Azər Həsrət: “Azərbaycanla Macarıstan arasındakı oxşarlıqlar xüsusi qeyd olunmaqla, əslində diqqət ona yönəldilir ki...”
“Azərbaycanla Macarıstan arasında bir çox oxşarlıqlar var. Birincisi, bizim tarixi köklərimiz. Bilirəm ki, macar xalqı öz tarixi köklərinə çox bağlıdır. Ölkələrimizin əhalisinin sayının təxminən eyni olması, ölkə ərazisinin sahəsi də demək olar bir-birinə çox yaxındır...” Bu fikirləri Prezident İlham Əliyev Macarıstanın Baş naziri Viktor Orbanla mətbuata bəyanatında səsləndirib.
Macarıstanda səfəri zamanı çıxışında Baş nazir Orban haqqında müsbət fikirlər bildirən
Prezident Əliyev Avropa İttifaqına daxil olan ölkənin öz milli maraqlarını qətiyyətlə qorumasını əsl qəhrəmanlıq adlandırıb.
Həqiqətən də Macatıstanın Baş naziri Aİ məkanında öz maraqlarını müdafiə edən, kənar qüvvələrin macar cəmiyyətinə dağıdıcı təsir cəhdlərini qətiyyətlə neytrallaşdırmağı bacaran liderdir.
Bu gün Macarıstanda milli dəyərlərin, ailə dəyərlərinin qorunması, neqativ təsirlərin qarşısının allnması V.Orbanın siyasəti sayəsində mümkündür.
V.Orbanın prinsipiallığı, mövqeyindən geri çəkilməməsi, Aİ daxilində öz müstəqil siyasətini həyata keçirməsi faktdır.
“Bütün bunlar bizim yaxın olmağımızın əsas faktorlarıdır”
Siyasi şərhçi Azər Həsrət “Bakı-Xəbər”ə bildirdi ki, Prezident Əliyev Macarıstanla bağlı fikirlərini vurğulayarkən həm bizim ortaq köklərimiz, həm də Macarıstanın öz siyasətini Azərbaycan kimi müstəqil aparmasının üzərində təsadüfi dayanmır: “Çünki Aİ-nin üzvü olaraq, üstəlik də qonşuluqda müharibə müşahidə edən dövlət kimi Macarıstan elə də asan şəraitdə yerləşmir. Bilirsiz ki, Aİ Rusiyanın Ukraynaya təcavüzünə görə müxtəlif məsələlərdə sərt, radikal addımlar atır və addımlarda Macarıstanın da iştirak etməsi üçün çalışırlar. Amma Macarıstanın özünün milli dövlət maraqları var və həmin maraqlar heç də həmişə üzvü olduğu Aİ ölkələrinin maraqları ilə üst-üstə düşmür. Ona görə də Macarıstan müstəqil mövqedən çıxış edir. Digər bir tərəfdən, Azərbaycanla Macarıstan arasındakı oxşarlıqlar xüsusi qeyd olunmaqla, əslində diqqət ona yönəldilir ki, biz Türk Dövlətləri Təşkilatında da təsdüfən bir yerdə deyilik”.
A.Həsrətin sözlərinə görə, Macarıstan müşahidəçi üzv olsa da Türk Dövlətləri Təşkilatının ən fəal üzvlərindən biridir. “Müqayisə aparsaq, hətta deyərdim ki, məsələn, bütünlüklə türk dövləti olan, yəni Macarıstan qədər türklükdən uzaq olmayan Türkmənistan belə o qədər fəal deyil. Halbuki, Türkmənistan bu təşkilata müşahidəçi deyil, tam hüquqlu üzv olmalıdır. Macarıstan isə, Aİ üzvü olmasına və məsafəcə çox uzaqda yerləşməsinə, müşahidəçi üzv olmasına baxmayaraq, daha fəal bir dövlət kimi Türk Dövlətləri Təşkilatlarında iştirak edir. Əlbəttə ki, bütün bunlar bizim yaxın olmağımızın əsas faktorlarıdır. Amma bütün bunlarla bərabər eyni zamanda xatırlatmaq istərdim, azərbaycanlı zabit Ramil Səfərovun ermənilərin şərinə uğrayaraq həbs edilməsi də bizim yadımızdan çıxmayıb. Macarıstanda onun məhkəməsi keçirilmişdi və uzun müddətli həbs edilmişdi, Azərbaycan dövləti məhz Macarıstanın anlayışı, düzgün dəyərləndirməsi sayəsində Ramil Səfərovu ordan azad etdi, bura gətirdi burada da o əfv edildi. Onun sonrakı həyatının heç bir problemi yoxdur. Yəni Macarıstan bu məsələdə də bizim yanımızda oldu.
Türk Dövlətləri Təşkilatının qeyri-rəsmi zirvəsində iştirak etmək üçün Macarıstana gedən Prezident İlham Əliyev yalnız bu tədbirdə iştirak etməyib, həm də burda Macarıstanın Baş naziri ilə ikitərəfli dar çərçivədə, geniş tərkibdə görüşlər keçirildi, müzakirələr aparıldı. Macarıstanın özəlliklə də Azərbaycanın enerji sektorunda iştirakı xüsusi vurğulandı. Yəni düşünürəm ki, biz hələ Macarıstanla çox işlər görəcəyik, üstəlik də Avropanın mərkəzində bir türk dövləti olması bizim üçün ayrıca üstünlükdür” - deyə A.Həsrət qeyd etdi.
İradə SARIYEVA
