“Sülhməramlılarla Azərbaycan ordusu vuruşur, NATO bölgəyə gəlir, Rusiyaya qarşı ikinci cəbhə açılır" - yeni erməni planı...

“Milli müdafiə” jurnalının baş redaktoru, rusiyalı hərbi ekspert İqor Korotçenko qeyd edib ki,  erməni lobbisinin, beynəlxalq erməni diasporunun və onların arxasında duran Qərb xüsusi xidmət orqanlarının (MKİ və s.) hədəfi və tapşırığı rus sülhməramlıları ilə Azərbaycan Ordusu arasında toqquşma yaratmaq və bunu Rusiya-Azərbaycan genişmiqyaslı hərbi münaqişəsinə çevirməkdir. O bildirib ki, bu münaqişə halında Türkiyə və onun üzvü olduğu NATO ölkələrinin hərbi kontingenti Cənubi Qafqaza daxil ola bilər:

“Əslində, söhbət hazırda xüsusi hərbi əməliyyat keçirən və bütün hərbi və iqtisadi səylərini bunun üzərində cəmləyən Rusiya Federasiyasına qarşı ikinci cəbhənin açılmasından gedir. Və bütün bunlar ona görədir ki, erməni millətçilərinin Qarabağı Azərbaycandan ayırmaq və orada çürümüş və korrupsioner separatçı administrasiyanı saxlamaq istəklərini həyata keçirsinlər.

Bir vaxtlar erməni millətçiləri artıq SSRİ-nin dağılması mexanizmini işə salmışdılar, indi də Rusiya Federasiyasının dağılması mexanizmini işə salmaq istəyirlər.

Moskva praktiki siyasətində Rusiya ilə Azərbaycan arasında Qarşılıqlı müttəfiqlik fəaliyyəti haqqında Bəyannamənin əsas prinsiplərindən çıxış etməlidir. Qarabağ Azərbaycandır! Azərbaycanın Qarabağ iqtisadi rayonu ərazisində fəaliyyət göstərən erməni separatçıları Rusiyanın qətiyyən nə dostu, nə də müttəfiqidir.

Rusiya Federasiyası öz milli maraqlarının zərərinə dünya ermənilərinin eqoist siyasi maraqlarının həyata keçirilməsi üçün alət olmamalıdır və olmayacaq da”.

Ermənilər bu təxribatçı planlarını həyata keçirə bilərmi?

Hərbi-siyasi ekspert Emin Həsənli "Bakı-Xəbər"ə açıqlamasında bildirdi ki, bu çox ziddiyyətli bir mövzudur:  “Əgər Rusiyadan belə bir məlumat varsa, Rusiya özünü sülhməramlı aparırsa, Azərbaycanla münasibətləri normaldırsa, niyə 10 noyabr Bəyanatına əməl etmir? Rusiyanın təklifi ilə bu bəyənatın imzalandığı bəllidir və orada açıq yazılır ki, rus sülhməramlıları Qarabağa gələndə Qarabağda olan separatçılar oradan  çıxıb gedəcəklər. Amma Rusiya buna əməl etmir. Əgər Rusiya orada toqquşma istəmirsə, sülh yaratmaq istəyirsə, bunun üçün ən böyük imkan hazırda onun əlindədi. O, separatçıları çıxarma və onları tərksilah etmə gücünə malikdir. Rusiya bildirməlidir ki, Ermənistan başda olmaqla bütün dünya buranı Azərbaycan ərazisi kimi tanıyır. Araik Arutunyana ehtiyac yoxdur. Müvəqqəti olaraq sülhməramlılar idarəetməyə kömək edəcək. Yavaş-yavaş Azərbaycan bütünlükdə idarəni ələ keçirsin. Bu son şansdan istifadə edərək, Xankəndidə, Xocavənddə, Ağdərədə, Əsgəranda Azərbaycan bayrağını qaldırsın. Adlar Azərbaycan adları kimi qeyd olunsun. Qarabağa gəlmək istəyən İran vətəndaşları, digər separatçılar buraxılmasın. Rusiya sülhməramlıları bildirir ki, elə bir cihaz onlarda yoxdur ki, nəyin gəlib-getdiyini dəqiq müəyyənləşdirsinlər. Bu isə yanlışdır. Zamanında Azərbaycana deyə bilərdi ki, gəlin birlikdə bunu həyata keçirək. Xankəndiyə, Əsgərana Azərbaycan idarəetmə orqanlarının nümayəndələrini cəlb edə bilərdi. Bütün bunları etməyən Rusiya, əvəzində ermənilərin silahlanmasına, Azərbaycan maşın karvanının yolunun dayandırmasına və bir çox təxribatlara imkan  yaradaraq ermənilərə hamilik edir. Azərbaycan istəyir ki, 30 ildir ləngiyən bu məsələni qısa bir zamanda həll etsin. Ləngimənin səbəbkarı da Rusiyadır. Rusiya onları silahlandırıb və Cənubi Qafqaza gətirib. Rusiya prezidentlərinin iştirakı ilə görüşlərin sayı itirilib. Medvedevin və daha sonra Putinin prezidentlik dönəmində Moskva, Soçi və bir çox görüslər olub. Belə çıxır ki, Rusiya bu məntiqlə Qərbə işləyir. Bu münaqişənin yaranmasında marağı var. Qərb Rusiyanı məcbur etdiyinə görə, təbii ki, Qərbin də öz marağı var. Amma Azərbaycan dövləti heç bir zaman imkan verməyib ki, Azərbaycan ərazisində Rusiya-Qərb, Rusiya-İran və başqa  qarşıdurmalar olsun. Burda ancaq Azərbaycan dövlətinin maraqlarına uyğun addımlar atılır. Azərbaycan dövləti isə heç bir zaman heç kimə güzəştə gedən deyil”.

Məhəmmədəli QƏRİBLİ