Azərbaycanda tur şirkətləri ilə bağlı tez-tez problemlər yaşanır. Burada fəaliyyət göstərən turizm şirkətləri dünyanın müxtəlif ölkələrinə, eləcə də yerli bölgələrə səyahətlər təklif edir. Amma turizm şirkətlərinin qiymət siyasəti istehlakçıların narazılığına səbəb olur. Belə ki, turizm şirkətləri səyahət paketlərini dollar və avro məzənnəsi ilə təklif edib, ödənişi manatla alırlar.
Nəticədə səyahətçilər onları cəlb edən qiymətlərlə razılaşsalar da, sonradan fərqli qiymətin ortaya çıxmasının şahidi olurlar. Ümumiyyətlə, tur şirkətlərinin düzgün olmayan qiymət siyasəti ictimaiyyətdə narazılığa səbəb olur.
“Əksər hallarda qeydiyyatsız turizm şirkətləri fırıldaqçılıqla məşğul olurlar, müştərilərə mövcud olmayan turpaketlər sataraq onları aldadırlar”
Turizm sahəsi üzrə ekspert Elçin Rüstəmov “Bakı-Xəbər”ə açıqlamasında qeyd etdi ki, yerli turistlərin aldadılması ilə bağlı kifayət qədər fakt var: “Hazırda turizm sahəsindən sui-istifadə edən insanlar da var ki, ofisi, qeydiyyatı yoxdur, servisləri çox aşağıdır. Bu da turizm sektorunda qeyri-sağlam rəqabətə səbəb olur, ölkədəki kifayət qədər nüfuzlu, peşəkar turizm şirkətlərinin işinə maneə yaradır: “Əksər hallarda qeydiyyatsız turizm şirkətləri fırıldaqçılıqla məşğul olurlar. Onlar müştərilərə mövcud olmayan tur paketlər sataraq aldadırlar.
Onu da deyim ki, tur şirkətlərinin qiymət siyasəti reklam xarakteri daşıyır. Yəni tur şirkətəri səyahət paketlərinin qiymətini dollar və avro ilə təqdim edirlər. Bu, bir növ reklam məqsədi daşıyır. Rəqəm manat hesabı ilə müqayisədə daha cəlbedici görünür və burada bir qədər də marketinq gedişi ola bilər. Ancaq tur paketlər xarici valyutada satılır”.
Ekspert onu da əlavə etdi ki, əvvəl turizm şirkətinin yaradılması üçün lisenziya tələb edilirdi. Lakin sonra bu tələb ləğv edildi. Əslində lisenziyanın ləğv edilməsində məqsəd turizm sahəsində inkişafa nail olmaq idi, amma bəzi insanlar bundan düzgün istifadə etmədilər və saxta turizm şirkətlərinin sayı artmağa başladı: “Əvvəl 289 turizm şirkəti var idi və o şirkətlərin hər biri lisenziya, akkreditasiya ilə işləyirdi. Lakin lisenziya tələbi aradan qalxdıqdan sonra insanlar asan şəkildə şirkət açmağa başladılar. Yeni yaradılan şirkətlərin çoxu da sosial şəbəkələr üzərindən fəaliyyət göstərməyə, heç bir ofisi, işçi heyəti olmadan işləməyə başladı. Nəticədə müştərilər kütləvi şəkildə fırıldaqçılarla üz-üzə qaldılar”.
Günel CƏLİLOVA
