“Qərb Ukrayna ilə bağlı vəziyyətdən Rusiya Federasiyasını Cənubi Qafqazdan sıxışdırmaq üçün istifadə etmək istəyir, ABŞ Ermənistan və ermənilərlə maraqlanmır”. “RİA Novosti”nin yaydığı məlumata görə, bunu Rusiyanın daxili işlər naziri Vladimir Kolokoltsev İrəvanda Ermənistanın baş naziri Nikol Paşinyanla görüşündə deyib.
Rusiyanın daxili işlər naziri “Qərb Ukrayna ətrafındakı vəziyyətdən istifadə edərək Rusiyanı Cənubi Qafqazdan sıxışdırıb çıxarmaq və Rusiya-Ermənistan əlaqələrini məhv etmək istəyir. ABŞ və Aİ kəşfiyyat xidmətləri və hüquq-mühafizə orqanları, müdafiə və məhkəmə sistemi daxil olmaqla, əsas sahələr üzrə islahatların aparılması üçün öz reseptlərini təklif edirlər. Bu vəziyyət bizim müttəfiqliyimizi sarsıdır. Amerikalılar həmişə yalnız öz maraqlarını güdürlər, Ermənistan və erməniləri veclərinə almırlar” – deyə Kolokoltsev bildirib.
Göründüyü kimi, Rusiyanın daxili işlər naziri siyasi bəyanatlar verib və Paşinyanı az qala hədələyib.
“Rusiya Ermənistanda vəziyyəti qarışdırmaq iqtidarındadır”
Siyasi və Hüquqi Araşdırmalar Mərkəzinin (SHAM) sədri Xəyal Bəşirov “Bakı-Xəbər”ə şərhində “Rusiya ilə Ermənistan arasında münasibətlərin sürətlə soyumasının şahidiyik. Təbii ki, bu da Ermənistanın anti-Rusiya siyasəti, eyni zamanda Qərbyönümlü addımları ilə əlaqədardır. Nikol Paşinyan hakimiyyətə gəldiyi gündən antirusiya siyasətini yürüdür. Hakimiyyətə gələndən sonra onun ilk addımlarından biri KTMT-yə rəhbərlik edən erməni əsilli insanı həbs etmək oldu. Paşinyanın daha sonra da onun vəzifədən kənarlaşdırılmasına nail olması əslində hakimiyyətə gəldikdən sonra hansı mövqeyə sahib olacağını bir daha isbat etmiş oldu. Amma müəyyən mənada sonralar bu münasibət bir az səngidi, Paşinyan Rusiyaya qarşı açıq mövqe ortaya qoymadı. Amma İkinci Qarabağ müharibəsi reallaşandan və ondan sonrakı proseslərdən sonra Nikol Paşinyan açıq şəkildə antirusiya bəyanatları verməkdən, ölkədə Rusiyaya qarşı iğtişaşların təşkil edilməsindən, hətta Vladimir Putinin özünün və komandasında olan insanların ünvanına fikirlər səsləndirilməsindən də çəkinmir. Bu, təbii, Rusiya və Ermənistan arasında olan münasibətdir. Amma biz bilirik ki, Ermənistan hər zaman kimlərdənsə öz məqsədləri üçün istifadə etmək məsələsində bu tip siyasəti ilə seçilib. İstifadə edir və sonra da lazım gələndə dərhal mövqeyini dəyişir. Ermənistanın Rusiyaya qarşı atdığı son addımlar bundan ibarət oldu ki, Ermənistan ABŞ-la birgə öz ərazisində hərbi təlimlər keçirib. Bu o Ermənistandır ki, KTMT-də təmsil olunur və həmin təşkilatın iclasında özünün sədrlik etdiyi zaman təlimlərin keçirilməsi ilə bağlı razılıq versə də, sonradan həmin təlimlərin keçirilməsindən müəammalı şəkildə imtina etdi. Təbii ki, bunun onun Qərbyönümlü himayədarlarının təsiri altında baş verən proses olduğunu bilirik. Ondan sonra təbii ki, Nikol Paşinyanın həyat yoldaşı Anna Akopyan Ukraynaya səfər etdi, ora humanitar yardım apardı və ən sonda Erməninistan Roma əsasnaməsinin təsdiq olunması ilə bağlı prosesi başlatdı. Roma Statutuna görə, bu əsasnaməni təsdiqləyən 120 ölkənin ərazisində Vladimir Putin axtarışdadır və onun həbsinə order verilib. 125-ci dövlət olmaq uğrunda prosesi reallaşdıran Ermənistan, təbii ki, Rusiyadan bu təpkini görməli idi”-deyə bildirdi.
