Qranada görüşü yaxınlaşdıqca Ermənistan baş naziri Nikol Paşinyanın təxribatçı xarakterli açıqlamalarının dozası artır. Paşinyan hökumətin iclasında deyib ki, Azərbaycanın apardığı etnik təmizləmə siyasəti nəticəsində Qarabağdan ermənilərin axını davam edir:
“Yaxın günlərdə Qarabağda erməni qalmayacaq və bu, birbaşa etnik təmizləmə və vətəndən məhrumetmə aktıdır, erməni tərəfi beynəlxalq ictimaiyyəti çoxdan bu haqda xəbərdar edirdi. Müxtəlif beynəlxalq iştirakçıların Qarabağda baş verən etnik təmizləməni pisləyən bəyanatları vacibdir, amma onlardan sonra konkret addımlar atılmazsa, bu bəyanatlara sadəcə tarix üçün mənəvi statistikanın yaradılması kimi baxılacaq”.
Bir tərəfdən Ermənistan rəsmiləri deyir ki, sülh sazişinin imzalanmasında maraqlıdılar. Həmçinin, Paşinyan bundan əvvəl qeyd etmişdi ki, mülki insanlar üçün kütləvi təhlükə yoxdur. O biri tərəfdən də Paşinyan görüşə sayılı günlərin qaldığı bir vaxtda “etnik təmizləmə”dən dəm vurur. Axı Azərbaycan rəsmi səviyyədə dönə-dönə deyir ki, ermənilər Qarabağda qala bilər.
Maraqlıdır, ritorikanın sərtləşdirilməsi oktyabrın 5-də keçiriləcək Qranada görüşünə necə təsir edəcək?
“Ermənistan hakimiyyəti tələsməlidir ki, sülh sazişi tezləşsin və buna doğru addımlar atsın”
Məsələ ilə bağlı “Bakı-Xəbər”ə açıqlama verən İdarəçilik Akademiyasının müəllimi, sosioloq Hüseyn İbrahimov hesab edir ki, Paşinyan ritorikanı sərtləşdirməklə siyasi xal qazanmağa çalışır: “Paşinyan hakimiyyətə gələndən bəri dəfələrlə bir-birinə zidd fikirlər səsləndirib. İkinci Qarabağ müharibəsindən əvvəl fərqli, müharibədən sonra isə tamam əks fikirlər səsləndirirdi. İndinin özündə də qısa vaxt ərzində olduqca ziddiyətli fikirlər səsləndirdiyinin şahidi oluruq. Bəzən Paşinyan elə siyasi atmosfer formalaşdırır ki, hesab edirsən sülh sazişi çox yaxındır. Ancaq bir də görürsən ki, Paşinyan tamamilə fərqli bir mövqe ortaya qoyur. Sanki 5 gün əvvəl optimist bəyanatlar verən Paşinyan deyilmiş. Qranada görüşünə çox az qalmış belə təxribatçı ritorika görüşün keçirilməsini sual altında qoyur. Görüşün keçirilməsi ilə bağlı müəyyən suallar yaradır. Düzdür, onun ritorikanı sərtləşdirməsində siyasi məqsədləri var. Məsələ ondadır ki, Qarabağı tərk edən ermənilərin bir qismi ona qarşı qəzəblidir. Eyni zamanda, Ermənistandakı revanşist qanad Qarabağ ermənilərindən öz çirkin məqsədləri üçün istifadə etməyə çalışır. Belə sərt ritorika həm də revanşistləri neytrallaşdırmaq məqsədi daşıyır. Ancaq məsələyə başqa tərəfdən yanaşanda Paşinyan hakimiyyəti üçün sülhdən başqa alternativ qalmayıb. Bizim itirəcəyimiz bir şey yoxdur. O mənada ki, sonuncu antiterror tədbirlərindən sonra Azərbaycan Qarabağda suverenliyini tam bərpa etdi. Paşinyan hakimiyyəti üzərindən Qarabağ yükünü götürdü. Belə olan halda Ermənistan hakimiyyəti tələsməlidir ki, sülh sazişi tezləşsin və buna doğru addımlar atsın. Ona görə ki, sülh nə qədər tez olsa, bu bir o qədər münasibətlərin normallaşmasına və Türkiyə ilə sərhədin açılmasına səbəb olacaq. Bütün bunlar da özlüyündə Ermənistan üçün yeni imkanların açılması deməkdir. Bu baxımdan məsələyə yanaşdıqda Paşinyan tələsməlidir. Əks halda bu, onun hakimiyyətdə qalması üçün ciddi problemlər yaradacaq”.
Vidadi ORDAHALLI
