Əməkdar müəllim, professor Şəhla Əliyevanın uğur yolu…
Müəllim ömrü çağlayan bulaqdır, ətrafını yaşıllaşdıran, gözəlləşdirən bir bulaq. O bulağın suyundan içənlər əbədi səadətə qovuşublar. Müəllimin işi əzəl gündən öyrətməkdi, yetişdirməkdir. Hansı sahədə müəllim adlı ağacın bəhrəsi yoxdur ki…Hər birimiz qazandıqlarımıza görə ikinci valideynimiz sayılan müəllimə bocluyuq.
Müəllim qadın olanda onun həm də analıq şəfqətini görürük, mehriban çöhrəsinin işığında duruluruq.
Pedaqogika elmləri doktoru, professor, Əməkdar müəllim Şəhla Qasım qızı Əliyeva Azərbaycan təhsilinin və elminin tanınmış simalarından biridir. Şəhla xanımın yetirmələrinin səsi-sədası, xoş sorağı dünyanın harasından gəlmir ki…
8 Mart Beynəlxalq Qadınlar Günü ərəfəsində cəmiyyətimizin işıq gələn tərəfi olan qadın müəllimlərimizdən biri - pedaqogika elmləri doktoru, professor, Əməkdar müəllim Şəhla Əliyevadan danışmaq istəyirik. Fikrimizcə, Şəhla xanım kimi analarımızın, ziyalı qadınlarımızın həyat yolu, fəlaiyyəti, uğur hekayəsi gənc xanımlar üçün böyük örnəkdir. Biz örnək olanları daha çox təbliğ etməliyik ki, gənc qızlarımız onların yolunun davamçısı olsunlar. Bu mənada professor Şəhla Əliyeva haqda danışmaq yerinə düşərdi, düşüncəsindəyik.
Şəhla xanım Qərbi Azərbaycanın Zəngibasar rayonunun Qaraqışlaq kəndində anadan olub. Bakı şəhəri 155 nömrəli orta məktəbi bitirib. Ailəlidir. Bir oğlu var.
ADPU-ni (keçmiş V.İ. Lenin adına Qırmızı Əmək Bayrağı Ordenli APİ) fərqlənmə diplomu ilə bitirib. Təhsil aldığı illərdə fakültə komsomol təşkilatı katibi, sonra institut Komsomol Komitəsinin üzvü olub, ali məktəbi bitirdikdən sonra İnstitut Komsomol komitəsində çalışıb.
Şəhla xanımın qəlbində dərindən kök salan öyrətmək sevgisi, elm sahəsində öz sözünü demək arzusu onu bu sahəyə əbədiyyən bağlayıb.
1993-cu ildə namizədlik dissertasiyasını müdafiə edərək pedaqogikanın nəzəriyyəsi və tarixi ixtisası üzrə elmlər namizədi elmi dərəcəsini alıb, 1997-cı ildə dosent elmi adına layiq görülüb, 1996-cı ildə Pedaqogika və psixologiya fakültəsində dekan müavini, 1997 -2001 -ci illərdə
ADPU Pedaqogika və psixologiya fakültəsinin dekani vəzifələrində çalışıb, 2014-cü ildən pedaqogika elmləri doktoru, professordur.
2011-2022-ci illərdə ADPU-nun Məktəbəqədər təhsil fakültəsinin dekani vəzifəsində çalışıb.
2023-cü ildən ADPU-nun “Pedaqoji psixologiya “ kafedrasının müdiridir.
Elm sahəsində pillə-pillə uğurla və mətanətlə irəliləyən Ş.Əliyeva üçün auditoriya ən müqəddəs məkandır. Tələbələrə Pedaqogika, Sosial pedaqogika, Pedaqogika tarixindən dərs deyir, bu vacib və həssas ixtisasların incəliklərini öyrədir.
