Qarabağ iqtisadi rayonunda Azərbaycan ordusunun lokal xarakterli antiterror tədbirləri nəticəsində bölgədə yerləşən qanunsuz Ermənistan silahlı qüvvələri birləşmələrinin varlığına son qoyulması, gözlənildiyi kimi, İrəvanda vəziyyəti qarışdırıb. Müxalif qüvvələr vəziyyətdən istifadə edib Nikol Paşinyan hakimiyyətinə son qoymağa can atırlar. Bu səbəbdən hakimiyyət əleyhinə aksiyalar davam edir. Paşinyanın iqamətgahına çoxlu sayda polis gətirilib. Polis bir neçə cərgədən ibarət baryer qurub.
Kütləvi etiraz aksiyası İrəvanın Respublika meydanında keçirilir. Mitinqə toplaşan nümayişçilər polisə müxtəlif əşyalar atıb. Eyni zamanda nümayişçilər indi də hökumət əleyhinə şüarlar səsləndirirlər. Aksiyaçılar polisə və hökumət binasına yumurta, butulka və daş atıblar. Polis güc tətbiq edib. “Qraparak” nəşri məlumat yayıb ki, Paşinyan hökumət binasının yaxınlığında etirazların qızğın vaxtında bir neçə tərəfdarı ilə görüşüb: “O, komandasına açıq şəkildə bildirib ki, istefa verməyəcək, nəyin bahasına olursa-olsun, hakimiyyəti saxlayacaq. Bu, İrəvanda polisin kobud hərəkətlərini, qumbaraatanlardan istifadə etməsini izah edir”. Geri çəkilmək istəməyən müxalifət bilir ki, indi hansısa nəticə əldə edilməsə, Paşinyanı devirmək mümkünsüz olacaq. Ermənistanın keçmiş baş naziri Vazgen Manukyan mitinqdə çıxışı zamanı bu fonda qeyd edib: “Bizim dövlətimiz var, ordumuz var və müstəqil Ermənistan dövlətinin gözü qarşısında Qarabağda indiki hadisələr baş verir. Kim inanar? Ərdoğan deyir ki, onların Nikolla Zəngəzur və anklavlarla bağlı hələ də razılaşmaları var. Razılaşma nədir? Razılaşma o deməkdir ki, mən sənə bunu verirəm, sən mənə bunu verirsən. Azərbaycandan, Türkiyədən nəsə almışıq? Biz heç nə almadıq, bəs kim aldı, Nikol aldı? Əslində, ən korrupsioner müxbir korrupsiyaya qarşı mübarizə bayrağını qaldıraraq Ermənistanın lideri oldu. Nikol olmasa, razılaşmalar da olmayacaq. Bu, siyasi mübarizə deyil, burada İrəvanın mərkəzində bizim millətin düşməni oturub və mən onların dedikləri ilə razı deyiləm. İçində sevgi, nifrət yoxdursa, milli hərəkat ola bilməz, ürəyinizdə vətən sevgisi, düşmənə nifrət oyansın. Problemi həll etmək üçün təkcə ağıl kifayət deyil, həm də hisslər lazımdır”. Gələcək planlardan danışan Manukyan qeyd edib: “Hazırda komitə yaradılır, müxtəlif qüvvələrlə danışıqlar aparılır. Bütün siyasi sahə hakimiyyət dəyişikliyi ilə bağlı bu komitəyə tabe olmalıdır”. Erməni bloger Mikael Badalyan isə bunlar fonunda bildirib ki, Ermənistandakı proseslər getdikcə daha gərgin xarakter alır: “Ölkənin baş naziri Nikol Paşinyana qarşı narazılıq pik həddə çatıb. Xaricdə yaşayan çox sayda erməni ona mesaj yazaraq ölkəyə qayıtmaq qərarı verdiyini deyir. Belə ki, onlar ölkəyə qayıdaraq Paşinyana qarşı mübarizəyə başlamaq istədiklərini söyləyiblər. Amma Paşinyan bildirib ki, istefa verməyəcək. O bildirib ki, heç bir halda istefa vermək olmaz, hər vasitə ilə hakimiyyəti saxlamaq lazımdır”.
Qeyd edək ki, Rusiyanın İrəvandakı səfirliyi qarşısına toplaşaraq kütləvi aksiya keçirənlər “Rusiya düşməndir!”, “Nikol satqındır!” şüarları səsləndirblər.
Aksiya iştirakçıları tərəfindən mühasirədə saxlanılan Rusiyanın İrəvandakı səfirliyinin fəaliyyəti iflic olub. Səfirlik bəyanatla çıxış edərək Ermənistan Xarici İşlər Nazirliyindən diplomatik nümayəndəliyin fəaliyyətinin bərpası üçün təcili tədbirlərin görülməsini tələb edib. Yerli internet resurslarının məlumata görə, Ermənistanın digər şəhərlərində də kütləvi aksiyalar keçirilir. “Ana Ermənistan” blokunun rəhbəri Andranik Tevanyan canlı efirdə ölkə vətəndaşlarını İrəvanda və regionlarda işçi tətillərinə çağırıb: “Aksiya çox kütləvi olmalıdır ki, Nikol Paşinyanın rəhbərlik etdiyi hakimiyyəti istefaya göndərək və yeni hökumət formalaşdıraq”. O qeyd edib ki, bu gün müxalifətin ən başlıca məqsədi Paşinyanı istefaya göndərməkdən ibarət olmalıdır. Ermənistanın “Qraparak” qəzeti isə indiki halda Paşinyanın Müdafiə Nazirliyində gizləndiyi barədə xəbər yayıb. Xəbərdə bildirilir ki, Paşinyan yaxın adamları ilə birlikdə Müdafiə Nazirliyinin bunkerində gizlənib. Baş nazirin ailəsi isə təhlükə duyduğu üçün paytaxtı tərk edərək Göyçədəki malikanəyə köçüb. Amma kütləvi aksiyalar Ermənistanda hakimiyyət dəyişikliyinə səbəb olsa belə, nəticə dəyişməyəcək. Ermənistanda istənilən hakimiyyət yeni vəziyyətdən faydalana bilməlidir. Gürcü ekspert Giorgi Caxaya bu xüsusda qeyd edir: “Azərbaycanın Qarabağ iqtisadi rayonunda antiterror tədbirlərinin nəticələri məlum idi. Hamı, o cümlədən Ermənistanın özü üçün bu cür nəticə gözlənilirdi”.Onun sözlərinə görə, Qarabağ Ermənistanın “belində daşıya bilmədiyi ağır bir yük” idi: “Sadəcə olaraq, bəzi qüvvələr Ermənistanın bu yükdən azad olmasına imkan vermirdi. Regionda sabitliyin, sülhün, inkişafın əleyhinə olan qüvvələr erməni separatçılarının əli ilə Azərbaycana qarşı daim kampaniya aparıblar. Nəhayət Azərbaycanın başlatdığı antiterror tədbirləri öz nəticəsini verdi. Qarabağda separatçıların təslim olması və münaqişənin başa çatması Ermənistanın özünün blokadadan çıxmasına, dünyaya açılmasına, ümumilikdə regionun inkişafına təkan verəcək. Eyni zamanda, qlobal nəqliyyat layihələrinin reallaşmasına imkan yaranacaq. “Qarabağ məsələsinin bu cür başa çatması regiondakı digər münaqişələrin də həllinə səbəb ola bilər. Bu da ümumilikdə Cənubi Qafqazın inkişafına, çiçəklənməsinə gətirəcək”.
Samirə SƏFƏROVA
