Paşinyanı devirmək planı işə düşür - Rusiya İrəvan-Xankəndi əlaqələrini kəsməkdən başlayıb...
Məlum olduğu kimi, Ermənistan-Rusiya siyasi münasibətlərində ciddi soyuqlaşma müşahidə edilir. Baxmayaraq ki, iki ölkə müttəfiqlik sazişlərinə malikdir. Ancaq o da faktdır ki, Paşinyan hakimiyyəti əvvəlki Robert Köçəryan və Serj Sarkisyan kimi Rusiyanın satelliti rolunda çıxış etmir. Daha müstəqil mövqe sərgiləyir və Qərbə doğru reveranslar edir. Məhz bu amil Moskvanı daha çox qıcıqlandırır.
Bu arada müşahidələr göstərir ki, hazırda Rusiyanın planı Qarabağ ermənilərinin Paşinyan rejimi ilə əlaqələrini tam kəsmək və ordakı erməniləri tam nəzarətə almaqdır. Daha sonra Paşinyanın Qarabağla əlaqələrini kəsmək və Ermənistanda revanşistləri onun üstünə daha sürətlə qaldırmaq. Eyni zamanda Paşinyanı yıxmaq ssenarisi ilə hərəkət edir. Bunun bir sıra elementləri artıq özünü göstərir. Başlıca element ondan ibarətdir ki, Rusiya Paşinyanla müəyyən yaxınlığı olan Araik Arutunyanı separatçılara rəhbərlikdən uzaqlaşdırdı. İndiki separatçıbaşının Paşinyanla hansısa əlaqəsi yoxdur.
Maraqlıdır, Rusiyanın Qarabağ separatçıları üzərindən belə bir planı ola bilərmi və bu baş tuta bilərmi?
- “Ona görə ki, situasiya çox fərqlidir və əvvəlki imkanlar bu gün yoxdur”
Sözügedən məsələni “Bakı-Xəbər”ə şərh edən “SƏS” Media Qrupunun rəhbəri, politoloq Bəhruz Quliyev buna bir neçə aspektdən yanaşdı: “Son zamanlarda Paşinyanın Rusiyanın forpostluğundan çıxmaq cəhdləri İrəvanla Moskva arasında düşmən münasibətlərin formalaşmasına səbəb olub. Görünən odur ki, Paşinyan Qərbə meyllidir və qarşısında qoyulan öhdəlikləri yerinə yetirməyə borcludur. Bəllidir ki, Qərb bu gün Ermənistanı Rusiyanın nəzarətindən çıxarmaq niyyətindədir. Bu da yalnız Paşinyanın missiyası ilə həyata keçməlidir. Rusiya tərəfi də Qərbin təsiri altında olan Paşinyanın niyyətini bilir. Ona görə də bir sıra addımlar atmağa çalışır. Bunlardan biri də Qarabağ ermənilərini Paşinyan hakimiyyətindən ayırmaqdır. Bu da revanşistlərin Paşinyanın üzərinə qaldırılması məqsədi daşıyır. Son dövrlərdə ABŞ-ın Ermənistana dəstəyi də açıq-aydın görünür. Bütün bunlar Rusiya tərəfində Ermənistana qarşı aqressiyanı formalaşdırıb. Birləşmiş Ştatlar və Avropa İttifaqının Ermənistana münasibəti, faktiki olaraq Cənubi Qafqazda hegemonluq cəhdi Rusiyanı qıcıqlandırır. Çünki Rusiyanın artıq Ermənistanda təsir imkanları yavaş-yavaş praktiki olaraq zəifləyir. Ancaq buna baxmayaraq, Rusiya özünü təsdiq etmək məqsədilə Ermənistanı əldən vermək fikrində deyil. Görünən odur ki, Rusiya Paşinyanı cəzalandırmaq niyyətindədir və onun hakimiyyətdən uzaqlaşdırılması üçün daha böyük planlar qurulacaq. Lakin Qarabağ separatçıları və revanşistlər vasitəsilə Paşinyanı devirmək real görünmür. Niyə? Ona görə ki, situasiya çox fərqlidir və əvvəlki imkanlar bu gün yoxdur. 90-cı illərdə Rusiyanın yardımı ilə Ermənistan ərazilərimizi işğal etdi. Daha sonra Qarabağ dalğasında uğur qazanan separatçıları 1998-ci ildə Ermənistanda hakimiyyətə gətirdi. Az-maz müstəqil mövqedən çıxış edən siyasiləri isə 27 oktyabr 1999-cu ildə parlamentdə törədilən terror vasitəsilə aradan götürdü. Hazırda Qarabağda separatçılar məğlub durumdadır. Ona görə də əvvəlki ssenarini təkrarlamaq real görünmür”.
Vidadi ORDAHALLI
