Kilsələrdə kitabxana olar, məscidlərdə olmaz?...

Zaman, dövr elə gətirib ki, mənəvi dəyərlərimizin, əsl mədəniyyətimizin, müxtəlif sahələr üzrə maarifçilik işinin təbliğinə daha böyük ehtiyac yaranıb. Orta ümumtəhsil məktəbləri şagirdlərinin, ali məktəb tələbələrinin mədəniyyət və incəsənətimizlə, xalq sənətimizlə, ədəbiyyatımızla bağlı ciddi biliyə ehtiyacı var. Bu ehtiyacı ödəmək üçün uzun illərdir layihələr düşünülür, bu məsələ ətraflı müzakirəyə çıxarılır, ancaq nədənsə görülən tədbirlər özünü elə də doğrultmur.
Əlbəttə, bu ciddi nüans Azərbaycan dövlətini maraqlandırır və dövlətimiz bunun üçün daha uğurlu layihələr hazırlamağa cəhdlər edir. Deyim ki, bu cəhdlərin uğurlu nəticələri də nəzərə çarpır. Bu işə xeyli əvvələ qədər pərakəndə münasibət vardısa, artıq son zamanlar kompleks tədbirlərin görülməsi diqqəti cəlb edir.

Bilik Fondunun yolu...
Bu ilin may ayının 7-də Azərbaycan Respublikasının Prezidenti İlham Əliyevin fərmanı ilə Azərbaycan Respublikası Prezidenti Yanında Bilik Fondu yaradılıb. Bilik Fondunun nizamnaməsindən də göründüyü kimi qurumun məqsədi respublika əhalisinin texniki, ictimai-siyasi, sosial-iqtisadi, ekoloji və humanitar biliklərinin artırılmasına xidmət etmək, qloballaşma şəraitində cərəyan edən prosesləri təhlil etmək bacarığı aşılamaq, azərbaycançılıq məfkurəsinin mahiyyətini və milli-mənəvi, dini dəyərləri təbliğ etmək, Azərbaycan Respublikasının daxili və xarici siyasətinin mahiyyətini ictimaiyyətə çatdırmaqdır. Fondun əsas vəzifələrinə gəlincə, qeyd edim ki, Fond təşkilat və təbliğat xarakterli tədbirlərin keçirilməsini, əhaliyə qloballaşma şəraitində cərəyan edən proseslər haqqında dolğun məlumat çatdırmaq işini, azərbaycançılıq məfkurəsinin mahiyyətinin, milli-mənəvi və dini dəyərlərin təbliğini, şəxsin fasiləsiz təhsilini, müasir standartlara uyğun biliklərə və dünyagörüşünə yiyələnməsini, şəxsiyyət kimi inkişafını təmin etmək məqsədilə lazımi tədbirlərin həyata keçirilməsini vəzifə prinsipi olaraq qarşısına qoyub. Eyni zamanda, Fond gənclərin bilik və bacarıqlarının artırılması üçün, sağlam həyat tərzinin təbliği istiqamətində, media ilə iş barədə, elmi biliklərin təbliği ilə bağlı, Azərbaycan tarixinin öyrənilməsi və təbliğ edilməsi ilə bağlı layihələr həyata keçirməyi də planlaşdırır.
Çox böyük missiyanı boynuna götürən Bilik Fondunun qarşıya qoyduğu məqsədlərin həyata keçməsinə hər birimiz şahidlik edəcəyik. Artıq Fond ilk layihələrini həyata keçirməyə başlayıb. Deyərdim ki, ilk tədbirlərdən də görsənir ki, Fond öz işinə yüksək səviyyədə başlayıb.
Dünən Azərbaycan Respublikasının Prezidenti Yanında Bilik Fondunun ofisində Fond sədri Oqtay Səmədovun başçılığı ilə KİV-lər üçün ilk mətbuat konfransı keçirildi.
"Qardaşlaşmış məktəblərdən" "Dünya elmi Azərbaycanda" layihəsinə qədər...
Bilik Fondunun rəhbəri Oqtay Səmədov Fondun indiyə qədər gördüyü işlərdən danışarkən bildirdi ki, qısa müddət ərzində xeyli iş görüblər. O bildirdi ki, Fondun layihələri məktəblər arasında, o cümlədən də cəmiyyət tərəfindən böyük rəğbətlə qarşılanıb. Onun sözlərinə görə, "Qardaşlaşmış məktəblər" layihəsi çərçivəsində bir sıra işlər görülüb. Bu ilin 8-12 sentyabr tarixlərində 20 məktəbin qardaşlaşması məsələsi həyata keçirilib. Məktəblər tərəfindən bu addımın yüksək qiymətləndirildiyini vurğulayan qurum rəhbəri "Ölkəmizi tanıyaq" layihəsinin uğurlarını da qeyd etdi":10 şəhər, rayon, qəsəbə və kəndin məktəbi digər 10 məktəblə qardaşlaşdı və onlar qardaşlaşma sazişi imzaladılar. Biz burada sərhəd rayonları da əhatə etmişik".
