O xanım həzin bir nəğməyə bənzəyir, səsi ilə can verdiyi şərqilərə elə oxşayır ki...Onu dinləyəndə sənə elə gəlir ki, lap uzaqdan gələn ilahi bir səsi duyursan, o səsin işığını daxilində, ruhunda hiss edə-edə ardınca gedirsən. Səni səsləyənin kim olduğunun fərqində olmursan, çünki səni qayibanə bir səs çağırır...
Oya Ergün - bu adı Azərbaycanda duymayan çox az adam tapılar. Xeyli müddətdir Bakıda yaşayan sənətçi həm musiqimizə aşiqdir, həm də şəhərimizə. Niyə də aşiq olmasın? Axı o bir Azərbaycan sevdalısıdır.
Ünlü Türkiyə vokalçısı, opera müğənnisi Oya Ergün Türkiyənin məşhur Mərmərə Universitetinin musiqi bölümünü bitirib, vokal müəllimi olaraq özünü göstərib. Uzun illər Hollandiyada yaşayıb. Sonra Vətəni Türkiyəyə qayıdıb. İndi isə Bakıdadır. Bakıya çox bağlanıb Oya Ergün. Sanki bu şəhərdə doğulub, boya-başa çatıb xanım sənətçi. Əlbəttə, Bakını sevmək üçün burada doğulmaq şərt deyil, əsas ruhun yaxınlığıdır.

Oya Ergün o qədər həssas həmsöhbətdir ki, onun danışığı, münasibəti, heyrəti və heyranlığı adama zövq verir. Oya xanım Azərbaycan musiqisini, xüsusən də dəyərli klassik irsimizi könüldən sevən bir vokal ustasıdır. Oya Ergün paytaxtın "Şəhər bağları" adlanan ərazisində yaşayır. Biz Oya xanımla onun mənzilində görüşdük. Oya Ergünlə təmasda olmaq, onun düşüncələrilə tanış olmaq çox maraqlıdır. Bilirdim ki, opera sənətçisinin dünya şöhrətli ölməz sənətkar Rəşid Behbudovun mahnılarından ibarət albomu işıq üzü görüb. Azərbaycan bəstəkarlarının əsərlərini, əbədiyaşar mahnılarını qüsursuz oxuyan Oya Ergün alboma "Sevgilim" adı verib. R.Behbudovun repertuarından "Ayrılıq", "Sevgilim", "Bakıda sabah", "Küçələrə su səpmişəm", "İncə geyərsən", "Nazəndə sevgilim", "Girdim yarın bağçasına", "Lalələr", "Sənə də qalmaz", "Reyhan", "Alagöz", "Ne proşay", "Moskva gecələri", "Bakıda axşam" kimi ölməz mahnıları öz səsi ilə canlandıran, onları yeni biçimdə həyata gətirən Oya Ergün mahnıları elə ürəkdən oxuyub ki... Bu əsərləri oxumağa həm böyük ürək, həm bənzərsiz istedad, həm də geniş düşüncə gərəkdir. Bunlar bütövlükdə Oya xanımda özünü ifadə edən keyfiyyətlərdir.
