Ramil Məmmədli: “Müharibə uzandıqca, itkilər artır və daha çox əsgərə ehtiyac yaranır”
Bəzi Rusiya rəsmiləri yeni səfərbərlik dalğasının mümkünlüyünü müzakirə etməyə başlayıblar, lakin bu hələ rəsmi təsdiqini almayıb. Rusiyanın bir sıra region rəhbərləri son vaxtlar getdikcə daha çox Ukraynada müharibəyə getmək üçün könüllülərlə müqavilə bağlamağa çalışırlar. Ancaq məmurların bunun öhdəsindən gəlmədikləri, əslində isə gələ bilmədikləri məlum olub.
İyunun əvvəlində Vladivostokun vitse-meri Yevgeni Bavin müqavilə üzrə işə qəbul planına əməl edilməməsinin mümkün nəticələri barədə xəbərdarlıq edib. Dekabr ayına qədər planın yerinə yetirilməsinin vacibliyini, əks halda səfərbərliyin başqa ssenari üzrə aparılacağını qeyd edib. Tolyatti vilayət administrasiyasının rəhbəri Yuri Başkirov dərdli danışıb. Onun sözlərinə görə, şəhərə 2000 könüllüdən ibarət plan verilib, lakin o avqustun sonuna kimi cəmi-cümltanı 250-dən bir qədər çox insanı səfərbər edə bilib. Maraqlıdır ki, bu eyni səpkili mesajlar Novosibirsk və İrkutsk vilayətlərində də səsləndirilib. Halbuki, 2023-cü ilin iyununda prezident Vladimir Putin səfərbərliyə ehtiyac olmadığını demişdi.
Maraqlıdır, ola bilərmi ki, Rusiyada vətəndaşların səfərbərliyə getməmələri səbəbindən rəsmi səviyyədə səfərbərlik təkzib olunub? Əvvəlcə, belə bir məlumat yaydılar, amma səfərbərliyin alınmadığını görüb bunu təkzib etdilər.
- “Ancaq gözləntilər özünü doğrultmadığı üçün Rusiya cəmiyyətində narazılıq və hərbi xidmətdən yayınma artır”
Məsələ ilə bağlı “Bakı-Xəbər”ə açıqlama verən hərbi ekspert Ramil Məmmədli bütün bunları istisna etmədi: “Həqiqətən də Rusiyada səfərbərliklə bağlı ciddi problemlər var və getdikcə daha qabarıq formada özünü göstərir. Əslində mobilizasiya problemi yeni deyil. 2022-ci ilin 24 fevralında Rusiya Ukraynaya təcavüza başlayan kimi, sözügedən problem özünü göstərdi. Hərbi mükəlləfiyyəti olanlar kütləvi şəkildə MDB ölkələrinə axın etməyə başladılar. Xüsusən də ruslar daha çox Qazaxıstana üz tutdular. Çünki orada ruslar çox yaşayır. İlk dövrlərdə bu, orduda o qədər də hiss olunmurdu. Çünki Putin hesab edirdi ki, qısa bir müddət ərzində Kiyevi alıb hakimiyyəti dəyişəcək. Ona görə də Rusiya Müdafiə Nazirliyi bütün elit qüvvələrini Ukraynaya yönəltdi. Ancaq işlər planlandığı kimi getmədi və yüksək rütbəli hərbçilər də daxil olmaqla Rusiya böyük itkilər verməyə başladı. Xüsusən də elit qüvvələrin ciddi itkiyə məruzqalması Rusiyaya böyük zərbə oldu. Vəziyyəti belə görən Putin 2022-ci ilin sentyabrında səfərbərlik elan etdi. Ancaq bu da nəyisə dəyişə bilmədi. Ukrayna ordusu əks-hücuma keçərək bir sıra əraziləri işğaldan azad etdi. Müharibə uzandıqca, Rusiyanın itkiləri artır və daha çox əsgərə ehtiyac yaranır. Ukrayna ekspertləri qeyd edir ki, Rusiya 1,5 milyon əsgəri müharibəyə cəlb edib. Ancaq gözləntilər özünü doğrultmadığı üçün Rusiya cəmiyyətində narazılıq və hərbi xidmətdən yayınma artır. Faktiki olaraq Rusiyanın vilayət rəhbərləri bunun öhdəsindən gələ bilmir. Ən önəmlisi indi 70 il əvvəlki qapalı dövr deyil ki, əhalini səfərbər edəsən. Ruslar internet və digər informasiya vasitələri ilə dəqiq məlumatlar əldə edir və müharibənin mənasız olduğunu görürlər. Ona görə də hər vasitə ilə səfərbrlikdən yayınırlar. Hesab edirəm ki, getdikcə bu, daha kəskin forma alacaq. Çünki Rusiyada ciddi demoqrafiq böhran var. Müharibə hələ baş verməmiş əhalinin sayı ildə 1 milyon nəfər azalırdı. İndi isə vəziyyət daha kəskindir”.
Vidadi ORDAHALLI
