Avro-2020: Bakının təşkilatçılığının ölkəmiz üçün əhəmiyyəti

Azərbaycan 2000-ci ildən bu yana bir sıra nüfuzlu beynəlxalq yarışlara ev sahibliyi edib. Rəsmi məlumatlara görə, indiyə qədər ölkəmizdə 300-dən artıq müxtəlif istiqamətli beynəlxalq idman yarışları keçirilib. Azərbaycanın günü-gündən inkişaf etməsi, ölkəmizin iqtisadi vəziyyətinin yüksəlməsi, eyni zamanda da siyasi nüfuzu onun dünya dövlətləri sırasında xüsusi çəkiyə malik olmasına səbəb olub.
Məlumdur ki, respublikamızda futbolun inkişafı ilə bağlı xeyli sayda rəsmi qərarlar qəbul olunub. Bilirik ki, Azərbaycan Respublikasının Prezidenti cənab İlham Əliyevin "Azərbaycan Respublikasında 2005-2015-ci illərdə futbolun inkişafına dair Dövlət Proqramı"nı imzalaması bu sahədə yeni inkişaf xəttinin yaranmasına səbəb oldu. Özündə bir neçə maddəni əks etdirən Dövlət Proqramında milli futbolumuzun inkişaf yolları, uğur və nailiyyətləri hədəflənib. Burada diqqətçəkən əsas məsələlərdən biri respublikamızda uşaq futbolunun inkişafı ilə bağlıdır. Əlbəttə, belə ciddi bir oyunun daha geniş səviyyədə inkişafı gərəklidir. Məlum olduğu kimi, Azərbaycanda futbol sahəsində də bir neçə beynəlxalq səviyyəli oyun keçirilib. Onlardan biri 2012-ci ildə ölkəmizdə 17 yaşadək qadınlar arasında təşkil olunan dünya çempionatının keçirilməsidir. Sözügedən dünya çempionatının ölkəmizdə təşkili və onun keçirilməsi üçün hərtərəfli şəraitin yaradılması beynəlxalq aləmdə razılıqla qarşılanıb.
Son illər Azərbaycanda ən çox müzakirə edilən məsələlərdən biri respublikamızın Avro-2020-yə ev sahibliyi etməsi istəyində olmasıdır. Azərbaycan tərəfi hələ buna razılıq almasa da, ümidimizi itirməmişik. Bəllidir ki, Azərbaycanda Avro-2020-nin keçirilməsi üçün hər cür şərait var. Bunu dövlət rəsmiləri də qeyd edir. Hətta dünyanın nüfuzlu futbol qurumlarına rəhbərlik edən şəxslər də etiraf edir ki, Azərbaycanda gözəl infrastruktur, əla təşkilatçılıq var və Bakıda keçiriləcək dünya çempionatı da belə möhtəşəm yarışlara hazırlıqdır.
Onu da qeyd edək ki, artıq Avro-2020-nin Bakıda keçirilməsi üçün sifariş kitabı UEFA-ya təqdim olunub və
2020-ci ildə futbol üzrə Avropa çempionatının keçirilməsi üçün AFFA tərəfindən Bakı şəhərinin namizədliyi irəli sürülüb. Onu da yadınıza salaq ki, bu məsələ Azərbaycan Respublikasının Prezidentini də ciddi maraqlandırır. Belə ki, 2013-cü il mayın 22-də Azərbaycan Prezidenti İlham Əliyev Bakı şəhərinin namizədliyinin irəli sürülməsi ilə bağlı tədbirlər haqqında sərəncam imzalayıb.
Sərəncama əsasən, sifariş kitabının hazırlanması və bununla bağlı təşkilati işlərin görülməsi Azərbaycan Futbol Federasiyaları Assosiasiyasına həvalə olunub. Qeyd etdiyimiz kimi, artıq AFFA tərəfindən sifariş kitabı hazırlanıb və təyin olunmuş vaxtdan əvvəl UEFA-ya təqdim olunub.
