Mirkazım Seyidov: “Yeganə çıxış yolu yalnız Azərbaycanın tələbləri və şərtləri ilə barışmağa qalıb”
Ermənistan baş naziri Qarabağdakı erməniləri “qorumaq” üçün ortaya yeni tezis atıb. O bildirib ki, hakimiyyət, müxalifət, cəmiyyət, xaricdəki erməni diasporu beynəlxalq ictimaiyyətin diqqətini Dağlıq Qarabağ ermənilərinin hüquqlarının pozulmasına yönəltmək üçün birgə fəaliyyətini davam etdirməlidir:
“Azərbaycan dünya ictimai rəyini inandırmağa çalışır ki, Laçın dəhlizi bağlanmamalı, qaz və elektrik enerjisi kəsilməməlidir. Baş nazir qeyd edib ki, erməni tərəfi bunun əksini sübut edib. Hesab edirəm ki, bu ziddiyyəti həll etməyin ən yaxşı yolu beynəlxalq tədqiqat qrupunun Laçın dəhlizinə və Dağlıq Qarabağa göndərilməsidir. Və biz bu istiqamətdə daim çalışmalıyıq. Ümumiyyətlə, regionda bütün məsələlərin sülh yolu ilə həlli alternativi yoxdur”.
Maraqlıdır ki, Paşinyanın erməni diasporu ilə münasibətləri olduqca gərgin olub. Hətta hakimiyyətinin ilk illərində o, diaspor üzrə fəaliyyət göstərən dövlət qurumunu da ləğv etdi. Xaricdəki erməni diasporunun nümayəndələri isə öz açıqlamalarında bildirdilər ki, erməni diasporunun göndərdiyi pulları Paşinyan və onun hakimiyyəti mənimsəyir. Belə olan təqdirdə Paşinyan diasporla digər təsisatların yeni konsolidasiya modelini təklif edir. Buna nail ola biləcəkmi?
Diaspor fəaliyyəti üzrə ixtisaslaşan ictimai-siyasi xadim Mirkazım Seyidov “Bakı-Xəbər”ə açıqlamasında bildirdi ki, 2018-ci ildəki hakimiyyət dəyişikliyinə və Nikol Paşinyanın iqtidara gəlməsinə qədər diasporla Ermənistan dövləti arasında hər hansı ciddi böhran və ya anlaşılmazlıq müşahidə olunmayıb: “Paşinyanın hakimiyyətə gəlməsindən sonra yaranan soyuqluq 2020-ci ildəki Qarabağ müharibəsindən sonra Ermənistan və diaspor qüvvələri arasındakı münasibətlərin kəskinləşməsi ilə davam etdi. Beləliklə, münasibətlərdə uçurum yarandı. Seçkilərdən sonra formalaşacaq hökumət kabinetində Diaspor Nazirliyinin olmayacağı və bu qurumun ləğv ediləcəyi açıqlandı. Bu qərar erməni diasporunda şok effekti yaratdı. Nikol Paşinyan “diaspora qarşı vəfasızlıq” etməkdə ittiham olundu. Yeni hakimiyyət müxtəlif ölkələrdəki diaspor təşkilatları tərəfindən tənqid atəşinə tutuldu. Qəzəbli diaspor iqtidarın qərarını dəyişdirmək üçün geniş kampaniyalara başladı. Nazirliyin ləğv edilməməsi üçün qalaq-qalaq məktublar, ictimai müraciətlər göndərildi. Bu azmış kimi, diaspor cəmiyyətin və müxalif siyasi qüvvələrin Paşinyan hakimiyyətinə qarşı təpki göstərməsinə çalışdı. Müharibədəki məğlubiyyətdən sonra Paşinyanın hakimiyyətinin mövqeləri zəiflədi. Sözsüz ki, diaspor bundan istifadə edərək öz mövqeyini gücləndirməyə çalışdı. Xüsusən diaspor təşkilatları tərəfindən külli miqdarda pulların, böyük məbləğdə ianələrin toplandığı “Hayastan” ümumerməni xeyriyyə fondunun vəsaitlərinin mənimsənilməsi ilə bağlı skandaldan sonra, fondun qeyri-şəffaf idarə edilməsi əsas gətirilərək edilən yardımlardan imtina olunması münasibətlərdəki gərginliyi pik həddə çatdırdı. Erməni diasporunun nümayəndələri müharibədəki məğlubiyyətin əsas səbəbkarının məhz Nikol Paşinyan olduğunu iddia edərək, onu satqınlıqda və xainlikdə günahlandırdılar. Müxtəlif ölkələrdəki diaspor təşkilatları ortaq bəyanat imzalayaraq Paşinyanın istefasını tələb etdilər.
Lakin 2021-ci ildəki erkən seçkilərdən sonra hakimiyyətini qorumağı bacaran Nikol Paşinyan diaspora qarşı yenidən revanş götürdü. Belə anlaşılır ki, rəsmi Bakı Ermənistanı və erməni separatçı-terrorçuları çıxılmaz vəziyyətə sala bilib. Üstəlik, erməni diasporu da beynəlxalq səviyyədə iflasa uğramış durumdadır. Yəni “erməni nağılları”na, yalançı gözyaşlarına dəstək veriləcəyi də artıq qətiyyən inandırıcı görünmür. Yeganə çıxış yolu yalnız Azərbaycanın tələbləri və şərtləri ilə barışmağa qalıb”.
Məhəmmədəli QƏRİBLİ
