Müstəqil Dövlətlər Birliyi ölkələri üzrə yol hərəkətinin vahid qaydaları müəyyən edilə bilər. Bu sözləri Rusiya Federasiya Şurasının sədri Valentina Matviyenko mətbuata açıqlamasında deyib. Onun sözlərinə görə, gələn il MDB dövlətlərin parlamentlərarası assambleyasında yol hərəkəti təhlükəsizliyi ilə bağlı yeni qanun layihəsi təklif ediləcək: "Əhəmiyyətlidir ki, MDB ölkəsində yaşayan vətəndaş yol hərəkəti qaydalarının hər ölkədə fərqli olmasından əziyyət çəkməsin".
V.Matviyenkonun fikrincə, hazırda MDB ölkələri üzrə model qanunun hazırlanması və qanunvericiliyin sinxronlaşdırılması məqsədilə yol hərəkəti təhlükəsizliyi üzrə iş aparılır: "Ekspert qrupu 2015-ci ilin birinci yarısına qədər qanunu hazırlamalıdır".
Matviyenko belə təşəbbüslərin çox əhəmiyyətli olduğunu qeyd edib. O bildirib ki, MDB iqtisadi, nəqliyyat və s. cəhətdən vahid məkandır: "Biz istəmirik ki, insanlar MDB-nin başqa ölkələrinə gəldikdə yol hərəkəti qaydalarını yenidən öyrənməyə məcbur qalsınlar. Vahid sistem buna görə də olmalıdır. Onda insanlara daha rahat olacaq və insanlar özlərini müdafiə edilmiş hiss edəcək".
Sözügedən təklifin maraqlı olduğunu nəzərə alıb ekspertlərin məsələ ilə bağlı fikirlərini öyrənməyə çalışdıq. Ümumilikdə MDB ölkələri üzrə yol hərəkətinin vahid qaydalarının müəyyən edilməsi nə dərəcədə mümkündür və bu nə verə bilər?
Sözügedən məsələ ilə bağlı fikirlərini "Bakı-Xəbər"lə bölüşən "Təhlükəsiz Yol" Alyansınıne koordinatoru Məhərrəm Zülfüqarlı buna birmənalı prizmadan yanaşmadı: "Texniki nöqteyi-nəzərdən məsələyə yanaşsaq, burada elə bir problem yoxdur. Əksinə, bu, sözügedən ölkələrdəki sürücülərin və piyadaların xeyrinədir, xüsusən də digər ölkələrə gedib sürücülük fəaliyyəti ilə məşğul olanlar üçün. Ancaq məsələnin siyasi tərəfinə gəldikdə isə, bir qədər ehtiyatlı olmaq lazımdır. Orada ölkənin dövlət müstəqilliyi ilə bağlı hansısa məhdudlaşdırıcı xarakterli məqam yoxdursa, onda buna getmək olar. Ancaq görünən odur ki, Rusiyanın məqsədi bu cür ikinci dərəcəli məsələləri ortaya gətirməklə, vahid nəqliyyat ittifaqı yaratmaqdır. Daha sonra ölkəni Gömrük İttifaqının orbitinə çəkmək istəyir. Bununla bütün postsovet ölkələri öz tərəfinə çəkmək istəyirlər. Ən azından sözügedən təklifin arxasında belə bir niyyətin olmasını istisna etmirəm. Ona görə də təklifə ehtiyatlı yanaşmaq lazımdır".
