Ramiyyə Məmmədova: “Onun dediyi şərtlər sülh danışıqlarının mahiyyətinə uyğun deyil”
Ermənistanın hakim Vətındaş Müqaviləsi partiyasının parlament fraksiyasının katibi Artur Avanesyan keçirilən ənənəvi brifinqlərdə Ermənistan və Azərbaycanın hələ də konsensusa gəlmədiyi sülh müqaviləsi layihəsinin əsas məqamları barədə açıqlama verib.
Onun sözlərinə görə, əsas məqamlar ərazi bütövlüyünün qarşılıqlı tanınması, Dağlıq Qarabağ xalqının hüquq və təhlükəsizliyinin həyata keçirilməsi və Ermənistan Respublikasının suverenliyinin qorunmasıdır: "Bütün bunların arxasında indiki mərhələdə açıqlana bilməyən detallar var. Eyni zamanda, parlamentarin qeyd etdiyi kimi, sülh müqaviləsində Ermənistanın ərazi bütövlüyü və suverenliyinin təmin edilməsi üçün xarici mexanizmlər və təminatlar müəyyən edilməlidir”.
Göründüyü kimi, Ermənistan rəsmisi yenə “ağ yalan” danışır. Əvvəla, Azərbaycan Erməmistanın ərazi bütövlüyünü tam şəkildə tanıdığını bəyan edib. İkincisi, Ermənistanın suverenliyi üçün biz dövlət olaraq heç bir təhlükə yaratmırıq. Qarabağdakı ermənilərin hüquq və təhlükəsizliyi ilə bağlı məsələnin isə sülh sazişində müzakirəsinə Azərbaycan konkret olaraq razı deyil. Heç sazişin mətnində belə, buna bənzər nəyəsə işarə edilməsini qəbul etmir. Belə olan təqdirdə Ermənistan rəsmiləri niyə belə yalan danışır?
Politoloq Ramiyyə Məmmədova “Bakı-Xəbər”ə açıqlamasında bildirdi ki, Azərbaycan Prezidenti və Ermənistanın baş nazirinin dəvət olunduğu Praqada 1991-ci il Alma-Ata Bəyannaməsini tanıdıqlarını bildirən bəyanat imzalayanda ərazi bütövlüyünün qarşılıqlı tanınması ilə bağlı bütün məsələlər bağlandı: “Beləliklə, Ermənistanın baş naziri Dağlıq Qarabağ regionunun Azərbaycanın tərkib hissəsi kimi tanınmasına dair sənədi imzaladı.
Qarabağda müharibə üç il əvvəl başa çatıb. Ermənistan Bakının demək olar ki, bütün tələbləri ilə razılaşıb, əvəzində Qarabağ ermənilərinə təhlükəsizlik zəmanəti verilməsini tələb edib. Bakı bəyan edir ki, onlar Azərbaycan vətəndaşları ilə eyni hüquqlara malik olacaqlar.
2020-ci il müharibəsindən sonra münaqişə tərəfləri dəfələrlə danışıqlar masası arxasına əyləşiblər, hətta bəzən elə görünüb ki, sülh müqaviləsinin imzalanması yaxındadır. Azərbaycan sülh sazişinin şərtləri kimi Ermənistana beş bənd təklif edib: sərhədlərin qarşılıqlı tanınması, ərazi iddialarının olmaması, hərbi güc tətbiqindən və təhdidindən imtina, sərhədlərin demarkasiyası və nəqliyyat kommunikasiyalarının açılması.
Ermənistan tərəfi sazişə Qarabağda yaşayan ermənilərin təhlükəsizliyinə zəmanət verən beynəlxalq mexanizmlərin yaradılması ilə bağlı bənd əlavə etmək istəyir. Elə bu bənddə tərəflərin fikirləri üst-üstə düşmür.
Prezident İlham Əliyev kifayət qədər birmənalı şəkildə ifadə edib:"Qarabağ erməniləri ya Azərbaycan pasportunu almalıdırlar, ya da bölgəni tərk etməlidirlər”. Üstəlik, məmurlar dəfələrlə bildiriblər ki, pasportla birlikdə Qarabağ ermənilərinə Azərbaycanın digər vətəndaşlarının sahib olduğu hüquqları da verirlər. Ancaq Ermənistan bu proseslərdən yayınır. İndi də cəfəng şərtlərdən danışlrlar. Avanesyan məsələnin mahiyyətini bilərəkdən təhrif edir. Onun dediyi şərtlər sülh danışıqlarının mahiyyətinə uyğun deyil”.
Məhəmmədəli QƏRİBLİ
