Paşinyan 2 şüarla seçki təbliğatına başladı - gənclərə xüsusi tapşırıq verildi...
Akif Nağı: “Bu real hədəf deyil, seçki kampaniyasında istifadə olunan tezislərdir”
Ermənistanın Baş naziri Nikol Paşinyan həyat yoldaşı Anna Akopyanla Qərbi Zəngəzur bölgəsinə (Sünik) səfər edib. Paşinyanın Qərbi Zəngəzura səfəri Ermənistanın daxilində birmənalı qarşılanmayıb.
Paşinyan bu barədə özünün Feysbuk səhifəsində yerləşdirdiyi görüntülərdə “Biz Tatevə “Təhsil dəbdədir” adlı mühazirə üçün gedirik” deyib.
Müxalifət partiyası "Şant bloku"n bəyanatında isə bildirilir ki, Paşinyanın Sünikdəki fəaliyyəti regionda dəstəyi gücləndirməyə yönəlmiş seçkiqabağı strategiyanın bir hissəsi ola bilər.
Bəzi erməni KİV-ləri regiona tez-tez səfərləri ictimai əhval-ruhiyyəyə təsir etmək və seçkilər öncəsi hakim partiyanın mövqelərini gücləndirmək cəhdi kimi qiymətləndirirlər.
Bundan əlavə, KİV-in məlumatına görə, baş nazir partiyasının üzvlərinə əhali ilə işi, o cümlədən gənclərlə görüşləri və “Real Ermənistan” və “sülh müqaviləsi” kimi əsas mesajların yayılmasını gücləndirməyi tapşırıb.
Yəni Paşinyan yenə seçkilərə start verib və bu seçkilərdə də qalib gəlmək üçün bölgələrə səfərlərini intensivləşdirir.
Göründüyü kimi, Paşinyanın sonuncu səfəri Qərbi Zəngəzura imiş ("Sünik"). Məlumatlara görə, Paşinyan öz tərəfdarlarına orda, xüsusən də gənclər arasında iki tezisin yayılmasını tapşırıb. Biri “Real Ermənistan”, o biri də Azərbaycanla sülh müqaviləsinin bağlanmasının təşviqi ilə bağlı olub.
Paşinyan yeni parlament seçkiləri ərəfəsində “Real Ermənistan” və sülh sazişi kimi bu əsas mövzuları ortaya qoymaqla nəyə nail olmaq istəyir? O, bu şüarları meydana çıxarmaqla nəyi udmaq, qazanmaq istəyir?
“Paşinyanın “Real Ermənistan” və sülh müqaviləsi mesajlarının cəmiyyətə çatdırılmasının, xüsusən gənclərə tapşırıqların verilməsinin...”
Azad Vətən Partiyasının sədri Akif Nağı “Bakı-Xəbər”ə bildirdi ki, yeni seçki kampaniyasında Paşinyanın bu iki tezisi ön plana çıxarmasının arxasında müəyyən maraqlar dayanır. O qeyd etdi ki, adətən seçki öncəsi çoxlu vədlər verilir və vəd verən şəxs seçiləndən sonra o vədlər unudulur, yaddan çıxarılır: “Hansı populyar ideyalar var ki, seçki öncəsi ondan istifadə etmək mümkün olsun. Məsələyə o baxımdan yanaşmaq lazımdır. Ermənistan cəmiyyətində “Real Ermənistanın” yaranması ilə bağlı artıq müəyyən fikirlər var. Cəmiyyətin xeyli hissəsi başa düşür ki, Rusiyaya, yaxud Qərbə meyl etməklə, onların alətinə çevrilməklə Ermənistanı xilas etmək mümkün olmayacaq. Onlar reallığı başa düşürlər”.
A.Nağının sözlərinə görə, vaxtilə Azərbaycanın Qarabağda ermənilərə yaratdığı şəraiti onlar düzgün dəyərləndirə bilmədilər, separatçılığa başladılar və öz cinayətkar əməllərinə görə də Azərbaycan ərazisini könüllü şəkildə tərk etdilər: “Çünki bilirdilər ki, qalmaq mümkün deyil. İndi başa düşürlər ki, həmin ssenari üzrə prosesin davamı gedə bilər. Ermənistan deyilən dövlət də Azərbaycanın tarixi ərazilərində yaradılıb. Azərbaycanda proseslər sürətlə gedir. Bu proseslər həm də hüquqi müstəvidə davam edir ki, azərbaycanlılar Qərbi Azərbaycana qayıtmalıdılar. Azərbaycanlıların indi Ermənistan deyilən tarixi Azərbaycan torpaqlarına qayıtması bir müddətdən sonra o Ermənistan deyilən qurumun mövcudluğuna son qoyulması prosesinin başlanması deməkdir. Cəmiyyət artıq başa düşür ki, Ermənistanı xilas etmək, Ermənistan kiçik dövlət olsa da onu qoruyub saxlamaq lazımdır. İndiki sərhədini, 29,7 min kvadrat kilometrlik ərazini saxlamaq lazımdır, əslində bu Azərbaycan torpağıdır.
