Son vaxtlar Dövlət İmtahan Mərkəzinin (DİM) keçiridiyi buraxılış və blok imtahanlarından narazılıq edənlərin sayı artır. Abituriyent, valideyn və müəllimlər, əsasən, açıq sualların düzgün yoxlanılmaması, yoxlamanın bəzən qeyri-ixtisas müəllimlərinə tapşırılması, qiymətləndirmənin obyektiv aparılmamasından şikayətlənirlər.
Iddia olunur ki, müəllimlərə hər abituriyentin cavablarını yoxlamaq üçün cüzi məbləğ ayrılır, onlar da qazanc əldə etmək üçün keyfiyyətə deyil, kəmiyyətə üstünlük verirlər. Bu hal da abituriyentlərin aşağı bal almasına səbəb olur.
“Dövlət İmtahan Mərkəzinin öz proqramı var və imtahan sualları şagirdlərin bilik-bacarıqlarını qiymətləndirməyə yönəlmir”
Mövzu ilə bağlı fikir bildirən təhsil eksperti Elşən Qafarov “Bakı-Xəbər”ə açıqlamasında qeyd etdi ki, Dövlət İmtahan Mərkəzinin (DİM) bugünkü imtahan mexanizmi Azərbaycan gəncini öz istədiyi ixtisas üzrə təhsil alıb dövlətə və cəmiyyətə fayda vermək imkanından məhrum edir: "Bu çox ciddi məsələdir. Bu gün insanların çoxu işlədiyi peşəyə çox da bağlı deyil. Bu problemləri rahatlıqla aradan qaldırmaq olar. Belə ki, qrup imtahanları ixtisaslar üzrə keçirilməlidir. Dövlət İmtahan Mərkəzi ölkənin imtahan və müsabiqələrini həyata keçirən publik hüquqi şəxsdir. Bu qurum 31 illik təcrübəyə malikdir. Amma reallıq budur ki, bu 31 il ərzində cəmiyyət və dövlət inkişaf etdikcə, DİM-in imtahan mexanizmində də dəyişiklik edilməli idi. Lakin təəssüflər olsun ki, biz dəyişikliyi görmədik. Yaxşı olar ki, DİM-dən test hazırlamaq səlahiyyəti alınsın. Dövlət İmtahan Mərkəzinin özünün proqramı, dərs vəsaitlərinin olması, eləcə də imtahanları bu şəkildə keçirməsi ölkədə repetitorluğun günü-gündən daha da genişlənməsinə səbəb olur. İmtahan sualları orta məktəb proqramına əsasən tərtib olunmalıdır. İmtahanlar da abituriyentlərin real bilik və bacarıqlarının qiymətləndirilməsi fonunda aparılmalıdır. Dövlət İmtahan Mərkəzinin isə öz proqramı var və imtahan sualları şagirdlərin bilik-bacarıqlarını qiymətləndirməyə yönəlmir. Çünki DİM sualları həmin vəsaitlərə əsasən hazırlayır. Qəbul imtahanlarında dərsliklərdəki proqramlardan istifadə olunmadıqca göstəricilər aşağı olacaq”.
Günel CƏLİLOVA