Onu da bildirək ki, artıq UEFA Avro-2020 çempionatının final mərhələsi matçlarının keçirilməsi üçün sifarişlər üzrə qiymətləndirmə hesabatını dərc edib. Hesabat milli assosiasiyalar tərəfindən bütün dosyelərin dəqiq təhlilindən sonra hazırlanıb. Hazırlanmış hesabatda Bakının turnirə hazırlığı yüksək qiymətləndirilib. Bu barədə mediada fikirlər dərc olunub":Bakının sifarişi ölkənin bütün siyasi və biznes strukturları tərəfindən yüksək səviyyədə zəmanət olmasını nümayiş etdirir".
Onu da nəzərinizə çatdıraq ki, UEFA-nın hesabatında Azərbaycanda mövcud siyasi və iqtisadi sabitlik, habelə yerli assosiasiya ilə dövlət arasında möhkəm əlaqələr olması qeyd edilir. Orada bildirilir ki, bu faktlar Azərbaycanın sifarişinin hərtərəfli hazırlanmasını nümayiş etdirir. Bakıda yeni (69.870 yerlik) Olimpiya stadionunun tikilməsi, sosial məsuliyyət və sabitlik, sifarişin konsepsiyası və məzmunu, hüquqi aspektlər, nəqliyyat və şəhər daxilində hərəkət, qonaqların yerləşdirilməsi, tədbirin təşviqi və kommersiya məsələləri də qeyd edilib. Hesabatda azarkeşlərin yerləşdirilməsi ilə əlaqədar deyilir ki, Bakıda məhdud sayda müştəri üçün nəzərdə tutulan otellər hələlik çox deyil, lakin qonaq evləri, icarəyə verilən mənzillər və universitet yataqxanaları kimi alternativ variantlar da var.
Artıq Azərbaycanın tanınmış futbolçuları da ölkəmizin qərarını təqdir edir və bu barədə fikirlərini mətbuata çıxarırlar. Tanınmış futbolçu Rəşad Sadıqov yerli mətbuata açıqlamasında "Azərbaycanın Avropa çempionatını keçirməyə namizədliyini verməsinə müsbət yanaşıram. Ölkəsində belə bir yarışın keçirilməsini kim istəməz?" deyə bildirib.
Xatırladaq ki, Azərbaycanın bu oyunu Gürcüstanla birgə keçirməsi haqda fikirlər var. Təcrübəli futbolçu Azərbaycanın Gürcüstanla birgə Avro-2020-ni keçirməsi məsələsinə münasibət bildirərkən deyib ki, ideyanı dəstəkləyir, ancaq turnir ölkəmizdə keçirilsə, daha möhtəşəm olar": "Namizədliyini verən başqa ölkələrlə rəqabət aparmaq çox çətin olacaq. Ancaq inanmaq istərdim ki, sonda turnir Azərbaycanda keçiriləcək".
Azərbaycan artıq dünyada bir idman dövləti kimi də özünü göstərə bilir. Respublikamızda həm futbol komandaları inkişaf edir, həm onların geniş heyətdə məşq etməsi, oyun keçirməsi üçün stadionlar tikilib istifadəyə verilir. Axır zamanlar milli futbol sahəsində də xeyli irəliləmə müşahidə olunur. Bütün bunlar isə, təbii ki, dövlətin sözügedən sahənin inkişafında nə qədər maraqlı olmasının bariz nümunəsidir. Belə ki, Azərbaycan dövləti idmanın həm gənc nəslin sağlam böyüməsi, həm də ölkəmizin beynəlxalq nüfuzu baxımından böyük əhəmiyyət daşıması amilini həmişə ön planda tutaraq siyasətini buna uyğun şəkildə qurur. Ölkəmizdə idman infrastrukturunun yenilənməsi, bu sahədə əsaslı baza yaradılmasının təmin edilməsi istiqamətində böyük islahatlar həyata keçirilib. Azərbaycan bu sahədə dünyanın bir çox ölkəsinə örnək ola biləcək işlər həyata keçirir və bu da beynəlxalq idman qurumları tərəfindən təqdir edilir.
