Firdovsi Şahbazov: “Bu sahəyə xarici sərmayənin də cəlbi vacibdir”
“Orta Dəhlizin Azərbaycan seqmentinin infrastrukturu təkmilləşdirilmişdir”. Bu barədə Prezident İlham Əliyev Çinin CGTN telekanalına müsahibəsində bildirib.
Ölkə başçısının fikrincə, bu, biznes imkanlarını təmin edir: “Çünki Azərbaycanın Orta Dəhlizlə bağlı mövqeyi, sadəcə tranzit ölkəsi olmaq və tranzitdən ödənişlər almaqdan ibarət deyil. Bizim hədəfimiz özəl sektora bundan faydalanmağa kömək etmək üçün dəhlizin keçdiyi Azərbaycan ərazisində müəssisələr yaratmaqdır. Artıq qeyd etdiyimiz kimi, biz strateji tərəfdaşıq, lakin eyni zamanda, Orta Dəhlizin Azərbaycan seqmentinin infrastrukturu təkmilləşdirilmişdir. Hazırda biz görürük ki, bu təkmilləşdirilmiş infrastruktur gələcək 3-5 il üçün kifayət etməyəcək”.
Bütün bunlar onu göstərir ki, yeni təkminlləşdirmələrə ehtiyac var. O baxımdan indi qarşıda dayanan məsələ Orta Dəhlizin Azərbaycan seqmentinin infrastrukturlarını daha da təkmilləşdirməkdən ibarətdir. Bəs daha da təkmilləşdirmələr etmək üçün nələr edilməlidir? Orta Dəhlizin Azərbaycan seqmentində yaxın illərdə nə kimi ciddi dəyişikliklər gözlənilir?
“Yaxın illərdə ölkə üzərindən daşımalar böyük olacaq və ola bilsin ki, yeni dəniz limanı tikilsin”
Sözügedən məsələyə aydınlıq gətirən iqtisad üzrə fəlsəfə doktoru Firdovsi Şahbazov “Bakı-Xəbər”ə açıqlamasında bununla bağlı bir sıra məqamlara toxundu: “Əvvəla, Azərbaycan qədim “İpək yolu” layihəsinin tərkib hissəsi olmaqla, Çinin 2013-cü ildə elan etdiyi müasir “Bir kəmər, bir yol” təşəbbüsünün reallaşmasına öz resursları hesabına töhfə verir. Bu baxımdan Bakı Beynəlxalq Dəniz Ticarəti Limanı və Bakı-Tbilisi-Qars dəmiryolu bu istiqamətdə vacib seqmentlərdir. Belə ki, Azərbaycan maliyyəsi hesabına Bakı-Tbilisi-Qars dəmir yolunun yükötürmə qabiliyyəti 1 milyon tondan 5 milyon tona qaldırıldı. O cümlədən, Bakı-Böyük Kəsik dəmir yolunun təkmilləşdirilməsi ilə bağlı işlərin böyük hissəsi görülüb. Həmçinin, Prezident İlham Əliyevin təsdiq etdiyi Azərbaycan ərazisindən keçən beynəlxalq dəhlizlərlə bağlı Fəaliyyət Planına əsasən, 2024-2026-cı illərdə Ələt-Osmanlı-Astara dəmir yolunun yenidən qurulması planlaşdırılıb. Artıq bu istiqamətdə işlər sürətləndirilib. Eyni zamanda, bununla bağlı 2026-cı ildə Biləcəri stansiyasının çeşidləmə parkında 3-cü dəstənin dartı yollarının və yoldəyişdiricilərin əsaslı təmiri nəzərdə tutulub. Digər tərəfdən Bakı Beynəlxalq Dəniz Ticarəti Limanının yükaşırma qabiliyyətinin 15 milyon tondandan, 25 milyon tona çatdırılması ilə bağlı işlər görülür. Bütün bunlarda məqsəd Azərbaycanın tranzit qabiliyyətini artırmaqdır. Çindən başlayan və Avropaya qədər uzanan layihənin mahiyyəti ondan ibarətdir ki, Çindən ixrac edilən mallar zamana qənaət və əlverişli tranzit rüsumları ilə Avropaya çatsın. Əlbəttə ki, bu, həm Çin-Avropa ticarət əlaqələrində sabit tranzit ölkə kimi Azərbaycanın rolunun artmasına xidmət edir, həm də bu, beynəlxalq əməkdaşlıq yolunda geniş imkanlar açır. Ancaq bu sahəyə xarici sərmayənin də cəlbi vacibdir. Çünki yaxın illərdə ölkə üzərindən daşımalar böyük olacaq və ola bilsin ki, yeni dəniz limanı tikilsin”.
Vidadi ORDAHALLI