O bildirdi ki, hər məktəbin öz ənənəsi, dəyərləri var, başqa məktəblər də qardaşlaşma nəticəsində ona bələd olur. Onun sözlərinə görə, bu amil məktəblər arasında dostluğun, əməkdaşlığın yaranmasına səbəb olub. Bilik Fondunun təşkilatçılığı ilə qardaşlaşmış məktəblərin şagirdlərinin səfərlərə aparıldığını deyən qurum rəhbəri bildirdi ki, bunun əhəmiyyəti böyükdür. Bundan başqa, o dedi ki, hər il sentyabrın 15-də-Bilik Günündə bütün orta və ali məktəblərdə ilk dərs günü ümummilli lider Heydər Əliyevlə bağlı keçirilir, Fondun təşəbbüsü ilə bu ildən yeni ideyaya start verilib. Bunun nədən ibarət olduğunu açıqlayan O.Səmədov bildirdi ki, bu Bilik Günündə respublikanın 70-ə qədər məktəbində ölkənin tanınmış ziyalıları, alimləri, akademiklərinin iştirakı ilə dərslər keçilib, "Azərbaycan bu gün və sabah" mövzusunda mühazirələr oxunub. Tanınmışlar ilk dərs günündə şagirdlərə dərs deyiblər. Onlardan 4-ü akademik, 24-ü professor, 31-i elmlər namizədi, qalanları isə gənc tədqiqatçılar olub. Onun sözlərinə görə, Bilik Günündə mühazirə oxumaq üçün sinif otağına bir neçə xarici ölkə səfiri də daxil olub. Fond rəhbərinin sözlərinə görə, bu proses bütün məktəbləri əhatə edənə qədər davam edəcək. Xarici ölkə alimlərinin, tanınmış insanların da bu layihəyə cəlb ediləcəyini deyən O.Səmədovun sözlərinə görə, artıq Çexiya, Ukrayna, Türkiyə, Almaniya və digər ölkələrin alimlərindən əməkdaşlıq təklifi alıblar. Onun dediyinə görə, "Dünya elmi Azərbaycanda" layihəsi çərçivəsində daha geniş səviyyədə xarici ölkə alimləri ilə əlaqələr yaradılacaq və həm onların təcrübəsi burada yayılacaq, həm də Azərbaycan alimlərinin xaricdə təbliğatı işi həyata keçiriləcək. Bundan başqa, səsləndirilən fikrə görə, Rabitə və Yüksək Texnologiyalar Nazirliyinin dəstəyi ilə Fond tərəfindən distant, onlayn dərslər də təşkil ediləcək.
Fond sədrinin dediyinə görə, artıq ali məktəblərlə əlaqələr yaradılır. İlk tədbirin Qafqaz Universitetində təşkil edildiyini bildirən O.Səmədov bunun geniş miqyas alacağını dedi.

Bilik Fondu gələcək jurnalistlərə dəstək olacaq...
Bilirik ki, son illər respublika ali məktəblərinin jurnalistika fakültəsinə daxil olan gənclərin bir çoxunun bu sahə ilə maraqlanmadığı problemi meydana çıxıb. Bu məsələyə toxunan O.Səmədov qeyd etdi ki, bu ildən jurnalistika ixtisasına qəbul olunma sahəsində yenilik baş verib. Bildiyimiz kimi, bu yenilik abituriyentlərin test imtahanı ilə yanaşı, yazı-esse müsabiqəsində də iştirakı ilə bağlıdır. Qurum rəhbərinin sözlərinə görə, ilk imtahanın nəticələri göstərib ki, bu abituriyentlərin çoxu esse-yazı imtahanında elə də fərqlənməyib. O bildirdi ki, abituriyentlərin çoxu öz fikrini yazı ilə ifadə edə bilməyib":Gələcəkdə jurnalist olmaq istəyən 10-11 sinif şagirdləri üçün yeni layihəmiz olacaq. Onlar burada peşəkar jurnalistlərin dəstəyi ilə yazı yazmaq qabiliyyətinə sahib olacaqlar. Etiraf edək ki, orta məktəblərin yuxarı sinif şagirdləri sərbəst inşa yazmaq sahəsində fəal deyil. Bu iş Yaradıcılıq Fakültəsinin nəzdində həyata keçiriləcək. Yaradıcılıq Fakültəsi özündə ədəbiyyatın, mədəniyyətin, sənətin bütün sahələrini əhatə edəcək.
