Adil Qeybulla: “Sertifikasiya imtahanı ləğv olunmalıdır, buna ehtiyac yoxdur”
Sertifikasiya imtahanından keçə bilməyən tibb işçilərinə 6 ay ərzində maaş veriləcək. Bu “Əhalinin sağlamlığının qorunması haqqında” qanuna dəyişiklikdən sonra olacaq. Mövcud qanunvericiliyin tələblərinə əsasən sertifikasiya imtahanından keçməyən tibb işçisi yenidən 6 ay ərzində hazırlaşıb imtahan verə bilər. Bu zaman iş yeri saxlanılsa da, tibb işçisinə işə gəlməyə icazə verilmir.
Bu müddət ərzində onun aylıq əmək haqqının ödənilməsi mexanizmi ilə bağlı bir sıra ciddi problemlər mövcuddur. Belə ki, yeni təklif olunan dəyişiklikdə bu məsələyə humanist yanaşma ortaya qoyulub və sözügedən 6 aylıq müddətdə işçilərin aylıq vəzifə (tarif) maaşının saxlanılması məqsədi ilə Qanunun 49-1-ci maddəsinin 11-ci hissəsinin 1-ci cümləsinə müvafiq dəyişiklik təklif olunub. Ancaq o da məlumdur ki, digər sahələrdə daha uzun müddətə möhlət verilir. Məsələn, sertifikatlaşdırmadan keçməyən müəllim bir il müddətində iş yeri saxlanılmaqla, təkrar sertifikatlaşdırmada iştirak etmək hüququna malikdir.
Maraqlıdır, niyə həkimlərə 6 ay möhlət verilir?
“Ali məktəbi bitirib, baza tibb təhsil alıb daha sonra rezidentura, diplom alan həkimlərin 5 ildən bir imtahan verməsi biabırçılıqdır”
Professor, tibbi ekspert Adil Qeybulla “Bakı-Xəbər”ə açıqlamasında qeyd etdi ki, sertifikasiya imtahanı ləğv olunmalıdır, buna ehtiyac yoxdur: “Bu cür imtahanlar yalnız ölkəmizə işləmək üçün gələn müəllim və ya həmkimlərə tətbiq edilə bilər. Ali məktəbi bitirib, baza tibb təhsil alıb daha sonra rezidentura, diplom alan həkimlərin hər 5 ildən bir imtahan verməsi biabırçılıqdır. Həkimlər sertifikasiyadan yox, akkreditasiyadan keçməlidir. Akkreditasiya müddəti hər ölkədə fərqli olur. Dünyanın hər yerində akkreditasiya sistemi var. Yəni həkimlər baza və rezidentura təhsili aldıqdan sonra onlara konkret bir sahə üzrə fəaliyyət göstərmək üçün lisenziya verilir. Bu lisenziyanın müddəti 5, yaxud 7 il ola bilər. Həmin müddət bitdikdən sonra təkrar akkreditaisya aparılır, şəxsin həmin müddət ərzindəki fəaliyyəti, nə qədər konfrans və təcrübə mübadiləsində olduğu araşdırılır. Ondan sonra ona yeni dövr üçün lisenziya verilir. Bir şəxs öz ixtisasını dəyişmək istəyirsə, təkrar rezidentura keçməlidir. Prinsip və qayda budur. Buna keçmək lazımdır, sertifikasiya imtahanı formaldır, burda kimin nə marağı varsa, əl çəkmək istəmirlər”.
Günel CƏLİLOVA
