Bir universitetdə professor 2 min, digərində 900 manat maaş alır, məsələn, İqtisad və Texniki universitetlər...

Məhərrəm Zülfüqarlı: “Çox təəssüf ki, əməkhaqqı məsələsində bu nümunəni götürüb tətbiq edən ikinci bir universitet görmürük”

img

Ali məktəblərdə dərs deyən yüksək elmi titullu müəllimlər əsasən əməkhaqqının az olmasından narazılıq edirlər. Bildirirlər ki, heç də ölkədəki bütün universitetlərdə eyni titullu alimlər eyni məbləğdə maaş almır.

Elmlər doktorları, professorlar deyirlər ki, Dövlət İqtisad Universitetində (UNEC)  professor 2 min manat, Azərbaycan Texniki Universitetdə və başqa ali məktəblərdə professor titulu olanlar 900 manat əməkhaqqı alır. Eyni titullu müəllimlərin maaşındakı bu ədalətsiz fərq nə ilə bağlıdır? Səbəb nədir ki, ali məktəblərdə professorların maaşı arasında bu qədər fərq qoyulur?

Bəzi ekspertlər hesab edir ki, hansı ali məktəbdə təhsil haqqı bahadırsa, həmin ali məktəblərdə daha yüksək maaş verilir. Bəziləri isə bildirir ki, Azərbaycan ali məktəblərində təhsil haqları kifayət qədər yüksəkdir, ali məktəblər təhsil haqları sayəsində yüksək məbləğ əldə edirlər, sadəcə, o vəsaiti professorun, müəllimin maaşını artırmağa yönəltmirlər. Bir sıra ekspertlər hesab edir ki, ali məktəblər qazandıqları vəsaiti təhsil ocağının inkişafına yönəltməyə deyil, daha çox şəxsi məqsədlər üçün istifadə etməyə can atır.

  • “Bu çox aktual bir problemdir”

AVCİYA-nın vitse-prezidenti, professor Məhərrəm Zülfüqarlı “Bakı-Xəbər”ə şərhində bildirdi ki, ölkə ali məktəblərində bu ayrıseçkilik uzun illərdir davam edir. M.Zülfüqarlının sözlərinə görə, universitetlərin bir çoxu professorun maaşını artırmaq istəmir. “Bu çox aktual bir problemdir. Bilirsiz ki, ali məktəblər arasında dövlət ali məktəbləri də, özəllər də var. Lakin müasir dövrdə ali məktəblərin hamısı özünümaliyyələşməyə keçib. Yəni universitet tələbələrin ödədiyi təhsil haqqı və dövlət sifarişi hesabına tələbə qəbul edir. Əmək haqqını da hər bir universitet özü üçün fərqli götürür. UNEC-də xarici ölkələrdə məqaləsi çıxan, kitabları nəşr olunan alimləri mükafatlandırırlar və nəticədə əmək haqqlarına əlavələr olunur. Amma bir çoxunda bu həyata keçirilmir. Əlbəttə, professorlara yüksək maaş vermək sahəsində Dövlət İqtisad Universiteti nümunədir və başqa universitetlərin rəhbərləri də buna çalışmalıdır. Çox təəssüf ki, əməkhaqqı məsələsində bu nümunəni götürüb tətbiq edən ikinci bir universitet görmürük. Mənim keçən il iki kitabım 7 dilə tərcümə olundu, beynəlxalq aləmdə yayıldı. Amma nəinki buna görə əməkhaqqıma əlavə edilmədi, mükafat verilmədi, heç “sağ ol” deyən də olmadı. Ona görə də mənə elə gəlir ki, alimləri həm mənəvi, həm də maddi cəhətdən həvəsləndirmək lazımdır”.

M.Zülfüqarlının fikrincə, professorların, alimlərin maaşını yüksəltmək yolu ilə onları fəaliyyətə daha çox həvəsləndirmək lazımdır ki, onlar elm və təhsilə daha çox can yandırsınlar, töhfə versinlər. O qeyd edir ki, buna nümunə də Dövlət İqtisad Universitetidir ki, bu müsbət təcrübəni ortaya qoyub və gələcəkdə digər universitet rəhbərləri də bunu həyata keçirməlidir.

İradə SARIYEVA

Peşə etikası

Son xəbərlər