Rusiya XİN “DQ-nin statusu barədə gizli centlmen saziş” barədə ilk açıqlama yaydı...

Rusiya Xarici İşlər Nazirliyi Ermənistan hakimiyyətinin yeritdiyi siyasətlə bağlı sərt bəyanat yayıb. Bəyanatda olduqca kəskin tənqidi fikirlər yer alıb.
Eyni zamanda bəyanatda belə bir məqam diqqəti cəlb edir. Qeyd edilir ki, Paşinyan 2022-ci il müharibəsinin ağır nəticələrində, Rusiya, Ermənistan və Azərbaycan liderlərinin 2020-ci ilin noyabrında imzaladığı, “Dağlıq Qarabağın statusu haqqında məsələnin həllinin gələcək nəsillərə saxlanmasına dair centlemen sazişlərinin” pozulmasında təqsirlidir: “Regional məsələlərə gəlincə isə, Rusiya, Azərbaycan və Ermənistan liderlərinin 2020-ci ilin noyabrında Qarabağın statusu məsələsini gələcək nəsillərin öhdəsinə buraxmaq barədə centlmen razılaşmasına əməl etmək əvəzinə, Paşinyan Qərbin öyüd-nəsihətlərinə boyun əydi. Praqa və Brüsseldə Azərbaycanın Qarabağ üzərində suverenliyini tanıyan 1991-ci il Alma-Ata Bəyannaməsi əsasında hərəkət etmək qərarını qəbul etdi və bu da 9 noyabr 2020-ci il tarixdə imzalanan üçtərəfli bəyanatın şərtlərini, eləcə də Rusiya sülhməramlı qüvvələrinin mövqeyini kökündən dəyişdi”.
Belə məlum olur ki, Rusiya Ermənistandan çox Qarabağın status məsələsində qərarlı olub.
- “Paşinyanın Qarabağ daxil Azərbaycanın ərazi bütövlüyünü tanıması bizə olan sevgisindən irəli gəlmirdi”
Məsələ ilə bağlı “Bakı-Xəbər”ə açıqlama verən Böyük Azərbaycan Partiyasının sədri Elşad Musayevin fikrincə, bütün bunlar bir daha Rusiyanın əsil simasını ortaya qoyur: “Məlum olduğu kimi, son dövrlər Ermənistan-Rusiya münasibətləri həddən artıq kəskinləşib. Tərəflər bir-birini çox ciddi şəkildə ittiham edirlər. Eyni zamanda Qarabağla bağlı məsələlərdə çox kəskin qarşılıqlı ittihamlar səslənir. Ona görə də əvvəlcədən müəyyən etmək lazımdır ki, tərəflər Qarabağla bağlı nə istəyir. Açıq-aydın görünür ki, Rusiya bölgədə qalmaqdan ötrü Qarabağın status məsələsini gələcəyə saxlamaq istəyirdi. Bu, rəsmi səviyyədə Kremlin planının açıqlanması anlamına gəlir. Ona görə də Rusiya maraqlı deyildi ki, məsələ öz həllini tapsın. Moskva Qarabağ probleminin dondurulmasında maraqlı idi. O üzdən, Kreml üçün ən uyğun variant o idi ki, status məsələsi gələcək nəslə saxlanılsın. Ona qədər də Rusiya bölgədə qalsın. Paşinyan bu oyunlara müəyyən mənada mane olduğu üçün Rusiya Ermənistan hakimiyyətini ittiham edir. Belə baxanda, Rusiyanın planını Azərbaycan Ordusu pozdu. Çünki Azərbaycan Qarabağın status məsələsini gələcək nəsillərə saxlamaq niyyətində deyildi. Paşinyanın Qarabağ daxil Azərbaycanın ərazi bütövlüyünü tanıması bizə olan sevgisindən irəli gəlmirdi. Nikol məcburiyyət qarşısında qalaraq bu addımı atdı. Çünki o yaxşı bilirdi ki, növbəti toqquşma olarsa, bu ona baha başa gələcək. Növbəti toqquşma Ermənistanın içinə qədər çatacaq. Məhz buna görə o, bizim ərazi bütövlüyümüzü tanıdı. Çünki əks halda Ermənistan ciddi problemlərlə üzləşə bilərdi. Rusiya görür ki, Paşinyan hakimiyyəti Qərbə doğru istiqamət götürüb, o üzdən ritorikanı sərtləşdirir. Çünki gedən proseslər Moskvaya sərf etmir. Ona görə ki, Rusiya Ermənistanı özünün forpostu hesab edir. Belə baxanda, Rusiyanın daha çox haqqı var. Ona görə ki, Ermənistanı yaradan, erməniləri Qarabağa köçürən, onlara himayədarlıq edən Rusiya olub. Bu səbəbdən Qərbin gəlib Ermənistanda möhkəmlənməsi Rusiyanın xoşuna gəlmir. İkinci tərəfdən, Ermənistan daxilində Rusiyaya qarşı pis münasibət var. Moskva bu münasibəti dəyişmək üçün topu Paşinyana atır və statusla bağlı manipulyasiya edir. Məqsədi odur ki, Paşinyan hakimiyyəti devrilsin”.
Vidadi ORDAHALLI