Eldəniz Cəfərov: “Yaxşı olardı ki, alkotesterlə yanaşı, narkotik maddələrin qəbul edilməsini isbat edə bilən xüsusi qurğular vasitəsilə araşdırma aparılsın”
Son günlər narkotik istifadə edib sükan arxasında oturan sürücülərin sayının artması cəmiyyəti narahat edən əsas mövzulardan birinə çevrilib. Bu kimi hallar hər gün taksidən istifadə edən minlərlə insanın həyatına ciddi təhlükə deməkdir.
Xüsusilə taksi xidmətlərində bir nəzarətsizlik və xaos hökm sürməkdədir. Əgər əvvəllər bəzi taksi şirkətləri heç olmasa işə götürdükləri sürücülərlə üzbəüz görüş keçirirdilərsə, indi onlayn qaydada işə qəbul həyata keçirilir ki, bu da qətiyyən yolverilməzdir.
Qeyd etdiyimiz kimi, aparılan araşdırmalar zamanı bəzi taksi şirkətlərində çalışan sürücülərin narkotik istifadəçisi olduğu müəyyən edilib.
“Qanunvericilikdə müəyyən boşluqlar ola bilər, narkotik qəbul edən sürücülərin aşkarlanması çətin ola bilər, lakin…”
Nəqliyyat eksperti Eldəniz Cəfərov bildirdi ki, Azərbaycanda taksi fəaliyyətini tənzimləyən Nazirlər Kabinetinin xüsusi reqlamenti və tələbləri mövcuddur: “Bu tələblər 2019-cu ildən var. Bu tələblərə əsasən taksi fəaliyyəti ilə məşğul olan vətəndaşların ən azı 21 yaşı, 2 illik sürücülük təcrübəsi olmalıdır, taksi fəaliyyəti ilə məşğul olduğunu bildirmək üçün avtomobilin üstündə taksi nişanı olmalıdır. Özünün parkı olan, ştatlı sürücüləri olan taksi şirkətləri bu qaydalara əməl edirlər. Təəssüf ki, operator şirkətləri ilə çalışan və fərdi qaydada çalışan vətəndaşlar bu qaydalara bir çox hallarda əməl etmir. Problemlər bundan qaynaqlanır. Taksi operator şirkətləri, təəssüf ki, müqavilə imzaladıqları vətəndaşların, həmçinin avtomobillərin kriteriyalara uyğun olub-olmadığını yoxlamırlar. İşə qəbul etdikdən sonra hər hansı nəzarət, təftiş həyata keçirilmir. Bu gün Azərbaycanda spirtli içki qəbul edərək sükan arxasına əyləşən sürücülərlə bağlı Dövlət Yol Polisi tərəfindən tədbirlər görülür: reydlər keçirilir və s. Yaxşı olardı ki, alkotesterlə yanaşı, narkotik maddələrin qəbul edilməsini isbat edə bilən xüsusi qurğular vasitəsilə araşdırma aparılsın. Bununla bağlı qanunvericilikdə müəyyən boşluqlar ola bilər, narkotik qəbul edən sürücülərin aşkarlanması çətin ola bilər. Lakin biz cəmiyyət olaraq bu bəladan qurtulmaq üçün əlimizdən gələn dəstəyi göstərməliyik. Hər bir vətəndaş qeyri-adekvat sürücünü gördükdə mütləq qaydada yol polisi əməkdaşına, yaxud da qaynar xəttə (902 ya 102) məlumat verməlidir. Taksi şirkətinə şikayət etməlidir. Problemin həllində hər kəs əlindən gələni etməlidir”.
Günel CƏLİLOVA
.jpg)