Yeni güzəştlər bölgələrdə müəllim çatışmazlığı problemini həll edəcəkmi?

Tarix: 16.09.2014 / 03:52
Bölmə: Sosial

Yeni dərs ilinin başlanması ilə bağlı əyalətlərdə pedaqoji fəaliyyətlə məşğul olmaq istəyənlər üçün xoş xəbər verilib. Belə ki, rayon mərkəzlərindən 20 km-dən artıq məsafədə yerləşən məktəblərdə çalışan gənc müəllimlərə ödənilən əlavə məbləğ 50 manat artırılıb.
Nazirlər Kabinetinin "Pedaqoji profilli ixtisaslar üzrə ali və orta ixtisas təhsili müəssisələrini bitirmiş və ümumi təhsil müəssisələrində işə başlamış gənc mütəxəssislər üçün əlavə güzəştlər və stimullaşdırıcı tədbirlərin müəyyən edilməsi haqqında" Nazirlər Kabinetinin 2010-cu il 14 aprel tarixli 67 nömrəli qərarında dəyişiklik edilməsi barədə" qərarı yeni dərs ilin başlandığı gündən qüvvəyə minib.
İndiyə qədər pedaqoji profilli ali və orta ixtisas təhsili müəssisələrini bitirmiş gənc mütəxəssislərin kənd rayonlarında yerləşən ümumi təhsil müəssisələrinə işə cəlb olunmasının stimullaşdırılması və həmin müəssisələrdə pedaqoji kadr tələbatının ödənilməsi məqsədilə dövlət sifarişinə əsasən iş yerlərində əmək fəaliyyətinə başlayan və 3 il müddətində bu fəaliyyəti ümumi təhsil müəssisələrində davam etdirən gənc mütəxəssislərə bu müddət ərzində kommunal xidmətlərini ödəmək üçün 40 manat məbləğində kompensasiya verilib.
Qərara əsasən, yerli icra hakimiyyəti orqanları tərəfindən bələdiyyələrlə birlikdə onların yaşayış sahələrinə ehtiyaclarının ödənilməsinə, daimi məskunlaşmaq üçün torpaq sahələrinin ayrılmasına və ipoteka kreditlərinin verilməsinə köməklik göstərilirdi. Eyni zamanda, rayon mərkəzlərindən 20 km-dən artıq məsafədə yerləşən ümumi təhsil müəssisələrində əmək fəaliyyətinə başlayan hər bir nəfər üçün 3 il müddətində aylıq əmək haqqına ayda 70 manat məbləğində əlavə ödənilirdi.
Dəyişikliyə əsasən, pedaqoji profilli ali və orta ixtisas təhsili müəssisələrini bitirmiş və pedaqoji kadr tələbatının ödənilməsi məqsədilə dövlət sifarişinə əsasən kənd rayonlarında yerləşən ümumi təhsil müəssisələrinə işə cəlb olunması nəzərdə tutulan gənc mütəxəssislər üçün yaş həddi konkretləşdirilərək 35 yaşadək müəyyən edilib. Artıq 3 il müddətində həmin təhsil müəssisəsində fəaliyyətini davam etdirən gənc mütəxəssislərə bu müddət ərzində tək kommunal xərcləri deyil, yaşayış yerinin kirayə haqqının da ödəmək üçün ümumilikdə 60 manat məbləğində kompensasiya veriləcək. Yerli icra hakimiyyəti orqanları üzərindən gənc mütəxəssislərə ipoteka kreditlərinin verilməsinə köməklik göstərməsi barədə öhdəlik ləğv edilib. Bundan sonra yerli icra hakimiyyəti orqanlarına yalnız bələdiyyələrlə birlikdə onların yaşayış sahələrinə ehtiyaclarının ödənilməsinə, daimi məskunlaşmaq üçün torpaq sahələrinin ayrılmasına köməklik göstərmək tapşırılıb. Rayon mərkəzlərindən 20 km-dən artıq məsafədə yerləşən ümumi təhsil müəssisələrində əmək fəaliyyətinə başlayan və yaşı 35-dək olan gənc mütəxəssislərin 3 il müddətində aylıq əməkhaqqına əlavənin məbləği də 70 manatdan 100 manata qaldırılıb. Digər dəyişikliyə əsasən, 3 illik müddət bitdikdən sonra həmin və ya digər kənd məktəbində pedaqoji fəaliyyətini davam etdirən gənc mütəxəssislərə daha 2 il müddətində kompensasiya və əməkhaqqına əlavə ödəniləcək.