Tədbirdə iştirak edən həmkarlarımız Bilik Fondu rəhbərinə məktəblərdə dərsliklərin keyfiyyətinin aşağı olması, bu barədə hansısa bir tədbir görülüb-görülməyəcəyi barədə sual ünvanladı. Qurum rəhbəri məktəblərlə sıx təmasda olduqlarını, onların bəzilərinin kitabxanasının kasad olduğunu dedi. Onun sözlərinə görə, mövcud problemlərə qurum zaman-zaman kömək göstərəcək. Bundan başqa, O.Səmədov dedi ki, bölgə məktəblərinin kitabxanalarının ən çox üzləşdiyi çətinliklərdən biri rus, ingilis və digər dillərdə olan lüğət vəsaitinin çatışmaması ilə bağlıdır. Onun dediyinə görə, bu kitabları əldə etməklə bağlı müxtəlif kitabxanalara müraciət ediləcək. Bölgələrdəki nümayəndələrinə gəlincə, qurum sədri dedi ki, 75 rayon üzrə nümayəndələri var və tərkib yerlərdə nüfuzu, hörməti olan məktəb direktorlarından ibarətdir.
Naxçıvanda yeni yaradılan Bilik Fondu ilə əməkdaşlıq məsələsinin zəruri olduğunu deyən qurum rəhbəri bildirdi ki, qarşı tərəf tam fəaliyyətə başladıqdan sonra qarşılıqlı əməkdaşlıq edəcəklər.
Tədbirdə qurum rəhbəri jurnalistlərin Bilik Fondunun maliyyə mənbəyi barədə sualına cavab olaraq bildirdi ki, builki fəaliyyətləri üçün dövlət büdcəsindən 1 milyon manat vəsait alıblar, bu da onlara kifayət edir. Növbəti ildən isə qurumun nizamnaməsinə uyğun olaraq Bilik Fondu maliyyə qaynaqları əldə etməklə bağlı qrand layihələrinə də qoşula bilər.

Tarixin izi ilə...
Bilik Fondunun layihələrindən danışan O.Səmədovun sözlərinə görə, dövlət müşaviri, akademik Kamal Abdullayevin təşəbbüsü, məsləhəti ilə "Məscidlərdə kitabxana" layihəsinə start verilməsi nəzərdə tutulur. Qurum rəhbəri bildirdi ki, məscid din ocağı olmaqla yanaşı, həm də bir bilik mənbəyidir, bu baxımdan məscidlərdə dini kitablar da daxil olmaqla böyük kitabxana yaradılması zəruridir. Başqa ölkələrdə, xüsusən də kilsələrdə belə kitabxanaların mövcud olduğunu deyən O.Səmədovun fikrincə, bizim din ocaqlarımızda da kitabxana olmalıdır.
Bilik Fondunun həyata keçirdiyi layihələrdən biri də "Dini abidələrdə tarixin izləri" layihəsidir. Layihə çərçivəsində Azərbaycan ərazisində yerləşən məscidlər, ziyarətgahlar, kilsələr, sinaqoqlar, məbədlər və imamzadələrdə tarixi-elmi tədqiqatlar aparılacaq, abidələr hərtərfli öyrəniləcək, Azərbaycan tarixi üçün faydalı məqamlar üzə çıxarılacaq, müəyyən bərpa işləri aparılacaq.
Bundan başqa, Bilik Fondu "Auditoriya+", "Ustad və şəyird", "Dokendo discimus", "Yaradıcılıq fakültələri" (biz onun görəcəyi işlərə yuxarıda toxunmuşuq-İ.S), "Epizod", "Azərbaycan elmi xaricdə", "Dünya elmi Azərbaycanda" və başqa layihələrə başlayacaq.
Bilik Fondu rəhbəri O.Səmədov üzünü media nümayəndələrinə tutaraq davamlı əməkdaşlıq etmək niyyətini açıqladı. Sözsüz ki, KİV-lər belə bir taleyüklü məsələdə, hər birimizi maraqlandıran işlərin, qayğıların həll olunmasında, başlıcası isə, başlanan geniş profilli maarifçilik işində Bilik Fonduna dəstək göstərməlidir. Düşünürəm ki, göstərəcək də... Bilik Fonduna çiyninə aldığı maarifçilik yükünü ləyaqətlə daşıması sahəsində uğurlar arzu edirik.