O bir Azərbaycan sevdalısıdır, o bir Rəşid Behbudov aşiqidir, o bir gözəllik vurğunudur... Oya xanım dedi ki, Bakıya gəlməzdən əvvəl də bizim mahnılarla tanış olub, Azərbaycan mahnılarını konsert proqramlarına daxil edərək oxuyub: "Azərbaycanı, Bakını çox sevirəm. Lap əvvəldən buranın bir musiqi cənnəti olduğunu bilirdim. Azərbaycan musiqisinə sevdalıyam və o üzdən burada olmaqdan çox məmnunam. Mən uzun illər qürbətdə yaşadım. İndi Bakıdayam, sanıram ki, öz vətənimdəyəm, burada özümü qərib saymıram, bura doğmadır mənə. Özümü öz evimdəki kimi xoşbəxt hiss edirəm və Bakıda musiqi fəaliyyətimi sürdürürəm. Azərbaycanın musiqi cənnətindən çox dəyərlər götürməkdəyəm. Bura gəlməyimin ən xeyirli tərəfləri odur ki, burada çox dəyərli musiqiçilərlə tanış oldum. Elə böyük musiqiçilərin adını eşitdim, səsləri ilə tanış oldum ki, Bakıya gələnə qədər onlardan xəbərim yox idi. Məsələn, bura gələnə qədər Şövkət Ələkbərova kimi böyük müğənni haqda məlumatım yox idi. Onun kimi dəyərli sənətkar haqqında öyrəndim, bundan başqa, burada çox dəyərli şərqilər, mahnılar öyrəndim. Ancaq Rəşid Behbudovun adını uşaqlıqdan duymuşdum, onun mahnılarına sevdalıydım. Mən hər zaman Rəşid Behbudovun heyranı olmuşam. Belə səs yoxdur. Allah ona rəhmət eləsin, möhtəşəm bir sənətkar olub. Mən klassik musiqi təmsilçisiyəm, Konservatoriyada müəllim idim. Mən Avropada musiqi təhsili almışam, orada Motsart, Bethoven və digər klassik musiqiçilərin irsini öyrənmişəm. Azərbaycanda çox böyük musiqiçilərin yaradıcılığını, xalq musiqisi örnəklərini öyrəndim və hələ də öyrənməkdə davam edirəm. Üzümüzə gələn il Avropada keçiriləcək bir çox festivala Rəşid Behbudovun mahnıları ilə qatılacağam. 2015-ci ildə Rəşid Behbudovun yüz illiyidir həm də. Bu il də festivala gedəcəyəm, orada da Rəşid Behbudovun repertuarından iki mahnı oxuyacağam. Türkiyədə də ünlü klassik musiqi təmsilçiləri var, ancaq onlar mənim ruhuma Rəşid Behbudov qədər nüfuz edə bilməyib. Dünya klassik musiqisində üç nəfərin səsini qeyri-adi, ilahi səs sayıram. Onlardan biri Rəşid Behbudovdur, ikincisi Luçano Pavorottidir, üçüncüsü isə amerikalı tenor Rudolf Antoni Jozefdir. Mən vaxtilə Türkiyədə "Klassik müzik" dərgisi çıxarırdım, orada sənətçilərlə bağlı yazılar yazırdım. Əminəm ki, bu üç sənətçinin səsi kimi özəl səslər dünyada çox azdır. Bu səslər uçub gedən səslərdir, onun işığı hər ürəyə yayılır".


Oya xanımla diz-dizə, göz-gözə oturub xeyli söhbət etdik. Soruşdum ki, Oya xanım, Türkiyə Konservatoriyasında müəllim işləyirdiniz, tələbələriniz vardı, davamlı konsertlər verirdiniz. Müəllimliyi buraxıb bura gəldiniz. Deyə bilərsizmi istanbullu qızı Bakıya hansı rüzgar gətirdi?
Oya Ergün sualımı təbəssümlə qarşıladı və bildirdi ki, bura gəldiyi üçün təəssüflənmir, yaradıcılığını da, müəllimliyini də burada davam etdirir, konsertlər verir, festivallara gedir. Bir sözlə, musiqi həyatında yaşanan xoş ovqat ona zövq verir":Bilirsiz ki, uzun illər Hollandiyada təhsil almışam və orda yaşamışam. Həyat yoldaşımın işi ilə əlaqədar Azərbaycana köçdüm. Həyat yoldaşım təqaüdə çıxdıqdan sonra burdan bir iş təklifi aldı və təklifi qəbul etdi. Təbii ki, Azərbaycana gəlməklə bağlı mənim də fikrimi soruşdu, gəlmək istəyib-istəmədiyimi öyrəndi. Dedim ki, Azərbaycan əsl musiqi, sənət ölkəsidir. Burda özümü rahat hiss edərəm və qərar verdim ki, Azərbaycana gəlim. Bəli, universitet müəllimi idim. Müəllimlikdən ayrıldım və gəldim Azərbaycana. İstanbul Barosunda solistliyimə davam edirəm və ancaq konsertlərə gedirəm. Təəssüf ki, İstanbul Barosunda operalara qatıla bilmirəm. Azərbaycanda musiqi sənəti güclü olduğu üçün artıq fəaliyyətimi burda davam etdirirəm".


