Türk dövlətləri Quranın müdafiəsi ilə bağlı birgə fəaliyyətdə qərarlaşdılar...
Türk dövlətləri arasında inteqrasiyanın daha da güclənməsinə, əməkdaşlığın dərinləşməsinə xidmət edən Türk Dövlətləri Təşkilatının (TDT) rolu misilsizdir. Biz bunu bir çox məsələlərdə yaxından müşahidə edirik.
Prezidenti İlham Əliyevin təşəbbüsü ilə martın 16-da Ankarada keçirilmiş Türk Dövlətləri Təşkilatının Dövlət Başçılarının Fövqəladə Zirvə görüşü keçirildi və bu görüşdə Bəyannamə qəbul olundu.
Bəyannamənin 13-cü maddəsində “Bütün müsəlmanları incidən və gələcəkdə yeni irqçi, ksenofob və islamofob təxribat və hücumlara yol aça biləcək müqəddəs kitabımız Qurani-Kərimə qarşı son vaxtlar nifrət zəminində törədilən cinayətləri ən kəskin şəkildə qınadılar” fikri əksini tapıb.
Bilindiyi kimi, Ankarada keçirilən TDT-nın fövqəladə zirvə toplantısında yekun bəyannamə qəbul edilib və bəyanatda Quranın təhqir olunmasına qarşı birgə müqavimət hərəkatı barədə maddə əks olunub. Qərb dünyasında, xristian aləmində islam dini dəyərlərinə qarşı aqressiv siyasətin qarşısının alınmasında türk dövlətlərinin bu birliyi necə rol oynayacaq?
- Ceyhun Məmmədov: “...Qurani-Kərimi təhqir edən, Peyğəmbərin karikaturasını çəkən, islamofob, ksenofob təxribatları yayan Fransa və onun kimi ölkələrə, qüvvələrə bir mesaj idi”
Millət vəkili Ceyhun Məmmədov bizimlə söhbətində bildirdi ki, Avropa İttifaqı ölkələri sırasında ən çox müsəlmanın yaşadığı Fransa islamofobiyanın ən çox təzahür etdiyi ölkədir. O vurğuladı ki, özünü demokratik dəyərlərin və mədəniyyətin vətəni hesab edən bu ölkədə insan hüquqları ciddi şəkildə pozulur.
C.Məmmədovun sözlərinə görə, Azərbaycan Prezidentinin təşəbbüsü ilə TDT-nın Ankarada keçirilən fövqaladə zirvə görüşündə bu məsələyə xüsusi yer ayrılması müsbət haldır. O qeyd etdi ki, bəyannaməni imzalayan dövlət başçılarının Qurani-Kərimə qarşı son vaxtlar nifrət zəminində törədilən cinayətləri ən kəskin şəkildə qınaması bu yöndə aqressiv siyasət aparan dövlətlərə bir mesajdır. “Bu gün Fransada müsəlmanların öz dini ayinlərini yerinə yetirmələri üçün şərait yaradılmır və məhdudiyyətlər qoyulur. İslamofobiyanın Fransa Prezidenti Makronun təfəkküründə, düşüncəsində özünə möhkəm yer tutdur. Azərbaycana qarşı qərəzli yanaşmanın kökündə də Fransada geniş yayılmış islamofobiya dayanır... İslam dünyasının nüfuzlu simalarından olan Məhəmməd peyğəmbərin şəxsiyyəti Fransada dəfələrlə təhqir olunub, karikaturası çəkilib. Bu, İslam aləminə təhqirdir. Peyğəmbər təhqir olunur, Fransa isə bu hadisəni ölkədəki insan hüquqları, mətbuat azadlığı və digər amillərlə əsaslandırmağa çalışır. Fransanın bəzi mətbuat orqanlarının zaman-zaman Türkiyə ilə bağlı qərəzli yanaşmaların da şahidi oluruq. Fransanın antitürk, antimüsəlman mövqeyi ilə seçilən “Charlie Hebdo” jurnalı qardaş ölkədə dağılan binaların, çevrilmiş avtomobillərin karikaturasını paylaşmışdı. Bu hərəkət insanlıqdan uzaq yanaşmadır. Fransanın bu yanaşması haqlı olaraq hiddət doğurdu”.
C.Məmmədov hesab edir ki, məsələnin bu platformada da aktual saxlanılması, türk dövlətləri tərəfindən islamofobiyaya qarşı birgə mübarizə aparılması mütləq mənada öz effektini verəcək. “Bu zirvə görüşündə qəbul edilən bəyannamədə islamofobiyaya, Quranın təhqir edilməsinə və sair qarşı birgə mübarizənin də öz ifadəsini tapması zəruri idi və bu öz təsirini göstərəcək. Əlbəttə, bu “Qurani-Kərimi təhqir edən, Peyğəmbərin karikaturasını çəkən, islamofob, ksenofob təxribatları yayan Fransa və onun kimi ölkələrə, qüvvələrə bir mesaj idi. Hesab edirik ki, onlar bundan nəticə çıxmalıdırlar”-deyə deputat qeyd etdi.
- Samir Adıgözəlli: “TDT-nin bir türk qurumu olaraq bu məsələ ilə bağlı da ortaya iradə qoymasının ciddi nəticələr verəcəyinə inanıram”
İSBAM sədri Samir Adıgözəlli hesab edir ki, tək əldən səs çıxmaz, bu mənada TDT-nın qəbul etdiyi sənəddə islamofobiya kimi hallara qarşı birgə mübarizə effekt verəcək. “Bu gün bir çox Qərb ölkələrində islam dininə, Qurani-Kərimə qarşı düşmən münasibət bəsləndiyinin şahidi oluruq. Fransa başda olmaqla belə ölkələrdə islama, Qurana qarşı həqarət kampaniyası aparılır, dinimiz və müqəddəs kitabımız təhqir olur, Peyğəmbəri təhqir edənlər, Quranı yandıranlar tapılır.
TDT-nin bəyannaməsində müxtəlif məsələlər, o cümlədən də Qurani-Kərimin müdafiəsi ilə bağlı maddə əks olunubş Bu gün doğurudan da Qurani-Kərimin müdafiəsinə zərurət var. İslamofobiyaya qarşı birgə mübarizənin aparılması çox vacib idi və müasir dünya ilə ayaqlaşan bir qərar oldu. Əlbəttə, artıq Qərb dünyası, xüsusən də Fransa görür ki, türk dünyası Peyğəmbərin və Qurani Kərimin müdafiəsində də, islamofobiyaya qarşı mübarizədə də birləşiblər, təbii olaraq geri çəkiləcək. Bilirsiz ki, hazırda islamofobiya geniş yayılıb və hətta təhlükəli vəziyyətlər yaranmasına səbəb olub. TDT-nin bir türk qurumu olaraq bu məsələ ilə bağlı da ortaya iradə qoymasının ciddi nəticələr verəcəyinə inanıram. Hesab eidrəm ki, bu istiqamətdə ərəb dünyası da, digər müsəlman ölkələr də, islam təşkilatları da ciddi dəstək verməlidir” - deyə S.Adıgözəlli qeyd etdi.
İradə SARIYEVA
