Elə bilməyin ki, unudulmusunuz, qətiyyən və qətiyyən sizi unutmamışıq. Ürəyində Vətən sevdası, başında Vətən havası olanlar unudularmı heç? Saz- qılınc qardaşlığından, savaş-barış amalından yoğrulanlardansınız, qanını qələminə mürəkkəb edənlərdənsiniz, Rəşid müəllim! İgidlər oylağı, şairlər məskəni, ozanlar mahalı Borçalıdan, ağır elli Faxralıdansınız.
Bir qılıncdı bu Borçalı deyilən,
Bu qılıncın tiyəsidi Faxralı!
Söz meydanı bu obaya ad olub,
Keçmişini öyəsidi Faxralı.
İndilikdə – havam-suyum, ölərsəm,
Sümüyümün yiyəsidi Faxralı!..
Bəli, halal süd əmmişlərin sümüyünün yiyəsi doğulduğu torpaq, el-ulus olur. Ulusuna, yurduna bağlı olan oğulların ana südü ilə sümüklərinə hopan hallalıq eldən aldığınız halallıqdır.
Səngər dağının döşündə binələnən, aranlı-yaylaqlı güzəran keçirən bir eldə doğulan adamın ruhu da, qəlbi də ayna kimi təmiz olur.
“Bu kənd Faxralı” şeirində doğma kəndinizi elə oxşamısınız, onu elə biçimdə tanımayanlara tanıtmısınız ki, adam heyran qalır. Heyranlıq və heyrətin nişanəsidir bu şeir.
Uca dağdır, göy yaylaqdı,
Sıx meşədir, gur bulaqdı.
Odu sönməz bir ocaqdı,
Sehr dolu gözdür bu kənd.
Sığınıb söz çırağına,
Gəlməyib dost qınağına.
Tarixin çox sınağına,
Kişi kimi dözdü bu kənd.
Nifrəti gurdu bilənə,
Ocağı pirdi bilənə.
Hər sözünü zər bilənə,
Özü boyda sözdü bu kənd.
Qələmin qüdrətindən, ürəyin təpərindən, ürəyin sevgisindən doğan şeiriniz oxuyanın gözünə də nur verir, qləbinə fərah çiləyir.
Bəlkə də Rəşid Faxralı imzasının təqdimata heç ehtiyacı yoxdur, çünki biz bu imzanı yaxından izləmişik. Ancaq 70 illik yublieyiniz olduğu üçün sizin ömür yolunuzdan söz açmaq istərdim. 70 yaş elə-belə yaş deyil, kifayət qədər böyük yaşdır və mənalı bir ömrün dastandır.
Şair, jurnalist, ehtiyatda olan mayor, Qarabağ müharibəsi iştirakçısı, Azərbaycan Yazıçılar Birliyinin, Azərbaycan Jurnalistlər Birliyinin, “Gürcüstan Yazıçılar Akademiyası”nın üzvü, 45 kitabı nəşr edilən, Tbilisidə gürcü dilində şeirlər kitabı işıq üzü görən Əməkdar jurnalist Rəşid Faxralı (Hüseynov Rəşid Məmməd oğlu) 1954-cü il yanvar ayının 21-də Gürcüstan Respublikası Bolnisi rayonunun Faxralı kəndində anadan olub. 1960-cı ildə Bolnisi rayonu Faxralı orta məktəbinə daxil olub. 1970-ci ildə həmin məktəbi bitirib. 1970-ci ildə Azərbaycan Dövlət Pedoqoji İnstitutunun (indiki Pedoqoji Universitetin) riyaziyyat fakültəsinə daxil olub, oranı 1975-ci ildə bitirib. 1975-ci ildən 1982-ci ilə kimi Bolnisi rayonu Faxralı orta məktəbində riyaziyyat müəllimi işləyib. 1982-ci ildən 1989-cu ilə kimi rayon icraiyyə komitəsində, “Qələbə bayrağı” rayon qəzetində (müxbir, redaktor müavini - Azərbaycan bölməsinin redaktoru) vəzifələrində işləyib. 1990-cı ildən Bakı şəhərində yaşayan R.Faxralı 1990-cı ildən 1992-ci ilə kimi “Ədalət” qəzetində müxbir, məsul katibin müavini vəzifələrində işləyib. Müdafiə Nazirliyinin orqanı olan “Xalq Ordusu” (indiki “Azərbaycan Ordusu”) qəzetində məsul katib vəzifəsində çalışıb. Həmin ildən Azərbaycan Ordusu sıralarında hərbi xidmətdə olub. Tərbiyəvi işlər idarəsinin zabiti, Kadrlar İdarəsinin zabiti, “Hərbi Bilik” jurnalının redaktoru, Hərbi tele-studiyanın müxbiri, Hərbi Nəşriyyatın bölmə rəisi vəzifələrində xidmət edib. 2005-ci ildə səhhəti ilə əlaqədar tərxis olunub. II qrup əlildir, istefada olan mayordur.
