BNA ictimai nəqliyyatın rəvan işini təşkil edə bilsə, 1 manatlıq taksilər əl-ayağa dolaşmaz...

“Bakıda qanunsuz sərnişindaşıma vasitələrinin mövcudluğu və onların yaratdığı mənzərə leqal sərnişindaşımalara ciddi maneə törədir”. Bunu xüsusi avtobus zolaqları ilə bağlı mətbuat konfransında Bakı Nəqliyyat Agentliyinin (BNA) mətbuat katibi Mais Ağayev deyib.

M.Ağayev qeyd edib ki, sərnişinlərin “1 manatlıq” taksilərdən istifadəsi yollarda xaotik vəziyyət yaradır: “20 Yanvar” və “Koroğlu” metrostansiyaları istiqamətində hər gün axşam və səhər saatlarında xaotik vəziyyət müşahidə olunur. Bəzi hallarda qanunsuz sərnişindaşıma vasitələri dayanacaqların ətrafında elə bir süni tıxac yaradır ki, avtobusların o məntəqələrə giriş-çıxışında çətinlik olur. Nəticədə sərnişinlər həmin “1 manatlıq” taksilərdən istifadə edirlər”.

Belə aydın olur ki, BNA “1 manatlıq” taksiləri ləğv etmək istəyir və şəhərdə yaranan tıxacın səbəbi kimi manatlıq taksiləri görür. Ancaq paytaxt ərazisində ictimai nəqliyyat normal vəziyyətdə olsa və xəttə çıxan avtobusların sayı az olmasa idi sərnişinlər taksidən deyil, ictimai nəqliyyatdan istifadə etməyə üstünlük verərdi.

Ekspertlər bildirir ki, BNA paytaxt ərazisində nəqliyyatın hərəkətini rəvan təmin etmədiyi üçün “1 manatlıq” taksiləri günahkar kimi görür. Ictimai nəqliyyat bərbad vəziyyətdə olduğu üçün əhali manatlıq taksilərə üstünlük verir.

Mütəxəssislər təklif edir ki, BNA nəqliyyatın hərəkətini normal səviyyəyə çatdırarsa, o zaman manatlıq taksilərə ehtiyac qalmayacaq. Adıçəkilən qurum  öz işini lazımi şəkildə icra etmədiyi üçün bu gün “1 manatlıq” taksilərə tələbat yüksəkdir. 

Bakı Nəqliyyat Agentliyinin mətbuat katibi Mais Ağayev açıqlamasına sözardı olaraq bildirir ki, əsasən axşam saatlarında “Koroğlu” metrostansiyası qarşısından Bakı kəndlərinə gedən istiqamətlərdə yaranan biabırçılıq ürəkaçan deyil. Ancaq reallıq isə başqadır. Belə ki, “Koroğlu” metrostansiysı istiqamətindən Bakı kəndlərinə hərəkət edən marşrut avtobusları arasında interval 15-20 dəqiqədir. Koroğlu Nəqliyyat Mübadilə Mərkəzindən çıxan istənilən avtobusun metronun sərnişinlərlə dolu olan hissəsinə (Piramidanın qarşısına) gəlməsi təxminən 25-30 dəqiqə çəkir. Metro qatarları isə 3-4 dəqiqədən bir "Koroglu" stansiyasında sərnişin düşürür. Hər 3-4 dəqiqədən bir "Koroglu" stansiyasından azı 100-200 nəfər sərnişin çıxır. Bu isə, avtobusların intervalına görə, 30 dəqiqə ərzində 1000-1200 sərnişin edir. Maraqlıdır, 20-30 dəqiqədən bir 100 nəfərdən də az sərnişin daşıya bilən avtobuslar bu qədər sərnişini mənzil başına apara bilərmi? Qətiyyən mümkün deyil. Belə olan halda bu qədər sərnişin "1 manatlıq taksi"lərə üz tutur. Etiraf etmək lazımdır ki, bu gün sərnişindaşımanın üzünü ağ edən qanunsuz sərnişindaşıma ilə məşğul olan "1 manatlıq" taksilərdir. “1 manatlıq” taksilərin ictimai nəqliyyatda rolu böyükdür. Bunu heç kim inkar edə bilməz. Çünki avtobuslar çatışmayanda, metro işləməyəndə, digər nəqliyyat növləri yoxdursa, ümid qalır “1 manatlıq” taksilərə.

Ekspertlər bildirir ki, BNA paytaxt ərazisində müşahidə edilən nəqliyyat xaosu, tıxacın səbəbi kimi “1 manatlıq” taksiləri görür. Maraqlıdır, qeyd edilən problemlərin əsl səbəbi BNA-nın ictimai nəqliyyatın rəvan hərəkətini təmin edə bilməməsi ilə bağlıdır, yoxsa manatlıq taksilərlə? BNA nəqliyyatın hərəkətini normal təşkil edərsə “1 manatlıq” taksilər bu qədər geniş yayılardımı?

• "Bakı Nəqliyyat Agentliyinin yarıtmaz fəaliyyəti nəticəsində Bakıda avtobus parkı, yenilənmək əvəzinə, inkişafdan qalıb

Nəqliyyat eksperti Elməddin Muradlı bildirdi ki, manatlıq taksilər onlara tələbat olduğu üçün formalaşıb: "Bakı Nəqliyyat Agentliyinin yarıtmaz fəaliyyəti nəticəsində Bakıda avtobus parkı yenilənmək əvəzinə, inkişafdan qalıb. Sərnişin tələbatı artsa da, avtobuslar bu tələbatı ödəmir, bu səbəbdən sərnişinlər taksilərə üz tutur. Hətta bəzən 90-cı illərə qayıdırıq, marşrut xətlərinə qanunsuz sərnişin daşıyan kiçiktutumlu avtobuslar və mikroavtobuslar da daxil olur. Bunların qarşısının alınması üçün normal ictimai nəqliyyat təqdim etmək lazımdır. Danışdıqca özlərini biabır edirlər. Çıxış yolu kimi avtobus zolaqları çəkməyi təklif edirlər. Əlbəttə, avtobus zolaqları olmalıdır, ictimai nəqliyyat dəqiq işləməlidir. Amma köklü yenilik etmək lazımdır ki, insanlar faydalansın".

Ekspert hesab edir ki, ictimai nəqliyyatın vəziyyəti yaxşı deyil: "Yarım saatdan bir avtobus gəlir. Zolaq da çəkiləndə hərəkət iflic olur. Yanaşma düzgün deyil”.

Günel CƏLİLOVA