Məlum olduğu kimi, millət vəkilləri ziyarətgahlar, ibadət yerləri və məzarlıqlar haqqında qanunun qəbul edilməsi təklifi ilə çıxış edib. Millət vəkilləri belə bir qanunun qəbul olunmasına məzarlıqlardakı dəm-dəstgahın səbəb olduğunu düşünürlər:
"Hazırda əksər ölkələrdə məzarlıqlar, qəbiristanlıqlar xüsusi qanunlarla idarə olunur və tənzimlənir. Bir çox ölkələrdə hər bir məzarın, qəbrin sənədi, şəxsi vərəqəsi var, onlar qanunla tənzimlənir. Eyni zamanda, dünyanın bir çox yerlərində görürük ki, məzarlıqlar hamısı eyni vəziyyətdədir, məzarlar, qəbirlər eyni standartda və ölçüdədir. Bizdə də belə olmalıdır. Ən əsası, Azərbaycanda bəzi ziyarətgah, ibadət yerləri inanc yerlərindən çıxıb, siyasi hadisəyə, siyasi məkana çevrilib. Bəzi radikal-dini qruplar da var ki, onlar həmin ziyarətgahlardan, ibadət yerlərindən öz şəxsi məqsədləri üçün istifadə etməyə çalışır. Onların bu cür yolverilməz, çirkin məqsədlərinin qarşısının alınması, gələcəkdə hay-küy qaldırmalarına əsas olmaması üçün də bu yerlər qanunla tənzimlənməlidir".
Dinşünaslar da belə bir qanunun qəbul olunmasının vacib olduğunu düşünür.
"Yeni Üfüq" İctimai Birliyinin sədri Sevinc Əzimbəyli hesab edir ki, belə bir qanun layihəsinin qəbul olunması tamamilə İslamın mahiyyətinə uyğun məsələdir: "Bu gün qəbir üstlərində baş, sinə daşları, mərmərlərin heç birinin İslama aidiyyəti yoxdur. Əksinə, ölü sahibinə verilən bir əziyyət, israfçılıq, riyakarlıqdır. Ona görə də belə işlərin aradan qaldırılması üçün məsələnin Milli Məclisdə gündəmə gətirilməsi gözəldir. Ümidvarıq ki, bununla bağlı hansısa qanun qəbul olunacaq.
Bir sıra xarici ölkələrdə qəbirlərlə bağlı müəyyən standart forma var. Çində bilirik ki, qəbirlərin yandırılması ilə bağlı proses var. Buna baxmayaraq, Çində belə müəyyən standarlar var. Bu məsələlərlə bələdiyyələr xüsusi formada məşğul olur. Səudiyyə Ərəbistanını da misal göstərə bilərik. Orada müəyyən müddət keçəndən sonra sümükləri bir kənara yığışdırırlar. Başqalarını həmin qəbirlərdə dəfn edirlər. Bu gün Bakının özündə yer məsələsində artıq qıtlıq yaşanır. Artıq bunu biznesə çevirib pul qazanan insanlar var. Bütün bunların qarşısını almaq üçün qanuna ehtiyac var. Gözəl nəticə əldə edə biləcəyik".
Həmsöhbətimiz onu da əlavə etdi ki, ziyarətgahlarla bağlı qanunun qəbul olunması vacibdir: "Bu gün bir qrup şəxs ziyarətgahlardan biznes maraqları üçün istifadə edir. Bu gün Azərbaycanda bütün ocaqlar, pirlər və s. Qafqaz Müsəlmanları İdarəsinin tabeliyindədir. Yaxud da Dini Qurumlarla İş üzrə Dövlət Komitəsində qeydiyyatdan keçib. Ziyarətgahların kimlərə xidmət etməsini onlar dəqiqləşdirə bilər".