Ş.Əliyevanın elmi əsərləri barədə də danışmaq istəyirik. Professor 100-dən çox elmi - metodiki məqalənin (3 məqalə Web of Science Core Collection), tezislərin, 3 monoqrafiyanın, 15 kitabın müəllifidir. Pedaqogikanın, məktəbəqədər pedaqogikanın nəzəriyyəsi və tarixi, sosial pedaqogikanın problemləri ilə bağlı Azərbaycan, Rusiya, Türkiyə, Ukrayna, Özbəkistan, Qazaxıstanda keçirilən beynəlxalq seminar, simpozium və konfranslarda iştirak edib. Respublikamızda və xaricdə 22 beynəlxalq və respublika konfransının iştirakçısı olub.
ADPU-da keçirilən “İlin alimi” müsabiqəsinin qaliblərindən biri olub. 2016-cı ildən hazıra kimi Azərbaycan Respublikası Prezidenti yanında AAK-ın ADPU-nun nəzdində fəaliyyət göstərən Dissertasiya Şurasının üzvüdür.
“Məktəbəqədər və ibtidai təhsil” jurnalının ADPU-nun elmi əsərləri olan “Pedaqoji Universitetin Xəbərləri” elmi jurnalının “Humanitar, ictimai və pedaqoji-psixoloji elmlər seriyası”nın redaksiya heyətinin üzvü, “Musiqi elmi, mədəniyyət və təhsilin aktual problemləri” jurnalının redaksiya komissiyasının məktəbəqədər təlim və tərbiyə ixtisası üzrə sədridir. Ş.Əliyeva 2018-ci ildən Özbəkistan Əndican Dövlət Pedaqoji Universitetinin “İlmiy xabarnoma. Pedaqoqik tadқiқotlar” jurnalının, 2019- cu ildən Ankara Eğitim Araştırmaları Dərgisinin elmlər doktoru proqramı üzrə işləyən doktorantların elmi məsləhətçisi, fəlsəfə doktoru proqramları üzərində çalışan doktorantların elmi rəhbəridir. Bir çox beynəlxalq layihələrin iştirakçısıdır.
ADPU-da “Müasir təhsil və tədrisə yardım mərkəzi”, “Dünyaya baxış” təşkilatı və Azərbaycan Respublikası Təhsil Nazirliyinin dəstəyi ilə inklüziv təhsilə dair pilot layihənin həyata keçirilməsində fəal iştirak edib. Avropa İttifaqının texniki yardımı çərçivəsində Azərbaycan Respublikasının Təhsil Nazirliyinin “Azərbaycanda Milli Kvalifikasiya Çərçivəsinin İcrasına Dəstək” layihəsi üçün “Uşaq baxıcısı” peşə standartının, kvalifikasiya standartları və qiymətləndirmə standartlarının hazırlanması prosesində iştirak edib. Azərbaycan Respublikası Milli Kvalifikasiya Çərçivəsi layihəsində peşə standartları hazırlayan işçi qrupun üzvü olaraq ixtisasın modul dərs vəsaitlərini hazırlayıb. Avropa İttifaqının “Azərbaycanda vətəndaş cəmiyyətinin iştirakı ilə təhsil sisteminin müasirləşdirilməsi və inklüziv təhsilin tətbiqi” proqramı çərçivəsində Hey- dər Əliyev Fondunun “Regional İnkişaf” İctimai Birliyi tərəfindən həyata keçirilən “Müəllimlərin inklüziv təhsil sahəsində bacarıqlarının artırılması” layihəsi və YUNİSEF tərəfindən həyata keçirilən “Azərbaycanda əlilliyi olan uşaqlar üçün inklüziv keyfiyyətli təhsilin genişləndirilməsi” layihəsində ADPU üzrə işçi qrupun üzvüdür
Şəhla Əliyevanın elm və təhsil sahəsində əldə etdiyi nailiyyətlər, imza atdığı uğurlar onun öz zəhmətinin, gərgin əməyinin bəhrəsidir. Alın təri ilə qələmin qüdrətindən, iti ağlın və zəkanın hikmətindən doğan bu əsərlər, bu fəaliyyətlər Azərbaycan qadınının möhtəşəmliyinin təntənəsidir. Bütün bunları yaradan Azərbaycan qadınıdır, bütün gözəllikləri, bütün bayramları içdən yaşamağı haqq edən Azərbaycan qadını!
Bayramınız mübarək!
İradə SARIYEVA
