Iyunun 5-də Bakı Ağır Cinayətlər Məhkəməsi Azərbaycanın Koreya Respublikasındakı Səfirliyində maliyyə məsələləri üzrə attaşe işləmiş Nəcib Osmanovu 6 il həbsə məhkum edib.
Osmanovun barəsindəki başqa yerə getməmək haqqında iltizam qətimkan tədbiri dəyişdirilib və o, məhkəmə zalında həbs olunub. Sabiq attaşe külli miqdarda mənimsəmədə, vəzifə səlahiyyətlərindən sui-istifadədə, vəzifə saxtakarlığında günahlandırılır.
Osmanov təqsirli olduğunu, əməlindən peşmançılıq keçirdiyini deyib. O, mərc oyunlarının aludəçisi olduğu üçün bu yola əl atdığını bildirib.
İttihama görə, Nəcib Osmanov 2021-ci ilin mayından 2022-ci ilin fevral ayına qədər səfirlik və səfirliyin işçilərinin kommunal, sığorta ödənişləri üçün ayrılan 347 min manat vəsaiti internet üzərindən mərc və qumar oyunlarına yönəldib. Ödəniş tapşırıqlarını səfirə möhürlətdirib təsdiqlətdirdikdən sonra vəsaitləri bankdan çıxarıb. Lakin həmin pullar təyinatı üzrə xərclənməyərək mərc oyunlarına yönləndirilib.
Diplomatik korpuslarımızda belə tərbiyədə olan adamlar necə işləyə bilir? Elmar Məmmədyarovun dönəmindən qalan yarıtmaz səfirlik işçiləri ilə bağlı hansı addımlar atılmalıdır ki, diplomatiyamızın adına xələl gəlməsin?
Sosial Strateji Tədqiqatlar və Analitik Araşdırmalar Birliyinin sədri İlqar Hüseynli “Bakı-Xəbər”ə açıqlamasında bildirdi ki, belə neqativliyi biz yalnız diplomatik korpusumuzda görmürük: “Yaxın keçmişdə biz keçmiş MTN-in rəhbər işçilərinin, Mədəniyyət Nazirliyinin rəhbərliyində təmsil olunanların, rüşvət alarkən birbaşa kabinetində yaxalanan icra başçılarının da külli miqdarda dövlət əmlakını necə taladığının şahidi olmuşuq. Bu, kadrların düzgün seçilməməsi ilə bağlı olan məsələdir. Həm də bir-birinə nəzarət edən qurumların zəif fəaliyyətinin nəticəsidir. Bir çox qurumlarda kadrlar qohumluq əlaqələrinə görə yerləşdirilir. Belə olan təqdirdə, bu cür amillər ortaya çıxmış olur. Dövləti təmsil edən kadrlar həqiqətən tutduğu vəzifəyə layiqli olmalıdır. Diplomatik idarəetmə metoduna keçidlə bağlı lazımi addımlar atılandan sonra ölkədə bu tip hallara az rast gəlinəcək. Bu hal bizim diplomatiyamızdakı növbəti uğursuzluqdur. Bundan əvvəl biz sabiq nazir Elmar Məmmədyarovun ABŞ-da dəyəri 4-5 milyon dollar olan mülklərinin şahidi olmuşduq. Necə olur ki, bu cür adamların övladları belə varidata yiyələnə bilir? Bütün bu cür hallarla ciddi mübarizə aparılmalı, idarəetmədə dünyada tətbiq olunan metodologiyadan istifadə edilməlidir. Dövlət büdcəsi müxtəlif izafi xərclər adı ilə talanır. Maliyyə Nazirliyi bu işə ciddi nəzarət etməlidir. Dərhal bilinməlidir ki, şişirdilmiş büdcə korrupsiyaya yol açmış olur. Diplomatik korpuslarımız bizim ölkənin xaricdəki siması, təmsilçisi sayılır. Belə kadrlar həm də bizim dövlət imicinə mənfi mənada zərbə vurmuş olurlar.
Korrupsiya ilə mübarizə aparmaq üçün ölkədə mütləq oalaraq müstəqil məhkəmə hakimiyyəti, icra hakimiyyəti üzərində güclü parlament nəzarəti, azad media və fəal vətəndaş cəmiyyəti olmalıdır.
Korrupsiyanın azaldılması üçün ən yaxşı vasitə idarəçilik sisteminə şəffaflıq və hesabatlılıq prinsiplərinin daxil edilməsidir. Çünki vəzifəli şəxs bilsə ki, vətəndaşlar onun fəaliyyəti haqqında informasiyanı asanlıqla əldə edə biləcək (şəffaflıq) və bunun arxasınca da mütləq cəza tətbiq olunacaq (hesabatlılıq), öz səlahiyyətlərindən sui-istifadə etməkdən çəkinəcək”.
Məhəmmədəli QƏRİBLİ