Bakının musiqi mühiti ilə yaxından tanış olmaqda davam edən Oya Ergündən bizim Bakı Musiqi Akademiyasında müəllim işləmək arzusunun olub-olmadığını da soruşduq. Oya xanım dedi ki, belə bir arzusu olsa belə, həm oğlunun körpə olması, həm də tez-tez xarici ölkələrdə konsertlər verməsi bu işə mane olub: "Bu ildən xaricdə işlərim bir qədər azalır. Fikrim var ki, bir neçə tələbəyə öz biliyimi aşılayım. Tələbələrlə məşğul olmaq, onları yetişdirmək fikrim var. Yeni nəsillə ünsiyyəti, onlarla işləməyi çox istəyirəm. Artıq yanıma gələnlər var, onlarla məşğul oluram".
Məşhur opera müğənnisi olan Oya xanımın Azərbaycan Akademik Opera və Balet Teatrı ilə hər hansı bir iş birliyinin olması arzuediləndir. Bu teatrla sənətçinin işbirliyinin, əməkdaşlığının olmaması, açığı, təəssüfləndirici haldır. Oya xanım dedi ki, vaxt azlığından bu teatrla tanış ola bilməyib, ancaq gələcəkdə əməkdaşlıq təklifi alarsa, bunu məmnuniyyətlə dəyərləndirər":Mən burada ilin 365 gününü olmuram, tez-tez gedib gəlirəm. Yaxud konsertə hazırlaşıram, öz üzərimdə işləyirəm, məşqlər edirəm. Allah qoysa, vaxtım olduqca bu məsələ ilə maraqlanacağam. Müasir opera müğənnilərinizdən Fidan Hacıyevanın, Azər Zeynalovun səsini dinləmişəm. İnşallah, yaxın vaxtlarda digər opera sənətçiləri ilə də tanış olacağam. Mən Azərbaycanda bəzi müğənniləri tanıyıram. Tünzalə Ağayeva ilə bir konsertim olub. Azərinlə də tanışam".

Oya Ergün vaxtaşırı Bakıda da konsertlər verir. Bir müddət əvvəl sənətçi öz evində konsert verərək musiqisevərləri başına yığmışdı. Əslində, Oya Ergün kimi tanınan opera sənətçilərini, gözəl səs sahiblərini istənilən yerdə dinləmək, seyr etmək maraqlıdır. Çünki Oya xanımın səsi hər zaman arzulanan bir səsdir. O səsin qanadlarında adamın ümidlərinin əlləri lap göylərə çatır... O səs günəş işığına qoşulub minillik yolları bir göz qırpımında qət etməyi bacarır...
Mayın 22-də Rəşid Behbudov adına Mahnı Teatrında Oya xanımın solo konserti olacaq. Bu konsertdən sonra da Oyasevərlər sənətçinin yeni konsert proqramlarını gözləyə bilər, çünki Oya Ergün tamaşaçılarla tez-tez görüşməkdə maraqlıdır. O ona və əsl sənətə, yüksək əyarlı musiqiyə, ipək səsə qiymət verməyi bacaran insanlara böyük dəyər verir.
