsa oyun qurulur? - VİDEO

Tarix: 21.06.2025 / 08:15

Dünyada xaos böyüyür, Azərbaycana təhlükə də artır... - VİDEO

Tarix: 08.10.2026 / 18:55

Erməni təcavüzündən hələlik 32 kütləvi məzarlıq qalıb - Xarici dipkorpusun mövqeyi...

Tarix: 08.10.2026 / 18:27

Prezident Əliyevin məntiqi - “Belə nankor qonşusu olanlar daim öz hərbi gücünü artırmalıdır...”

Tarix: 08.10.2026 / 15:19

1000-5000 pensiya alanların artımı nə qədər olacaq?..

Dövlətçilik tarixinə siyasi-ideoloji baxış, milli-mədəni mühitin mühafizəsi...