Azərbaycan Respublikası Prezidentinin digər sahələrlə yanaşı, idman aləmində də həyata keçirdiyi uğurlu siyasət idmanı Azərbaycanda inkişaf etdirib, ona güclü maraq yaradıb. Bu gün Azərbaycanda valideynlər heç bir maneə ilə üzləşmədən uşağını idmana qoyur, futbola yazdırır. Demək olar ki, Bakıda, rayonların əksəriyyətində futbol meydançaları, idman zalları fəaliyyət göstərir. Hazırda ölkədə geniş infrastruktur layihələri həyata keçirilir və bunun nəticəsi olaraq beynəlxalq idman qurumları dünya və Avropa birinciliklərinə ev sahibliyini Azərbaycana verəndə heç bir tərəddüd keçirmir, əksinə, Bakının bu işin öhdəsindən layiqincə gələcəyinə əmin olduqlarını açıqlayırlar. Bu mənada ümid etmək olar ki, Avro-2020-nin də Azərbaycanda keçirilməsi çətinliklə müşayiət olunmayacaq. Azərbaycan indi 1990-2000-ci illərdəki Azərbaycan deyil. Köklü surətdə müsbət istiqamətdə dəyişikliklərə nail olub. Ölkənin hərtərəfli vəziyyəti dəyişib. O da sirr deyil ki, beynəlxalq idman təşkilatları dünya və Avropa çempionatlarına ev sahibliyini inkişaf etmiş, dünyada öz sözünü deməyi bacaran, günü-gündən tərəqqiyə doğru gedən Azərbaycanın paytaxtına etibar edə bilərlər. Artıq beynəlxalq federasiyalar, futbol qurumları Azərbaycanda təşkil ediləcək turnir üçün heç bir problem olmayacağına, əksinə, yarışın ən yüksək səviyyədə keçiriləcəyinə inam bəsləyir. Çünki dünyanın gözü, hər zaman oluğu kimi, indi də Azərbaycandadır. Kənardan ölkəmizin nailiyyətləri, keçirdiyi beynəlxalq yarış və turnirlər daha yaxşı və şəffaf görünür. Məsələ buasındadır ki, Azərbaycanda, paytaxt Bakıda keçirilən idman yarışlarına yaradılan şərait deyərdik bəlkə də başqa ölkələrdən artıq olur. Çünki yarış keçiriləndə ölkədə bütün səylər o yarışın uğurla keçirilməsinə yönəlir. Bu da ondan irəli gəlir ki, Azərbaycan xalqı və dövləti qonaqpərvərdir, evinə gələn hər kəsə şəfqətlə yanaşmağı bacarır.
Azərbaycan dövlətinin regionda lider dövlət olması, bölgədə söz sahibinə çevrilməsi dünyanın nəzərindən yayınmır. Bilirik ki, Azərbaycan bu gün bütün imkanlarına, potensialına, beynəlxalq aləmdəki nüfuzuna görə qonşu respublikalardan, xüsusən də Ermənistandan qat-qat güclüdür. 2020-ci ildə nufuzlu turnir Azərbaycanda keçirilərsə, bununla bir daha Ermənistanın nüfuzuna kölgə salmış olacağıq.
Əlimizdə 2020-ci ildə futbol üzrə Avropa Çempionatının oyunlarını qəbul etmək üçün bir sıra şəhərlərin sifariş kitabının siyahısı var. Ancaq bu siyahıda Ermənistanın adı yoxdur.
Qeyd edək ki, namizəd şəhərlər arasında Bakı (Azərbaycan), Minsk (Belarus), Brüssel (Belçika), Sofiya (Bolqarıstan), Kopenhagen (Danimarka), London (İngiltərə), Skopye (Makedoniya), Münhen (Almaniya), Budapeşt (Macarıstan), Roma (İtaliya), Amsterdam (Niderland), Dublin (İrlandiya), Buxarest (Rumıniya), Sankt-Peterburq (Rusiya), Qlazqo (Şotlandiya), Bilbao (İspaniya) və digərlərinin adları var.
