Azərbaycanın Qarabağ bölgəsindəki qondarma qurum özünü buraxdığını elan edib. Bu barədə qondarma quruma rəhbərlik etmiş Samvel Şahramanyan qərar verib.
Qərara əsasən, qondarma rejimin bütün qurumları və təşkilatları fəaliyyətini dayandırır. Bununla da "Dağlıq Qarabağ Respublikası" öz mövcudluğuna son verir. Bu problemin həllinin postsovet məkanında olan digər separatçı münaqişələrin həllinə hansı təsiri var?
Politoloq Yeganə Hacıyeva “Bakı-Xəbər”ə açıqlamasında bildirdi ki, yalnız qondarma qurumun buraxılması deyil, ümumilikdə Qarabağda gedən proseslərin Azərbaycanla yanaşı bütün postsovet məkanında olan bənzər konfliktlərin hər birinə faydası var:
“Həmin məkanlardakı ərazi bütövlüyü və süverenliyin təminatı üçün presedent rolunu oynayır. Bu qədər həssas regionda separatçı qurum kənar qüvvələr üçün yuva rolunu oynayırdı. 30 ilə yaxındır ki, həmin ərazi üzərindən qeyri - qanuni daşınmalar həyata keçirilirdi. Bu proseslər artıq dayanıb. Baş verən prosesləri regional və Avrasiyanın təhlükəsizliyinə verilən töhfə kimi dəyərləndirə bilərik. Çox təəssüflər olsun ki, biz bəzi güclər tərəfindən separatizmin dəstəkləndiyinin şahidi oluruq. Bizi əsassız olaraq Qarabağda etnik təmizləmə aparmaqda günahlandırırlar. Bütün bunlara baxmayaraq, biz daxilimizdə olan separatizm ocağını söndürmüşük. Keçmiş SSRİ məkanında olan bənzər konfliktlərin heç biri bu şəkildə kökündən həll olmayıb. Bunu bizim üçün heç bir kənar qüvvə etmədi. Azərbaycan ordusu bu reallığı bütün dünyaya qəbul etdirdi. Bu, digər münaqişələr üçün də öyrənilməsi zəruri olan bir təcrübə rolunu oynayır. Bu, digərləri üçün də nümunə olmalıdır. Başqaları da bundan nəticə çıxartmalıdır. Çünki separatizmin, ölkənin Konstitusiya quruluşuna qarşı üsyan qaldırmağın sonu bu cür bitir. Təbii ki, Azərbaycanın hüquq-mühafizə orqanlarının əlində xalqımıza, dövlətimizə, suverenliyimizə qarşı cinayət törətmiş terrorçuların konkret siyahısı var. Vardanyanın ardınca onlar da bir-bir Azərbaycan qanunları qarşısında cavab verəcəklər. Bu, tarixi ədalətin bərpasını, tökülən günahsız qanların yerdə qalmadığını göstərir”.
Separatizm müasir dünyanın baş bəlasıdır. Əsasən 20-ci əsrin sonları, 21-ci əsrin əvvəllərindən baş qaldıran separatizm bəlası artıq dünyanın 10-dan çox ölkəsi üçün böyük problemlər yaradıb. Bu problemlər həmin ölkələrin sərhədlərindən kənara da, geosiyasi proseslərə də təsirini göstərir. Separatizmə qarşı dövlətlərin hamısı mübarizə aparacaqlarını vəd etsələr də, heç də hər kəs vədinə əməl eləmir. Əksinə, bəzi dövlətlər separatizmi himayə etməyə başlayırlar. Bəzi dövlətlər isə birbaşa həmin separatizm ocağını qalayan və alovlandıranlardır. Bu alovun sönməsinə də məhz həmin ölkələr imkan vermir. Bu sırada Rusiyanın adı bütün dünyada ilk yerdə gəlir. Keçmiş SSRİ respublikalarının dördü illərdir separatizm bəlası ilə üz-üzə qoyulub.
Məhəmmədəli QƏRİBLİ