Başqa sözlə, hazırda yeni işə başlayan müəllimin bir stavka (12 saat) dərs yükü üçün aylıq əmək haqqı 155 manat təşkil edir. Kompensasiya və stimullaşdırıcı tədbirlər də əlavə edilərsə, bundan sonra rayon mərkəzlərindən 20 km-dən artıq məsafədə yerləşən ümumi təhsil müəssisələrində əmək fəaliyyətinə başlayan gənc müəllimin əmək haqqı 315 manat olacaq. Stavka artdıqca əmək haqqı da müvafiq olaraq artacaq. Kənd rayonlarında əmək fəaliyyətinə başlamaq üçün konkret iş yerlərinə göndəriş almış gənc mütəxəssislərə, həmçinin yol xərci, əmlakın daşınması üçün nəqliyyat xərci və ilkin yaşayış şəraitinin yaradılması məqsədi ilə əməkhaqqının iki misli həcmində birdəfəlik yardım da ödəniləcək. Ötən dərs ilində kənd məktəblərində 2552 yerə həvəsləndirmə tədbirləri tətbiq olunub ki, bu da bütün vakant yerlərin 78 faizini təşkil edir.
Qeyd edək ki, yerli icra hakimiyyəti orqanları üzərindən gənc mütəxəssislərə ipoteka kreditlərinin verilməsinə köməklik göstərilməsi barədə öhdəliyin ləğv edilməsinə aydınlıq gətirən Təhsil Nazirliyi gənc mütəxəssislərə daimi məskunlaşmaq üçün torpaq sahələrinin ayrılması və ipoteka kreditlərinin verilməsi sahəsində çətinliklərin aradan qaldırılması ilə əlaqədar qanunvericilikdə müvafiq dəyişikliklərin edilməsi ilə bağlı sənədlər hazırlandığını açıqlayıb.
Məlum olduğu kimi, bu yeniliyin tətbiqindən əvvəl ucqar kəndlərin çoxunda ciddi müəllim çatışmazlığı yaşanırdı. Göründüyü kimi, yeni dəyişikliklərdə ucqar kəndlərdə işləmək istəyən gənc mütəxəsislər üçün böyük güzəştlər nəzərdə tutulur. Maraqlıdır, bu dəyişiklik əyalətlərdə olan müəllim çatışmazlığını həll edə biləcəkmi?
Sözügedən məsələ ilə bağlı "Bakı-Xəbər"ə açıqlamasında Təhsil Şurasının sədri Əjdər Ağayev bildirdi ki, bu məsələyə birmənalı prizmadan yanaşmaq olmaz: "Təbii ki, ucqar kəndlərdə çalışan gənc müəllimlərə bu kimi güzəştlərin edilməsi yaxşıdır. Onlara həm sosial şəraitin yaradılması, həm də maddi baxımdan yardım olunması normaldır. Bu kimi güzəştlər gənc müəllimləri ucqarlarda işləməyə həvəsləndirir. Elə adamlar var ki, o cür bölgələrdə yaşayıb müəllim işləmək istəyir. Ancaq məsələ ondadır ki, bunun üçün gərək normal şərait olsun. Ümumi olaraq bütün bunlar yaxşıdır, hökumətin kənd məktəblərində işləmək istəyən gənc kadrlara qayğısıdır. Ancaq məsələnin ikinci tərəfi var. O da ondan ibarətdir ki, nəzərdə tutulan güzəştlərin heç də hamısı bəzən reallaşmır. Gələn məlumatlar və giley-güzarlar ondan ibarətdir ki, işləməyə getdikləri yerlərdə müvafiq vəzifəli şəxslər onlara heç də həmişə şərait yaratmır. Bax, problemlər də çox vaxt bundan qaynaqlanır. Çox vaxt bu kimi süni problemlər üzündən cavan müəllimlər kəndə işləməyə getmək istəmir. Ona görə də sözügedən məsələyə nəzarət artırılmalıdır ki, imtiyazlardan müəllimlər istifadə edə bilsin. Bu kimi inzibati maneələr aradan qaldırılarsa, problem öz həllini tapar və kəndlərimiz müəlimsiz qalmaz".

