Əli Əlirzayev: "Vergilər Nazirliyinin bu siyasəti ölkənin iqtisadi inkişafına xidmət edir"
Xəbər verildiyi kimi, ötən həftə Vergilər Nazirliyində "Azərbaycan Respublikası Hökuməti və Danimarka Krallığı Hökuməti arasında gəlirlərə görə vergilərə münasibətdə ikiqat vergitutmanın aradan qaldırılması və vergidən yayınmanın qarşısının alınması haqqında Konvensiya"nın imzalanması mərasimi keçirilib.
O da məlumdur ki, son illər ölkəmizin ikiqat vergitutmanın aradan qaldırılmasını nəzərdə tutan sazişlər şəbəkəsi əhəmiyyətli dərəcədə genişlənib. Bu günə kimi 52 ölkə ilə müvafiq sazişlər imzalanıb. Bunlardan 48-i artıq qüvvəyə minib, qalanları isə müvafiq prosedurlar tamamlandıqdan sonra qüvvəyə minəcək.
İkiqat vergitutmanın aradan qaldırılması haqqında sazişlərin əsas məqsədi mal və xidmətlərin sərbəst beynəlxalq mübadiləsinə maneçilik törədən vergi maneələrinin aradan qaldırılması yolu ilə beynəlxalq ticarət və sərmayə qoyuluşunu təşviq etməkdir. Beynəlxalq vergi müqavilələrinin mövcudluğu vergi ödəyicilərinə münasibətdə ayrıseçkiliyə yol verilməyəcəyinə təminat verir. Dövlətlər üçün isə bu, ziddiyyətli məsələlər üzrə birbaşa qarşılıqlı məsləhətləşmələrin aparılmasına və vergi məlumatlarının mübadiləsinə imkan yaradır.
İkiqat vergitutmanın aradan qaldırılmasını nəzərdə tutan sazişlər hazırlanarkən, ilk növbədə, ölkəmizin iqtisadi əlaqələrinin geniş olduğu dövlətlərə xüsusi diqqət yetirilir. İndiyədək imzalanmış müqavilələrdən 23-ü Avropa İttifaqına üzv ölkələri, digər müqavilələr isə respublikamızın əsas xarici ticarət tərəfdaşlarını, iqtisadi əlaqələrimizin mövcud olduğu və ya iqtisadi maraq doğuran dövlətləri əhatə edir.
Bütövlükdə, ekspertlər ikiqat vergitutmanın ləğv edilməsinin iqtisadiyyat üçün hansı pozitiv nəticələr verdiyi qənaətindədir?
Məsələyə münasibət bildirən iqtisadçı-alim Əli Əlirzayevin sözlərinə görə, Vergilər Nazirliyinin bu siyasəti ölkənin iqtisadi inkişafına xidmət edir. O bunu bir sıra arqumentlərlə əsaslandırdı: "İkiqat verginin ləğv olunması düzgün siyasətdir. Mümkün olan qədər bundan qaçmaq lazımdır. Ona görə ki, ikiqat vergitutma qiymətlərin daha da artmasına xidmət edir. Nəzərə almaq lazımdır ki, biz həm idxal edən, həm də ixrac edən ölkəyik. İkiqat vergi olanda hər iki ölkədə vergi tutulur. Nəticədə məhsulun qiyməti baha başa gəlir. Bu zaman ixracatçı ölkə qarşı tərəfə mal satmaqda maraqlı olmur. Çünki bu, nəticə etibarilə, bazarın əldən çıxmasına gətirib çıxarır. Bu səbəbdən bir ölkə digər ölkəyə sanksiya tətbiq edir, mal ixrac etmir və s. Ona görə də ikiqat verginin ləğvini genişləndirmək lazımdır. O mənada ki, daha çox ölkə ilə belə bir saziş imzalanmalıdır. Azərbaycanın bu istiqamətdə fəaliyyətini genişləndirməsi iqtisadi-ticarət əlaqələrində mübadiləni artıracaq. Bu, ölkənin iqtisadi inkişafına müsbət təkan verəcək".
Vidadi ORDAHALLI
