Mənzil-Tikinti Kooperativlərinin (MTK) əksəriyyəti heç bir iqtisadi səbəb olmadan “kommunal pulu” adlandırdıqları aylıq ödənişlərdən əlavə sakinlərdən “generator” pulu da yığırlar. Bu isə bir sıra yeni inşa edilmiş yaşayış binalarında sakinlərlə MTK sahibləri arasında narazılığa səbəb olub.
Qeyd edək ki, binanın girişində vətəndaşlardan pul tələb edən elan yerləşdirilir. Həmin elanda qeyd edilir ki, işıqlar sönərkən liftlərin işləməsi və suyun gəlməsi üçün binaya generator alınmalıdır. MTK-lar bunun üçün mənzil sakinlərindən 100 manat tələb edir.
Maraqlıdır, MTK-ların sakinlərdən bu cür ödəniş tələb etməsi nə dərəcədə düzgündür?
“Zaman keçdikcə həmin binalarda xərclər artır, buna yeni liftlər, dam örtüyünün dəyişdirilməsi və sair xərclər daxildir”
Əmlak eksperti Elnur Fərzəliyev bildirdi ki, ölkəmizdə yeni tikili binalarla bağlı idarəetmələr müxtəlif formada aparılır: “Bakı, Sumqayıt və Abşeron ərazilərində kommunal xərclər hər kvadratmetrə görə 20 qəpikdən iki manata kimi dəyişir. Bəzi binalarda yığılan pullar binanın idarəolunmasına bəs etməsə də, bir çox binalarda yığılan vəsaitin həcmi çox, xərclənən isə az olur. Hazırda Bakı, Sumqayıt və Abşeron ərazilərində 2000-dən artıq çoxmənzilli yaşayış binası var. Onların böyük hissəsinin yaşı 10 ili ötür. Zaman keçdikcə həmin binalarda xərclər artır. Buna yeni liftlər, dam örtüyün dəyişdirilməsi və sair xərclər daxildir. Qanunvericilikdə bina tikilib təhvil verildikdən sonra sakinlər MMMC qurmalı və idarəetməni təşkil etməlidirlər. Təbii ki, bu, sakinlər tərəfindən aparılırsa, kommunal pulu az, xidmət yüksək olar. Çünki sərf edilən xərclərə nəzarət oluna bilər. Məlumdur ki, çoxmənzilli binalarda yığılan pullardan əlavə büdcə formalaşdırılmalıdır. Gələcəkdə nəsə olanda pul büdcədən ödənilsin. Təəssüflər olsun ki, çox az MTK-da bu formada idarəetmə var. Sakinlər tərəfindən binaların idarəolunması ilə bağlı maarifləndirmə aparılmalı, inzibatçı seçilərkən müəyyən kurslar keçməlidir. Daşınmaz əmlakların satış qiymətləri bahadır. Binaların görünüşü dağılırsa, həyətində natamamlıq olursa, oradakı mənzilin bazar dəyəri normal qiymətlərdən aşağı olur. Yəni alıcı köhnə binalara kapital yatırmaq istəmir. Eyni zamanda, binaların qorunması və xərclərin istifadə olunması vətəndaşların kapitallarını da dəyərdə saxlayır. Yeni yaşayış massivlərinin idarəetməsi ilə bağlı qurum yaranarsa, yığılan kommunalın ödənişini aşağı salar, keyfiyyəti də yüksək olar”.
Günel CƏLİLOVA
