Son vaxtlar erməni lobbisi ABŞ-da Azərbaycana qarşı fəaliyyətini gücləndirir. Lobbinin təsiri altında olan konqresmenlər, bəzi dövlət rəsmiləri Azərbaycan əleyhinə çağrışlarla çıxış edirlər. Əsas motiv də ondan ibarətdir ki, guya Azərbaycan Qarabağ ermənilərinə yönəlik etnik təmizləmə siyasəti aparır.
Bu arada 96 konqresmen Bayden administrasiyasını Azərbaycana qarşı sanksiyaların tətbiq olunmasına çağırıb. Belə ki, ABŞ Senatının və Nümayəndələr Palatasının 96 üzvündən ibarət ikipartiyalı qrupu Qarabağla bağlı Dövlət katibi Entoni Blinken və Maliyyə naziri Canet Yellenə məktub ünvanlayıb. Məktubda Qarabağa “hərbi hücumlar və qəddar blokada” ilə əlaqədar olaraq Azərbaycan hökumətindəki şəxslərə Qlobal Maqnitski Aktı çərçivəsində sanksiyalar tətbiq etmək çağırışı yer alıb. Məktubda Azərbaycanın ötən ilin dekabrından Laçın dəhlizini bağlamaqla 120 min ermənini hərəkət azadlığı, ərzaq və dərmana çıxışdan məhrum etdiyi qeyd olunur.
“Ermənipərəst konqresmenlər nə qədər cəhd etsələr də, ABŞ-ın dövlət maraqlarını arxa plana keçirə bilməzlər”
Sözügedən məsələ ilə bağlı fikirlərini “Bakı-Xəbər”lə bölüşən İrəvan Azadlıq Təşkilatının sədri Təbriz Musayev hesab edir ki, bu kimi cəhdlər hansısa nəticə verməyəcək: “Əvvəla, ABŞ Konqresində Azərbaycan əleyhinə fəaliyyət birinci dəfə deyil baş verir. Dəfələrlə bir qrup ermənipərəst konqresmen Azərbaycan əleyhinə qərarların qəbul olunmasına cəhd edib. Onların əsas uğuru 1992-ci ilin oktyabrında Azərbaycana ABŞ-ın dövlət yardımını qadağan edən 907-ci düzəlişin qəbul edilməsi zamanı oldu. Bu da ondan irəli gəlirdi ki, Azərbaycan yenicə müstəqillik qazanmışdı, ABŞ-la əlaqələr zəif idi və s. Erməni lobbisi yaranan vəziyyətdən istifadə edərək qadağanın qəbul olunmasına nail oldu. Düz 10 il sonra, yəni 2002-ci ildən başlayaraq hər il ABŞ prezidenti bədnam düzəlişə moratorium qoyur. Ermənipərəst konqresmenlər nə qədər cəhd etsələr də, ABŞ-ın dövlət maraqlarını arxa plana keçirə bilməzlər. Ən azından ona görə ki, Birləşmiş Ştatlar Avropanın enerji təchizatında Azərbaycanın oynadığı rolun fərqindədir. Üstəlik, İran amilinə görə Vaşinqton ölkəmizin geosiyasi və strateji əhəmiyyətinə önəm verir. Belə olan halda düşünmürəm ki, konqresin 96 üzvünün Blinkenə müraciəti nəyisə dəyişə bilsin. Konqresmenlərin bu təşəbbüsü daha çox erməni lobbisini sakitləşdirməyə hesablanıb. Çünki onlar erməni diasporundan bəslənirlər və bunun hesabını hansısa formada verməlidilər. Bunun nəyisə dəyişəcəyini düşünmürəm. Ən azından ona görə ki, Azərbaycan rəsmi səviyyədə etnik erməniləri Qarabağdan qovmur, onları sıxışdırmır. Əksinə, onlara deyir ki, gəlin ölkənin vətəndaşı olun. O zaman bunun nəyi etnik təmizləmədir? Digər tərəfdən, Senatın Xarici Əlaqələr Komitəsinin sədri Bob Menendesin vəzifəsindən uzaqlaşdırılması, barəsində araşdırmanın başlaması hazırkı dövrdə erməni lobbisinə vurulan güclü zərbədir. Fikrimcə, Menendesin vəzifəsindən uzaqlaşdırılması təsadüfi hadisə deyil. Başqa bir tərəfdən biz nəzərə almalıyıq ki, Konqresdə güclü yəhudi lobbisi var və onlar razı olmazlar Azərbaycana qarşı sanksiya tətbiq olunsun. Xüsusən də indiki dövrdə, İsrail-Azərbaycan münasibətlərinin çox yüksək səviyyədə olduğu bir vaxtda”.
Vidadi ORDAHALLI
