Fatimə Hacıbəyli: “Bunun bir adı var - görməmişlik”
Yeni tədris ilinin ilk günündə valideynlərdən birinin ali məktəbə daxil olan qızına hədiyyə etdiyi avtomobili universitetin qarşısında nümayiş etdirməsi sosial şəbəkələrdə böyük müzakirələrə səbəb olub.
Belə ki, qızına aldığı avtomobilin dövlət nömrə nişanının yerinə “TƏLƏBƏ QIZIM” sözünü yazdıran valideyn üzü şarlarla bəzədilən avtomaşını düz Bakı Dövlət Universitetinin qapısında saxlayıb.
Ictimai xadimlər məlum olayı “görməmişlik” kimi qiymətləndirib.
“O ata qızına maşın alıb, nömrə yerinə də “Tələbə qızım” yazdırıb, onu da universitetin qarşısında nümayiş etdirməsi əslində o atanın yaxşı ata olmadığını göstərir”
“Vəfa” Sosial İctimai Problemlərə Dəstək İctimai Birliyinin sədri Fatimə Hacıbəyli “Bakı-Xəbər”ə açıqlamasında qeyd etdi ki, ali məktəbə daxil olan tələbəyə valideynin hədiyyə etməsi adi haldır. Ancaq həmin hədiyyənin ictimaiyyət qarşısında təqdim edilməsi, nümayiş olunması etik baxımdan düzgün deyil: “Belə çıxır ki, imkanı olan hər bir şəxs övladına aldığı hədiyyənin hər kəsin gözü önündə nümayiş etdirməlidir. Bunun bir adı var “görməmişlik”. Insan övladına avtomobil alar. Ancaq bunu hər kəsin gözü önündə etməməlidir. Imkanı olanda var, olmayanı da”.
Birlik sədrinin sözlərinə görə, bu il ali məktəbə sənəd verənlər arasından 57 min nəfəri tələbə adını qazanıb. Tələbə adı qazananların təxminən 48 faizi qızlardır: “Onu da nəzərə almaq lazımdır ki, əksəriyyəti bölgələrdən paytaxta gələnlərdir. Bunların evi olmayanı, yataqxanada qalanı, kirayə ev tutanı var. Avtomobili universitetə aparan ata bunları düşünməli idi. Universitetin qarşısında 19-22 minlik tələbə kontingenti olan universitetin qarşısında bunu etmək nəyə lazımdır?! Bunu etməklə o ata nəyə nail oldu? Heç nə. Sadəcə hər kəs o ailənin hansı dəyərə sahib olduğunu, ailədə, nəsildə ilk ali təhsilli şəxsin məhz qızı olduğunu düşünür. Bununlada o ailəyə olan hörmət azalacaq”.
F.Hacıbəyli onu da vurğuladı ki, bu gün göstəriş üçün yaşayanların sayı artıb: “Kim hara getdi, nə yedi, nə aldı, nə geyindi, kiminlə görüşdü hamısını çəkib sosial şəbəkədə paylaşır. Bir neçə gün əvvəl o ata qızına maşın alıb, nömrə yerinə də “Tələbə qızım” yazdırıb, onu da universitetin qarşısında nümayiş etdirməsi əslində o atanın yaxşı ata olmadığını göstərir. Yaxşı ata, valideyn, insan universitetdə oxuyan digər tələbələri də nəzərə almalı idi. Çünki təhsil ocağında valideynini itirmiş tələbələrdə oxuyur. Əslində o ata bəlkə heç qızının təhsili, problem ilə bir dəfə də olsun maraqlanmayıb.
Yəqin o ata bir neçə ildən sonra qızı universiteti bitirən də və ya harasa işə düzələndə eyni göstərişi edər”.
F.Hacıbəyli son olaraq bildirdi ki, günümüzdə nə qədər ehtiyacı olanlar var, elə bütün xalqa qələbə sevinci yaşatmış şəhid, qazi ailələri. Köməklik məhz bu insanlara edilməlidir.
Günel CƏLİLOVA
