Rasif Bağırov: “Virus hava-damcı yolu ilə də keçdiyi üçün açıq havada da maska taxılmalıdır”
2019-cu ilin dekabrında Çində yayılmağa başlayan və dünya ölkələrində geniş yayılan koronavirus pandemiyası nəticəsində ölüm hallarının kəskin artması müşahidə olunur.
Bunun nəticəsidir ki, bir çox ölkə yenidən xüsusi karantin rejimi tətbiq edir, qaydaları sərtləşdirir.
Avropanın əksər ölkəsində gün ərzində koronovirusa yoluxma artdığı üçün karantin qaydaları ilə bağlı tədbirlər gücləndirilir. Həmçinin, Azərbaycanla qonşu ölkələr – Gürcüstan, Rusiya, İran, Türkiyədə yoluxma saylarının artımında dinamika müşahidə olunur.
Çox təəssüf ki, Azərbaycanda da koronavirusa yoluxmada artım qeydə alınır. Bütün dünyada olduğu kimi, Azərbaycanda da koronavirusa yoluxanların sayında artım müşahidə edilir, sanitar-epidemioloji durum pisləşir.
Açıqlanan statistikadan məlum olur ki, insanlar qaydalara əməl etmirlər. Nazirlər Kabineti yanında Operativ Qərargahdan verilən məlumata görə, noyabrın 19-da Azərbaycanda koronavirusa (COVID-19) 2597 yeni yoluxma faktı qeydə alınıb, 1354 nəfər müalicə olunaraq sağalıb və evə buraxılıb. 23 nəfər COVID-19-dan vəfat edib. Aktiv xəstə sayı 23476 nəfərdir. Ölkədə son sutka ərzində 12874, hazırkı dövrədək isə 1562442 test aparılıb. Ümumi ölənlərin sayı 1053 nəfərdir. Ümumi yoluxanların sayı 83994 nəfər, ümumi sağalanların sayı 59465 nəfərdir.
Son günlər COVID-19-a yoluxmanın 2000-dən yuxarı olması və rəqəmlərin gündəlik əsasda artım tendensiyası vəziyyətin çox təhlükəli olduğundan xəbər verir. Burada ölüm hallarının da sayının artması hər kəsi narahat edir.
Bütün bunlar nəzərə alınaraq Azərbaycanda karantin müddəti yenidən uzadıldı. Karantinlə bağlı açıq və qapalı məkanlarda tibbi maska taxmaq məcburi oldu. Belə ki, 2020-ci il 21 noyabr tarixindən etibarən xüsusi karantin rejiminin qüvvədə olduğu müddətdə ölkə üzrə bütün qapalı və açıq məkanlarda müvafiq qaydada tibbi maskalardan istifadə məcburi hesab olunur.
Nazirlər Kabineti “Xüsusi karantin rejimində tənəffüs yollarını qoruyan fərdi vasitələrdən istifadə ilə bağlı əlavə tədbirlər haqqında” qərar verib. Azərbaycan Respublikasının ərazisində yeni növ koronavirus (COVID-19) infeksiyasının insanlar arasında kütləvi yayılmasının qarşısının alınması məqsədilə açıq havadakı ictimai yerlərdə tənəffüs yollarını qoruyan fərdi vasitələrdən (tibbi maska, parça maska, respirator və sair) istifadə edilməsi məcburidir. Kimsə bu qaydaya əməl etməsə, inzibati qaydada məsuliyyətə cəlb olunacaq.
- “…koronavirusun yayılmasına şərait yaradanlar 100 manat məbləğində cərimə olunacaqlar”
Həkim-ekspert Rasif Bağırov bildirdi ki, bütün dünyada koronavirusla bağlı vəziyyət getdikcə pisləşir və yoluxanların sayında artım müşahidə olunur. Ağır xəstələrin və ölənlərin sayı artır. Azərbaycanda da oktyabrın əvvəllərindən başlayaraq yoluxanların sayında mənfi tendensiya başlayıb. Təbii ki, bu, hər birimizi narahat edir. Nəzərə alsaq ki, biz Böyük Vətən Müharibəsi aparırıq. Müharibə ilə bağlı bütün diqqətimiz cəbhəyə yönəlib. Vətəndaşlarımızın da koronavirusa olan məsuliyyəti azalıb. Təbii ki, vəziyyət vətəndaşları daha ayıq-sayıq olmağa məcbur edir. Dövlət tərəfindən lazım olan bütün tədbirlər görülür. Xəstələrin müayinə və müalicəsi ilə bağlı hələlik heç bir problem yoxdur. Vətəndaşlar da dövlətlə bir məqsədə xidmət edən addımlar atmalıdırlar.
Həkim onu da vurğuladı ki, açıq və qapalı məkanlarda tibbi maska taxmaq zəruridir: “Məsuliyyəti artırmaq üçün müvafiq dövlət orqanları tərəfindən addımlar atılacaq. Belə ki, açıq havada da maskanın taxılması məcburi olduğu üçün bununla bağlı reydlər keçiriləcək. Eyni zamanda, qapalı yerlərdə sıxlığın aradan qaldırılması üçün də tədbirlər görüləcək. Açıq və qapalı məkanlarda tibbi maskadan istifadə etməyənlər, koronavirusun yayılmasına şərait yaradanlar 100 manat məbləğində cərimə olunacaqlar. İnsanlar bu xəstəliyə qalib gəlməsi üçün tibbi maska istifadə etməli və sosial məsafə saxlamalıdırlar”.
Həmsöhbətimiz onu da əlavə etdi ki, virus hava-damcı yolu ilə də keçdiyi üçün açıq havada da maska taxılmalıdır: “Nəzərə almaq lazımdır ki, virus hava-damcı yolu ilə insana keçir və onun hüceyrəsində yaşayır”.
Günel CƏLİLOVA
