Minsk Qrupu həmsədrlərinə misilsiz dəqiq diaqnoz - “münaqişəni əbədiləşdirmək istəyənlərin aləti”...
“Minsk qrupu bu münaqişənin əbədi olmasını istəyənlərin əlində alətə çevrildi”. Prezident İlham Əliyev Qoşulmama Hərəkatı Parlament Şəbəkəsinin Bakı konfransında çıxışında belə deyib.
Ölkə başçısının sözlərinə görə, ədaləti, beynəlxalq hüququ bərpa edə bilməməyin nə olduğunu yaxşı bilirik: “Biz bunları bərpa edə bilməməyin, başqalarından asılı olmağın nə olduğunu yaxşı bilirdik. Biz uzun illər, təqribən 30 il ərzində bunu gözləyirdik. Gözləyirdik ki, beynəlxalq ictimaiyyət ədalətsizliyə və işğala son qoyulmasına yardım edəcək. Bu məqsədlə ATƏT 1992-ci ildə Minsk Qrupunu təsis etdi və o, bu münaqişənin həll yolunu tapmalı idi. Yəni, işğala son qoyulmalı idi. Əksinə, Minsk qrupu bu münaqişənin əbədi olmasını istəyənlərin əlində alətə çevrildi. Bu gün Azərbaycanın münaqişəni həll etməsindən, işğala son qoymasından, özünün ərazi bütövlüyünü hərbi-siyasi yollarla bərpa etməsindən sonra Minsk Qrupuna ehtiyac yoxdur. Biz Minsk Qrupuna artıq əlvida demişik. Təəssüflər olsun ki, Ermənistan və digərləri onu həyata qaytarmağa çalışır. Lakin bu, mümkünsüzdür. O, artıq ölüb. İşğaldan əziyyət çəkmiş ölkə kimi biz bunu açıq şəkildə bəyan edirik. Düşünürəm ki, ATƏT-in Minsk Qrupu ilə bağlı hər hansı spekulyasiya nəinki qeyri-məhsuldardır, eyni zamanda, regionda mümkün sülhün bərqərar olması üçün dağıdıcı təsirə malikdir”.
Ötən müddət ərzində Minsk Qrupu bütün vasitələrlə çalışdı ki, Qarabağ məsələsi dondurulmuş vəziyyətdə qalsın.
- “Azərbaycan xalqı, dövləti münaqişəni əllərində alətə çevirən siyasi dairələri çox yaxşı tanıdı”
Məsələyə münasibət bildirən AMİP-in sədr müavini Afsəddin Nəbiyevin fikrincə, Minsk qrupu yarandığı gündən münaqişənin davam etdirilməsinə çalışıb: “1990-cı illərdə Ermənistanın Azərbaycana qarşı yürütdüyü işğalçılıq siyasəti dövrlərində ATƏT-in Minsk qrupuna münaqişənin ədalətli və sülh yolu ilə həll olunacağına xalqımızın böyük inamı vardı. Ancaq çox təəssüflər olsun ki, Azərbaycan xalqı və dövləti fəaliyyəti dövründə bu qurumun münaqişənin sülh yolu ilə həll olunması yolunda heç bir əməli addımının şahidi olmadı. Bəli, xalqımız beynəlxalq hüququn aliliyinə inanırdı. Onsuz da bu münaqişənin hər hansı bir həll formulu baş verəcəkdi. Azərbaycan xalqı səbr və təmkinlə bu qaynar ocağın dinc yollarla "sönməsi" üçün misli görünməyən iradə nümayiş etdirdi. Xalqımız ATƏT-in Minsk Qrupuna az qala əsrin üçdə biri qədər, bir qərinəlik dövrü - 30 ilə yaxın ona etimad etdi. Ancaq beynəlxalq güclərin siyasi maraqları bu münaqişənin dinc yollarla təmin olunmasına heç bir şans buraxmadı. Nəhayət 27 sentyabr 2020-ci ildə Azərbaycan xalqı son yüzilliklərin tarixində böyük birlik və bərabərlik nümayiş etdirərək düşmənin sözdən anlamadığını bütün dünyaya sübut etdi. "Dəmir Yumruq" düşmənin başına elə çırpıldı ki, onlar bu tarixi uzun illər hafizələrindən silə bilməyəcəklər. Artıq nəinki Minsk qrupu, digər beynəlxalq təşkilatlar da siyasi "aşınmaya" məruz qalıblar. Əgər bu iddialarımız doğru deyilsə, bəs bu gün də gözlərimiz önündə baş verən müharibələr, hərbi toqquşmalar nədən davam etməkdədir?”.
A.Nəbiyev hesab edir ki, belə qurumları ümumiyyətlə yaxın buraxmaq doğru deyil: “Ona görə də Azərbaycan xalqı, dövləti münaqişəni əllərində alətə çevirən siyasi dairələri çox yaxşı tanıdı. Elə cavabları da yaxşı verildi. Ölü bir qurum heç kimə gərək deyil. Əgər bir qurum 30 illik fəaliyyəti dövründə heç bir əməli addım atmağı bacarmadısa, artıq o, Azərbaycan xalqı və dövləti üçün mövcud deyil. Oma görə də ölkə rəhbərliyi, xarici işlər nazirimiz yüksək tribunalardan bu qurumun yerini açıq şəkildə göstərdilər. Biz ölkə rəhbərliyinin bu addımlarını yüksək qiymətləndiririk. Minsk qrupu pensiyadadır. Ona görə də dincəlsinlər”.
Sədr müavini onu da əlavə etdi ki, bundan sonra Minsk qrupunun bərpası mümkünsüzdür.
Vidadi ORDAHALLI