Ekspertlər hesab edir ki, respublikamızın bu nüfuzlu idman yarışına ev sahibliyi etmək şansı yüksəkdir.
Yuxarıda qeyd etdiyimiz kimi, Azərbaycan Respublikasının Prezidenti İlham Əliyev tərəfindən "Azərbaycan Respublikasında 2005-2015-ci illərdə futbolun inkişafına dair Dövlət Proqramı" təsdiq olunub. Bu proqrama uyğun olaraq ölkəmizdə futbolun inkişafı istiqamətində ciddi addımlar atılıb və artıq görülən işlər öz bəhrəsini verməkdədir. Son Dünya Çempionatına seçmə oyunlarında Azərbaycanın ilk dəfə 9 xal qazanması, ayrı-ayrı futbol klublarımızın tədricən yaxşı nəticələr göstərməsi, "Neftçi" klubundan sonra "Qarabağ" klubunun da UEFA-nın qrup mərhələsinə vəsiqə qazanması, uşaq futbol məktəbinin inkişaf etdirilməsi və s. deyilənlərə nümunə ola bilər. Beləliklə, həm futbolun inkişafı istiqamətində atılan addımlar, həm də bu vaxta qədər ölkəmizdə həyata keçirilən nüfuzlu beynəlxalq yarışlar, gerçəkləşdirilən nəhəng infrastruktur layihələri, idman bazaları və idmançılarımızın qazandığı uğurlar Azərbaycanın Avro-2020 futbol çempionatı kimi nəhəng yarışa ev sahibliyi etməsi üçün müsbət zəmin yaradır.
Ekspertlərə görə, Bakının namizədliyi təsdiqlənərsə, bu, Azərbaycanın dünyada daha da tanıdılması istiqamətində atılan böyük addım olacaq.
Dövlət rəsmiləri qeyd edir ki, 2020-ci il futbol üzrə Avropa Çempionatının Bakıda keçirilməsi ölkənin tanıdılması və Azərbaycan futbolunun inkişafı üçün gözəl imkandır. Gənclər və idman naziri Azad Rəhimovun yerli mətbuatda yer alan fikirlərinə görə, Bakının namizədliyi təsdiqlənsə, hazırda tikintisi davam edən, 68 min tamaşaçı tutumuna malik Bakı Olimpiya stadionu Avropa Çempionatının oyunlarını keçirmək imkanına malik olacaq: "Əgər qitə birinciliyinin keçirilməsi bir neçə ölkə arasında bölünsə, onda bizdə, həmçinin, beynəlxalq standartlara cavab verən, əsaslı təmir edilən Tofiq Bəhramov adına Respublika stadionu da var".
Üzümüzə gələn ildən başlayaraq Azərbaycan yeni idman uğurlarına şahidlik etməyə hazırlaşır. Hesab edirik ki, indiyə qədər olan yarışların hamısından üzüağ çıxmağı bacaran Vətənimiz, paytaxtımız 2015-ci ildə keçiriləcək I Avropa Oyunlarına qucaq açacaq, sonra isə ev sahibi olmağımızı arzu etdiyimiz Avro-2020-nin yolunu gözləyəcək. Ümid edirik ki, bölgədə hər zaman sülhün, əmin-amanlığın, inkişafın, tərəqqinin dostu olan Azərbaycan dövlətinin belə bir nüfuzlu, mötəbər turniri öz paytaxtında keçirməsinə razılıq veriləcək və Azərbaycanın səsi bütün dünyada eşidiləcək.

İradə SARIYEVA
Məqalə Azərbaycan Futbol Federasiyaları Assosiasiyası və Azərbaycan Respublikasının Prezidenti Yanında Kütləvi İnformasiya Vasitələrinin İnkişafına Dövlət Dəstəyi Fondunun birgə keçirdiyi müsabiqəyə təqdim edilir.