Məlum olduğu kimi, Prezident İlham Əliyev sentyabrın 29-da Zəngilanda keçirilən “Davamlı şəhərlər iqtisadi inkişafın hərəkətverici və bərabərsizliklərlə mübarizə aparan qüvvəsi kimi” mövzusunda 2-ci Milli Şəhərsalma Forumunun açılış mərasimində çıxış edib. Ölkə başçısı çıxışında bir sıra məsələlərə toxunub.
Prezident antiterror tədbirlərinin başlanmasına səbəb olan faktorları sadalayaraq bir sıra məqamlara toxunub: “Bir tərəfdən deyirdilər ki, Azərbaycanın ərazi bütövlüyünü tanıyırlar. Digər tərəfdən isə sentyabrın 2-də Ermənistanın rəhbəri qondarma rejimin rəhbərinə onun müstəqilliyi ilə bağlı təbrik məktubu göndərmişdi. Yəni, bu, necə mümkün ola bilər? Bu, artıq qırmızı xəttin növbəti dəfə pozulması idi. 9 sentyabr tarixində artıq bu, neçənci qırmızı xəttimiz idi. Qondarma Dağlıq Qarabağın qondarma “parlament”i 22 nəfərin səsi ilə “Dağlıq Qarabağ rejimi”nin “prezidenti”ni seçdi və həmin o “prezident” öz çıxışında qeyd etdi ki, biz status uğrunda mübarizə aparacağıq. Yəni, bu nə deməkdir və biz buna necə cavab verməliyik?! Biz buna necə dözə bilərdik? Əlbəttə, biz buna dözə bilməzdik. On gün bundan əvvəl baş verən hadisələrin səbəbi Ermənistan baş nazirinin məsuliyyətsiz siyasəti və onun himayədarlıq etdiyi Qarabağdakı separatçılar idi, onların hərəkətləri idi”.
Sözügedən məsələ ilə bağlı fikirlərini baki-xeber.com-la bölüşən hərbi ekspert Ramil Məmmədli hesab edir ki, Ali Baş Komandanın arqumentləri reallığa söykənir: “Bəli, Ermənistan tərəfi təxribatlara getməsəydi, lokal xarakterli antiterror tədbirlərinə zərurət olmazdı. Ancaq erməni tərəfi məqsədyönlü şəkildə buna şərait yaratdı. Məsələ ondadır ki, separatçılar Laçın yolu ilə qanunsuz olaraq silah və mina daşıyırdılar. Bu ilin aprelin 23-də Laçın yolunun başlanğıcında sərhəd nəzarət-buraxılış məntəqəsinin qurulması bunun qarşısını tam aldı. Ancaq separatçılar bundan nəticə çıxarmadılar. Sülhməramlıların bayrağı altında postlara silah-sursat daşıdılar. Dəfələrlə fortifikasiya qurğuları qurmağa cəhd etdilər, amma ordumuz müdaxilə edərək buna imkan vermədi. Fortifikasiya mühəndis-istehkam sistemlərinin, müdafiə xəttinin qurulması deməkdir. Burada silah və texnikaların effektiv istifadəsi, qoşunların davamlı idarəetməsinin təmin olunması, şəxsi heyətin mühafizəsi nəzərdə tutulur. 10 noyabr 2020-ci ildə əldə edilən üçtərəfli razılaşmaya baxmayaraq, separatçılar ərazilərimizi minalayırdılar. Bu, məsələnin hərbi tərəfi. Məsələnin siyasi tərəfinə gəldikdə isə, Ermənistan baş naziri Nikol Paşinyan 6 oktyabr 2022-ci ildə Praqada Qarabağı Azərbaycanın tərkib hissəsi kimi tanıdığını bəyan etdi. 14 may 2023-cü ildə bunu Brüsseldə bir daha bəyan etdi. Bütün bunların fonunda, rəsmi İrəvan separatçılara qanunsuz hərbi birləşmələrin buraxılması ilə bağlı təzyiq göstərmədi. Bunun tam əksinə olaraq suverenliyimizə qarşı olan addımları körükləyərək vəziyyəti dramatikləşdirməyə çalışdı. Qondarma “seçkilər”lə bağlı separatçılara təbrik ünvanladı. Bu, Praqa və Brüssel görüşlərində verilən qərarlara rəsmi İrəvanın tüpürməsi idi. Eyni zamanda, separatçıların “status” məsələsini yenidən qabartmaları, artıq bardaqda suyu daşırdı. O üzdən, lokal xarakterli antiterror tədbirlərinin həyata keçirilməsi qaçılmaz idi. Ermənistan və separatçılar bunun baş verməsinə səbəb olan bütün təxribatlara getdilər. Ancaq məlum olduğu kimi, bu, onlara baha başa gəldi”.
Vidadi ORDAHALLI