DİGƏR XƏBƏRLƏR

Tarix: 13.07.2026 / 14:34

Məktəblərdə vakant müəllim yerlərinin gizli saxlanması faydadan çox ziyan vurur...(?)...

Tarix: 13.07.2026 / 11:48

Saxta keçidlərə daxil olmayın, OTP kodlarını paylaşmayın! - DİN-dən xəbərdarlıq...

Tarix: 13.07.2026 / 10:01

Bakı–Quba yolunda yanacaqdaşıyan avtomobil alışdı - VİDEO

Tarix: 13.07.2026 / 09:20

Füzulinin minalanmış ərazilərində yanğın başlayıb

Tarix: 12.07.2026 / 12:03

Hacıqabulda avtobus aşdı, 30-dan çox sərnişin yaralandı...

Tarix: 11.07.2026 / 19:45

"Soyqırım və deportasiya qurbanlarına dəstək" adlı layihənin icrası davam edir

Tarix: 11.07.2026 / 19:03

Yazıçı-publisist Aydın Tağıyevin kitabının təqdimatı olub - FOTO

Tarix: 11.07.2026 / 09:44

Vətənə və xalqa xidmət edən ömür Doğum gününüz mübarək, hörmətli Rasim Məmmədov!

Tarix: 10.07.2026 / 19:55

Ermənilərin məhkəməsi çıxışlarla davam etdirilib FOTO

Tarix: 10.07.2026 / 18:40

Xaricdə təhsil şirkətləri ilə bağlı vətəndaşlara xəbərdarlıq edildi... - "özünü "təhsil ekspertləri" kimi təqdim edənlər..."

Tarix: 10.07.2026 / 17:35

Nazir Vilayət Eyvazovun göstərdiyi rəqəmlərlə bağlı müzakirə başladı - necə və hansı üsullarla?...

Tarix: 10.07.2026 / 17:19

Professor Məhərrəm Zülfüqarlının “ Atillanın yeni sərgüzəştləri” kitabı nəşr olundu - FOTO

VİDEO

Tarix: 27.11.2025 / 11:10

Biri ermənini öpür, biri sovet bayrağı qaldırır... Günümüzə baxın! - VİDEO

Tarix: 12.11.2025 / 11:05

Lavrov işdən kənarlaşdırılır, yoxsa oyun qurulur? - VİDEO

Tarix: 21.06.2025 / 08:15

Dünyada xaos böyüyür, Azərbaycana təhlükə də artır... - VİDEO

Tarix: 09.07.2026 / 21:52

İrandan Trampa “İrəvan mesajı” - sülh olmasa, TRIPP marşrutuna dözmərik...

Tarix: 09.07.2026 / 19:38

Vətəndaşın məmurlarla birbaşa ünsiyyətində sıfır hədd - rəqəmsallaşma dövrünün hədəfi...

Tarix: 09.07.2026 / 18:51

Çin və ABŞ-ın mübarizə apardığı Gürcüstan limanında Azərbaycan həlledici söz sahibinə çevrilir...

Diasporumuza Rusiyada problemlər yaradılandan sonra Avropa, Amerika istiqamətində fəallıq başladı...