Akif Nəsirli: “Qapalı şəraitdə saxlanılan heyvanın maya dəyəri yüksək olur”
Bu ilin yanvar ayında Azərbaycan xaricdən diri ətlik heyvan idxalını kəskin artırıb. Dövlət Statistika Komitəsinin məlumatına əsasən, ölkəmizə 7646 baş diri iribuynuzlu ətlik heyvan idxal olunub.
Bu idxal üçün xaricə çıxarılan vəsaitin həcmi isə 6 milyon 506,85 min dollara bərabər olub. İribuynuzlu heyvanların 4967 başı Rusiyadan, 1790 başı Qazaxıstandan, 889 başı Gürcüstandan alınıb. Ötən ilin müvafiq dövründə isə xaricdən 2 milyon 646,92 min dollar dəyərində 3128 baş ətlik iribuynuzlu heyvan gətirilib.
Görəsən, cari il ərzində idxalın iki dəfəyə qədər artmasının səbəbləri nədir? Heyvandarlığın inkişafı və idxaldan asılılığı azaltmaq üçün hansı addımlar atılmalıdır?
“Heyvandarlıqla məşğul olan əhalinin öz heyvanlarını örüş ərazilərinə aparmasına və heyvanların bəslənməsinə imkan verilməlidir”
Liberal İqtisadçılar Birliyinin sədri Akif Nəsirli “Bakı-Xəbər”ə şərhində bildirdi ki, ət istehsalı ildən-ilə kəskin şəkildə azalır. 2000-ci ildən başlayaraq ölkədə heyvandarlıq sıxışdırılmağa başladı: “Məlumdur ki, 2000-ci ildə bələdiyyələr formalaşdı və heyvandarlıq üçün nəzərdə tutulan örüş sahələrinin bir hissəsi bələdiyyələrin balansına keçdi. Bələdiyyələr də həmin sahələri müxtəlif adamlara uzun müddətli icarəyə və ya fərqli məqsəd üçün verdilər. Bununla da örüş sahələrinin bir hissəsini bələdiyyələr zəbt edərək məhv etdi. Daha sonra 2015-ci ildə pambıqçılıq strateji məhsul elan edildi və yem bitkiləri üçün olan sahələrin bir hissəsi pambığa verildi. Həmçinin, Dövlət Fonduna aid olan torpaqlarda yerləşən örüş sahələrinin də bir hissəsi pambıqçılığa ayrıldı. 2018-ci ildə isə ölkədə aqroparklar yaradıldı. Bu aqroparklar tamamilə Dövlət Fonduna aid olan torpaqlarda yaradıldı və beləliklə qalan örüş sahələri də məhv oldu. Bununla da ölkədə örüş sahələri maksimum dərəcədə məhdudlaşdırıldı. Bu səbəbdən də heyvandarlıqla məşğul olanlar qapalı şəkildə bu işi icra etməyə davam etdilər. Hazırda rayon mərkəzlərində məhdud sayda heyvan saxlanılır, bəslənilir. Bu isə o deməkdir ki, örüş sahələri olmadığı üçün heyvanlar qapalı şəraitdə saxlanılır. Qapalı şəraitdə saxlanılan heyvanın maya dəyəri yüksək olur. Belə ki, heyvana daim su, yem, ot vermək lazımdır. Bu səbəbdən də heyvan ətinin satış qiyməti yüksəlir. Heyvandarlıqla məşğul olan əhalinin öz heyvanlarını örüş ərazilərinə aparmasına və heyvanların bəslənməsinə imkan verilməlidir”.
Həmsöhbətimiz onu da əlavə etdi ki, ölkə daxilində heyvandarlığı inkişaf etdirmək üçün idxaldan asılılığa son qoymaq lazımdır: “İşğaldan azad edilən torpaqlarda heyvandarlığın inkişafı üçün münbit şərait var. Hesab edirəm ki, həmin ərazilərin minadan tez bir zamanda təmizlənməsi ilə heyvardarlıq sahəsi inkişaf edə bilər. Onu da deyim ki, diri heyvanların satış qiymətinin yüksək olmasının səbəblərindən biri yanacaqla bağlıdır. Son 15 ildə dizel yanacağının qiyməti 5 dəfə artıb. Yanacağın qiymətinin qalxması bütün kənf təsərrüfatı məhsullarının dəyərinə təsir edir”.
Günel CƏLİLOVA