Rəşid müəllim ikinci ali təhsilini Bakı Dövlət Universitetinin jurnalistika fakültəsində alıb və 1992-ci ildə məzun olub.
2006-cı ildən 2016-cı ilə kimi Heydər Əliyev adına Azərbaycan Ali Hərbi Məktəbində (indiki Hərbi İnstitut) işləyib. 2016-cı ildən indiyə kimi “Azərbaycan Ordusu” qəzetinin müxbiri vəzifəsində çalışır.
Prezident İlham Əliyevin sərəncamı ilə “Əməkdar jurnalist” fəxri adına layiq görülüb. “Qızıl kəlmə”, “Altun media”, “Həsən Bəy Zərdabi”, “Rəsul Rza”, “Mikayıl Müşfiq” ədəbi mükafatları laureatıdır, bir neçə ədəbi müsabiqənin qalibidir.
Rəşid müəllim, sizin həyatınıza, yaradıcılığınıza, fəaliyyətinizə nəzər salanda aydın görsənir ki, siz 70 illik həyatınızın çox böyük bir hissəsini sözə, ədəbiyyata, jurnalistikaya həsr etmisiniz. Eyni zamanda hərbi jurnalist kimi müzəffər ordumuzun şücaətindən, igid əsgər və zabitlərimizin rəşadətindən, ordumuzun gücündən, qüdrətindən yüzlərlə yazılar yazmısınız, oçerklər, esselər, şeirlər, ədəbi-bədii yazılar qələmə almısınız. Həm Birinci, həm də İkinci Qarabağ Müharibəsində əlinizdə qələm, ürəyinizdə sevgi dayanmadan fəaliyyət göstərmisiz, neçə-neçə igid əsgərimizə, zabitimizə dastanlar yazmısınız, döyüşən ordumuzu ruhlandıran qələm nümunələri ərsəyə gətirmisiniz. Təbii, bir yazıda sizing fəaliyyətinizə ayna tutmaq çətindir, mən müəyyən məqamlara toxundum.
Bir məsələni də unutmamış deyim ki, siz gözəl ailə başçısı, sədaqətli ömür yoldaşı, balalarına, nəvələrinə hədsiz sevgi və qayğı bəsləyən bir atasınız, babasınız. Üstəlik də gözəl qonşu, dəyərli eloğlusunuz. Dostluğunuz da ki, bir örnəkdir, həm Borçalıdakı, həm də istənilən yerdəki dostlarınıza sədaqətiniz də bizə bəllidir. Atam Murad Kövrəklə də sıx dostluğunuz var, zarafatınız da ki, öz yerində. Uşaqlıqdan bilirəm ki, atamın Rəşid Faxralı kimi bir dostu var, sədaqətli, dəyanətli…
Sizinlə “Borçalı”İctimai Birliyinin İdarə Heyətində təmsil olunuruq. Bu da ayrıca bir məqamdır ki, siz Gürcüstan və Azərbaycan əlaqələrinin, dostluğunun daha da möhkəmlənməsinə, soydaşlarımızın həyatına öz töhfənizi verirsiniz.
Bir insan kimi də, bir yaradıcı şəxs olaraq da faydalısınız və yeni nəslə örnək bir həyat yolunuz var. Faxralıdan başlayan həyat yolunuz Bakıda davam edir və siz Bakıda da bir Faxralı adamısınız, Borçalı insanısınız, Qarapapaq kişisisiniz. Böyük Səməd Vurğun “deyiən söz yadigardır” deyirdi, doğrudan da elədir. Həmişə yazın, yaradın, ömrünüz də həyatın təbədüllatlarından üzü ağ çıxaraq sizi yüz yaşatsın.
70 illik yubileyiniz mübarək!
İradə SARIYEVA
