Akif Nəsirli: “Dəyişiklik yanacağın qiymətinə təsir etməyəcək”
Xəbər verdiyimiz kimi, Nazirlər Kabineti 17 noyabr 2017-ci il tarixli qərarı ilə təsdiq edilmiş “Xarici iqtisadi fəaliyyətin mal nomenklaturası, idxal gömrük rüsumlarının dərəcələri və ixrac gömrük rüsumlarının dərəcələri”ndə və 19 yanvar 2001-ci il qərarı ilə təsdiq edilmiş “Azərbaycan Respublikasının ərazisinə gətirilən aksizli malların aksiz dərəcələri”ndə dəyişiklik edib.
Dəyişikliyə əsasən, mühərrik benzinləri (aviasiya benzinləri istisna olmaqla, tərkibində qurğuşunun miqdarı 0,013 q/l-dən çox olmayan, 95-dən az oktan ədədi ilə) üçün aksiz dərəcəsi 2025-ci il 1 iyun tarixinədək 1 ton üçün 200 manatdan 1 manat endirilib. Bəs, bu qərar yanacağın qiymətinə təsir edəcəkmi?
“Istehsal etdiyimiz xam neftdən müxtəlif ölkələrdə çeşidli məhsullar hazırlanır, həmin məhsullar isə ölkəmizə idxal olunur”
Liberal İqtisadçılar Birliyinin sədri Akif Nəsirli “Bakı-Xəbər”ə şərhində bildirdi ki, dəyişiklik yanacağın qiymətinə təsir etməyəcək: “1 ton yanacağa 200 manat deyil, 199 manat aksiz vergisi verməyin nə mənası var? 1 manatı 1000 litr və ya 1000 kiloqrama böləndə 0,001 gəlir düşür. Ümumiyyətlə, Azərbaycanda vergi sisteminin tənzimlənməsi zamanı qəbul edilən qərarlar normal başadüşülən şəkildə izah edilmir. Hesab edirəm ki, Tarif Şurasının hər bir qərarı sadə vətəndaşın başa düşəcəyi tərzdə izah edilməli, əsaslandırılmalıdır. 200 manata 1 manat endirimin nə cür əsaslandırılacağı mənə çatmır”.
Həmsöhbətimiz onu da əlavə etdi ki, Azərbaycan neft ölkəsidir: “Azərbaycan neft ölkəsi kimi tanınır. Xatırladım ki, 1848-ci ildə Azərbaycanda ilk dəfə neft fontan vurub. Həmin dövrdən bugünə kimi müxtəlif vaxtlarda ölkəyə neft məhsulları idxal olunub. Bu da ən böyük çatışmazlıqdır. Dünyanın ən qədim neft ölkəsi neft idxal etməməlidir. Bugünə qədər neft gəlirindən hər cür neft məhsulunun ölkə daxilində istehsalına nail olunmalı idi. Bu, Azərbaycan iqtisadiyyatının çatışmazlığıdır. Üstəlik, idxal olunan məhsullara aksiz vergisi də tətbiq edirik. Istehsal etdiyimiz xam neftdən müxtəlif ölkələrdə çeşidli məhsullar hazırlanır. Həmin məhsullar isə ölkəmizə idxal olunur”.
Günel CƏLİLOVA