Oya Ergün Azərbaycan mahnılarını o əsərlərin ruhunu əzmədən oxuyur. O mahnılara həssaslıqla yanaşan müğənni onlara Nilufər çiçəyinə toxunurmuş kimi sığal verir. Açığı, ilk dəfədir türkiyəli müğənninin Azərbaycan mahnılarına belə qayğı ilə yanaşmasının şahidi oluram. Oya xanım mahnıları Azərbaycan ləhcəsi ilə oxuyur, tələffüzündə qüsur yoxdur: "Opera müğənniləri bir çox dillərdə əsərlər oxuyur. Məsələn, mən Hollandiyada olduğum illərdə, bir qayda olaraq, 6 dildə mahnı oxuyurdum. Alman, italyan, ingilis, rus, holland və türk dillərində ifalar edirdim. Hətta yapon dilində də kiçik bir ariya oxumuşdum. Ana dili o dil olan müəllimlərimiz bizi davamlı olaraq çalışdırırdı. O dili bilməsək belə, italyan dilində oxuyacağımız əsərin üstündə çalışırdıq, tələffüz qaydalarını öyrənirdik, şeiri əzbərləyib onun mənasını bilirdik. Yəni öyrəndiyim musiqini dərindən mənimsəyirəm. Bu mənada, sözü sındırmaq mənim üçün qəbuledilməzdir. Sözə həssaslıqla yanaşıram. Mənim üçün sözləri o dildə danışan insanlar kimi söyləmək çox önəmlidir. Türkiyədə yaşadığım zamanlar Azərbaycan mahnıları oxuyurdum. İndi anlayıram ki, mahnıların sözlərini sındırıb oxumuşam, burada yaşadığım müddətdə bəzi şeyləri yanlış oxuduğumu indi fərq edirəm".
Azərbaycan musiqisinin nəhəngləri olan Üzeyir Hacıbəyovun, Zülfüqar Hacıbəyovun, Səid Rüstəmovun, Müslüm Maqomayevin, Ağabacı Rzayevanın, Firəngiz Əlizadənin, Tofiq Quliyevin, Cahangir Cahangirovun, Arif Məlikovun, Qara Qarayevin, Fikrət Əmirovun, Rauf Hacıyevin, Şəfiqə Axundovanın və başqa bəstəkarların əsərlərinə vurğun olan Oya xanım bildirdi ki, Firəngiz Əlizadəni dünya çapında dəyəri olan böyük, modern bir bəstəkar, musiqiçi sayır.

Oya xanım dedi ki, onun səsinə mahnılar yazan yoxdur hələlik, ancaq ruhuna yaxın oranjeman edənlər olub. Arzusu budur ki, Firəngiz Əlizadə onun səsinə uyğun mahnılar yazsın, o, da onları böyük məhəbbətlə ifa etsin: "Onunla Almaniyada tanış oldum. Bir konsertdə iştirak edirdim, orada onun da əsəri çalınırdı. Bu əsər məni o qədər valeh etdi ki, onun müəllifi ilə maraqlandım. Dedilər ki, azərbaycanlı bəstəkarın əsəridir. "Aman Allah, o da türkcə danışır" deyib dərhal Firəngiz xanımın yanına getdim. Təkrarən Amsterdamda görüşmək qismət oldu bizə".
"Biri sən, biri İstanbul" mahnısı Oya Ergünün repertuarında əvəzsiz bir yer tutur. Həsrət, nisgil dolu bu şərqi sevgilərin və ayrılıqların qovuşduğu ortaq nöqtədir. Oya xanımın bu mahnısı çox sevildi. O bildirdi ki, mahnının sözləri Qənirə xanım Paşayevaya, musiqisi isə Türkiyədə yaşayan yaxın dostu, orada Konservatoriya müəllimi işləyən, bəstəkar Emre Dündara aiddir":Qənirə xanım mənə kitabını bağışlamışdı. Kitabda "Biri sən, biri İstanbul" şeiri çox xoşuma gəldi, məni cəlb etdi. İstədim ki, bu şeirə mahnı bəstələnsin. Bəstə də çox gözəl oldu. Bu mahnı Türkiyədə də çox sevildi, bir çox telekanallarda izlənir. Bu mahnı ilə ilgili ancaq xoş hisslər keçirirəm...Hələ uzun illər Bakıda yaşamağı düşünürük. Bundan sonra qədər nə göstərəcək bilmirəm. Ancaq mən Bakıda olmaqdan çox mutluyum!"
Oya xanımla söhbətdən böyük zövq aldım. İnanıram ki, onun sözləri sizə də xoş gələcək.

İradə SARIYEVA