Avroittifaqın yox, Fransanın Qarabağ diplomatiyası rüsvay oldu, Natali Luazo “xanım”...
Avropa Parlamentinin Müdafiə və Təhlükəsizlik üzrə Alt Komitəsinin sədri Natali Luazo qurumun Qarabağdakı vəziyyətlə bağlı Xarici Əlaqələr Komitəsinin dinləmələrində bəyan edib ki, Avropa İttifaqının diplomatiyası Dağlıq Qarabağ ətrafındakı vəziyyətə effektiv reaksiya verə bilmədi:
“Biz gözümüzün qabağında hazırlanan hücumun qarşısını ala bilmədik. Ali Nümayəndə Ermənistanın Avropa Sülh Fondundan dəstək istəyini rədd edərək, müharibəyə deyil, sülhə hazırlaşmağın vacibliyini əsas gətirdi. Bununla yanaşı, Azərbaycan silahları, xüsusən də göz yumduğumuz Türkiyə və İsraildən alaraq, onsuz da böyük hərbi üstünlüyünü daha da möhkəmləndirdi. Bu gün passivliyimizə yaşıl işıq yandırdığına inanan Azərbaycan liderlərinə qarşı sanksiyalar tətbiq etməyin vaxtıdır. Hərəkətsizlik bizimlə əlaqə saxlayan hər kəs üçün bizə arxalana bilməyəcəkləri siqnalı olacaq”.
Maraqlıdır, Avroittifaqın, yoxsa Fransanın Qarabağ diplomatiyası rüsvayçı iflasa uğradı?
- “Bu, Avropa Parlamentinin yox, Fransanın məğlubiyyəti idi”
Sözügedən məsələni “Bakı-Xəbər”ə şərh edən Demokratik Dəyişim Partiyası Təşkilat Komitəsinin sədri Əli Mustafa buna bir neçə aspektdən yanaşdı: “Xanım Natali Luazonun yanaşması onu göstərir ki, Avropa İttifaqı bütövlükdə ikili standartlara, ayrıseçkiliyə meylli bir qurumdur. Yəni anlaşılan odur ki, bu qurum həqiqətən xristian klubudur. Ölkələrin suverenliyi, onların daxili işinə qarışmamaq prinsipi, ərazi bütövlüyü, sərhəd toxunulmazlığı kimi beynəlxalq prinsiplər Natali Luazo üçün əhəmiyyət kəsb etmir. O, Fransanın qərəzli siyasətinin təmsilçisi qismində mövqe sərgiləyir. Luazo ermənilərin harada olmasından asılı olmayaraq, nəyin bahasına olursa-olsun onların hüquqlarının qorunmasını özünə vəzifə hesab edir. Bunu etməyəndə də təəssüf hissi keçirir. Hesab edirəm ki, bu, Avropa Parlamentinin yox, Fransanın məğlubiyyəti idi. Ancaq Avroparlamentə də anlatmaq lazımdır ki, onların da öz səlahiyyət həddi var. Azərbaycanın, o cümlədən Aİ üzvü olmayan digər dövlətlərin daxili işinə qarışmaq beynəlxalq hüquqa, qaydalara ziddir. Ümumiyyətlə əxlaqa ziddir. Xüsusilə də ayrıca götürülən hansısa bir milləti, etnosu bütün etdiyi yaramazlıqlara, qanunsuzluqlara, cinayətlərə rəğmən, nəyin bahasına olursa-olsun müdafiə etmək qərəzlidir. Sanki onları himayəyə götürübmüşlər kimi davranmaq Avropa qurumlarının nüfuzuna xələl gətirən bir haldır. Ona görə də bütün hallarda sözügedən təşkilatlar obyektiv olmalıdır, beynəlxalq hüquq normalarından çıxış etməli və ayrıseçkilik qoymamalıdırlar. Təcavüzkarı deyil, haqlı tərəfi və daha konkret desək, təcavüzə məruz qalan tərəfi müdafiə etməlidilər. Beynəlxalq hüququn pozulmuş hüquqlarının təmin edilməsi istiqamətində fəaliyyət göstərməlidilər. Bu gün ən çox haqqı pozulan Azərbaycandır. Bizim ərazilərimiz 30 il işğal altında qalıb, yaşayış məntəqələrimiz məhv edilərək yer üzündən silinib. ATƏT-in Minsk Qrupunun, xüsusən də Fransanın qərəzli fəaliyyəti qınanmalıdır. Çünki onlar işğala göz yumdular. Həmsədrlərin hər üçünə beynəlxalq etimad olmamalıdır. Çünki onlar etimadı doğrultmurlar və yaxud da ayrıseçkiliyə yol verirlər. O üzdən, kimin nə deməsindən asılı olmayaraq, biz öz bildiyimizi etməliyik”.
Vidadi ORDAHALLI