X.Bəşirovun sözlərinə görə, bir tərəfdən bu addımları atan, digər tərəfdən Rusiyanın müdafiəsinə, mühafizəsinə güvənmək istəyən Ermənistan təbii ki, bu yürütdüyü siyasətlə hər tərəfdə, o cümlədən də Rusiyada çox ciddi qıcıq yaradır. “Ermənistanın baş naziri tərəfindən Rusiyaya qarşı bəyanatlar verilir, Rusiyanın artıq Ermənistanın təhlükəsizliyinə təminat verməyəcəyi, Ermənistana artıq inanmadığı, eyni zamanda onun Cənubi Qafqazdan çıxması ilə bağlı fikirlər səsləndirilir. Təbii ki, bununla bağlı Rusiya tərəfinin bu şəkildə təpkisi gözlənilən idi. Qeyd olunduğu kimi, Rusiya daxili işlər nazirinin Ermənistana göndırilməsi prosesi elə bir görüntü yaradır ki, Vladimir Putin Rusiya prezidenti olaraq daxili işlər nazirini özünün quberniyalarından birinə göndərir, onun vasitəsilə həmin o quberniyaya rəhbərlik edən şəxsə açıq şəkildə təhdidedci fikirlər çatdırır. Bu da Ermənistanın bugünə qədər yürütdüyü siyasətin məntiqi nəticəsidir və Ermənistan bu gün yürütdüyü bu siyasətlə əslində Rusiya Federasiyasının subyektlərindən biri kimi tanınıb. Bütün dünya bilir ki, Ermənistanın bütün təminatları Rusiya tərəfindən həyata keçirilir. Onu da nəzərə almalıyıq ki, ən son Aİ-nin mülki missiyası adı altında qüvvələrin, xüsusən də silahlıların Ermənistana yerləşdirilməsi Rusiyaya qarşı atılmış addımdır. Bir tərəfdən Rusiyanın 102-ci bazası Ermənisandadır. Digər tərəfdən, ABŞ-la hərbi təlimlər keçlirmək adı ilə ABŞ-a aid qüvvələrin Ermənistana yerlşdirilməsi, daha sonra Aİ-nin mülki missiya adı altında qüvvələrinin Ermənistanda mövcud olması təbii ki, onun bir tərəfdən siyasi və hərbi platsdarma çevirilməsinə gətirib çıxarır, digər tərəfdən də Rusiya bunu özünə qarşı açıq şəkildə təhdid hesab edir, Ukrayna-Rusiya müharibəsinin folunda Rusiyaya qarşı ikinci cəbhə kimi dəyərləndirir. Buna da ciddi əsaslar var. Mən düşünürəm ki, hadisələr bu məcrada inkişaf edəcəyi təqdirdə Rusiya dövləti mümkün qədər Nikol Paşinyanın hakimiyyətdən getməsi üçün əlindən gələni edəcək. Təbii ki, Rusiyanın Ermənistanda, Paşinyandan əvvəlki dövrdə olduğu qədər olmasa da, hər ahlda ciddi təsiri var. Rusiya Ermənistanda vəziyyəti qarışdırmaq iqtidarındadır. Necə ki, istədiyi məqamlarda bu prosesi reallaşdırır. Hər bir halda hesab edirəm ki, bu atılan addımlar Ermənistana müsbət heç nə vəd etmir. O cümlədən də Cənubi Qafqaz regionunda müəyyən narahatlıq, gərginlik yaradır. Düşünürəm ki, bu baxımdan bu bizim üçün narahatedcci məqamdır. Amma hər halda, düşünürəm ki, istənilən dövlətin yürütdüyü siyasət onun öz iradəsi əsasında həyata keçməlidir, onun məsuliyyətin də o dövləti idarə edənlər, o xalqın özü daşımalıdır”-deyə X.Bəşirov əlavə etdi.
İradə SARIYEVA
