“2021-ci il üzrə müəllimlərin işə qəbulu imtahanında təqdim edilən test tapşırıqları ilə bağlı çox ciddi narahatlıqlar və narazılıqlar var”
2021-2022-ci tədris ili üzrə müəllimlərin işə qəbulu müsabiqəsində iyulun 23-də Azərbaycan dili və ədəbiyyat fənni üzrə test imtahanı keçirilib. İmtahanda 3 min 288 namizəd iştirak edib.
Qeyd edək ki, mövcud pandemiya şəraitini nəzərə alaraq müsabiqənin test imtahanı mərhələsi Bakı, Abşeron, Sumqayıt, Gəncə, Masallı, Ağcabədi, Şirvan, Balakən, Quba, Şamaxı, Mingəçevir və Kürdəmirdə yaradılmış müvafiq imtahan mərkəzlərində keçirilir. Müəllimlərin işə qəbulu üzrə Azərbaycan dili və ədəbiyyat fənni test imtahanında iştirak edənlər imtahana salınan sualların məntiqsiz olduğunu iddia edirlər. Müəllimlərdən biri gülünc hesab etdiyi MİQ imtahanı suallarından birini öz sosial şəbəkə hesabında paylaşıb. Sualda deyilir: Hüseyn Cavidin “Ana” əsərində Qanpolad həbsxanadan çıxıb evə gələndə hansı rəngdə paltar geyinmişdi və materialı nə idi? Bu və buna bənzər bir sıra suallar müəllimlər arasında narazılığa səbəb olub.
İmtahanda iştirak edən müəllimlərin bir qismi iddia edir ki, testə düşən sualların əksəriyyəti yuxarıda qeyd etdiyimiz kimi məntiqsizdir.
Məsələ ilə bağlı fikir bildirən təhsil eksperti Kamran Əsədov qeyd etdi ki, müəllimlərin işə qəbulu imtahanı son 12 il ərzində ölkə təhsilində şəffaf şəkildə həyata keçirilən bir prosesdir: “Məhz bu müsabiqə nəticəsində imtahan iştirakçıları heç bir kənar müdaxilə olmadan orta ümumtəhsil məktəblərində işə qəbul olunurlar. Azərbaycan təhsilinin inkişafında MİQ-in çox böyük rolu var. Azərbaycan təhsilində islahatların başında birinci yerdə müəllimlərin işə qəbulu imtahanlarının mərkəzləşdirilmiş qaydada keçirilməsi durur”.
Həmsöhbətimiz onu da əlavə etdi ki, 2021-ci il üzrə müəllimlərin işə qəbulu imtahanında təqdim edilən test tapşırıqları ilə bağlı çox ciddi narahatlıqlar və narazılıqlar var: “Azərbaycan dili və ədəbiyyat fənnindən təqdim edilmiş test tapşırıqları birmənalı şəkildə bilik və bacarıqları yox, yaddaşı yoxlayan test tapşırıqları idi. Burada təkcə bilik deyil, eyni zamanda psixoloji-metodiki bacarıqlar da yoxlanılır. Müəllimlərin işə qəbulu üzrə keçirilən imtahanda təqdim edilmiş suallar təsadüfi seçilmiş suallar və ya təsadüf nəticəsində doğru cavablana biləcək suallar olmamalıdır”.
Günel CƏLİLOVA