Bu ideya Ermənistan cəmiyyətində var.
Seçki öncəsi bu iki ideyanı qabartmaqla Paşinyan seçicilərin səsini qazanmaq istəyir. Sülh müqaviləsi məsələsinə gəlincə, aydındır ki, Ermənistan cəmiyyəti müharibə istəmir. Baxmayaraq ki, revanşistlər, Sarkisyanın, Köçəryanın dəstəsi hay-küy salırlar, sülh əleyhinə kampaniyalar aparırlar, bu da faydasızdır. Çünki onlar heç bir sosial bazaya malik deyillər. Ermənistan hökuməti də, cəmiyyəti də yaxşı başa düşür ki, Azərbaycana qarşı müharibə etmək mümkün deyil. Bilirlər ki, müharibəyə başlasalar hansı ağır itkilərlə üzləşə bilərlər. Müharibə onlara heç nə vəd etmir, Azərbaycana qarşı qələbəyə də ümid yoxdur. Əgər qələbəyə ümidlərim oldaydı nəsə təbliğat aparardılar. Analar övladlarını itirmək istəmir, orda Birinci və İkinci Qarabağ müharibəsində iştirak edən ermənilərin yaxınlarının “Analar Hərəkatı” da var, onlar vaxtaşırı meydanlara çıxıb müharibə istəmədiklərini deyirlər. Ermənistanda vaxtaşırı forumlar keçirilir, hər kəs müharibə əleyhinə çıxış edir. Çünki müharibənin onlara vurduğu zərbəni gördülər və müharibə aparmağın mənasızlığını dərk etdilər.
Paşinyanın “Real Ermənistan” və sülh müqaviləsi mesajlarının cəmiyyətə çatdırılmasının, xüsusən gənclərə tapşırıqların verilməsinin arxasında başqa məqsədlər dayanır. Paşinyan bu məsələni ortaya atmaqla orda sülh təbliğatı apardığını göstərir. Ancaq burda incə bir məqam var ki, Paşinyan sülh dedikdə Ermənistanın maraqlarının güzəştə gedilməyəcəyini nəzərdə tutur və təbliğatını aparır. Bu, Azərbaycanın şərtləri daxilində sülh müqaviləsinə getmək deyil. Bu məsələni biz nəzərdə saxlamalıyıq. Paşinyan özlərini həm daxildə, həm xaricdə sülhpərvər bir qüvvə kimi qələmə verməyə çalışır. Bu ideyaların təbliği Paşinyanın seçki kampaniyası üçün ölçülüb-biçilib. Bu tezislər Ermənistan cəmiyyətində populyar olduğu üçün Paşinyan ondan istifadə edib. Paşinyan da ondan seçkidə udmaq məqsədilə istifadə edir. Əslində Paşinyan başa düşür ki, dediyi “Real Ermənistan” qurmaq da onun üçün çox çətindir, problemlidir. Eyni zamanda indiki şəraitdə onun sülh müqaviləsinə getmək istəyi də yoxdur. Çünki onun siyasəti ondan ibarətdir ki, mümkün qədər vaxtı uzatsın. Ola bilsin ki, bölgədə vəziyyət dəyişsin, Azərbaycana qarşı daha barışmaz mövqe tuta bilsin. Onun taktikası bundan ibarətdir”.
A.Nağının sözlərinə görə, Paşinyan Ermənistan cəmiyyətinin çox böyük əksəriyyətinin müharibədən qaçdığı, müharibə istəmədiyi üçün sülh tezisini ortaya atıb. A.Nağı qeyd etdi ki, üstəlik də revanşistlər “müharibə, müharibə” deyirlər, seçkilər yaxınlaşdıqca revanşist qüvvələr də mövqelərində dəyişiklik edəcəklər: “Ermənistan cəmiyyətində müharibə təbliğatı populyar deyil və seçkiləri udmaq istəyirsənsə insanların mövqeyinə uyğun hərəkət etməlisən. Bu real hədəf deyil, seçki kampaniyasında istifadə olunan tezislərdir”.
İradə SARIYEVA
