Az.TV niyə zərərlə işləyir...

Rəfail Becanov: “Prinsip etibarilə AzTV-nin gəlirləri digər televiziyalardan daha çox olmalıdır”

img

“Azərbaycan Televiziya və Radio Verilişləri” QSC-nin (AzTV) rentabelli olmadığı aydınlaşıb. Bunu AzTV-nin özünün açıqladığı maliyyə hesabatından görmək mümkündür.

Belə ki, telekanal 2019-cu ili 2,598 milyon manat xalis zərərlə başa vurub. Bu, 2018-ci ilə nisbətən 53,2% və yaxud 2,1 dəfə azdır. 2019-cu ildə AzTV-nin gəlirləri 34,242 milyon manat (2018-ci illə müqayisədə 5,1% çox), o cümlədən qeyri-birja əməliyyatlarından gəlirləri (dövlət büdcəsindən ayırmalar) 32,938 milyon manat (1,4% çox), birja əməliyyatlarından gəlirləri 541 min manat (5,9 dəfə çox), sair əməliyyat gəlirləri isə 763 min manat (əvvəlki il olmayıb) təşkil edib. İl ərzində Səhmdar Cəmiyyətin xərcləri isə 36,75 milyon manat (3,5% az), o cümlədən sərf etdiyi materialların dəyəri 1,017 milyon manat (7,8% çox), əmək haqqı xərcləri 19,021 milyon manat (16,6% çox), amortizasiya xərcləri 4,851 milyon manat (17,4% az), sair əməliyyat xərcləri isə 11,861 milyon manat (20,8% az) təşkil edib. 2019-cu ildə AzTV 90 min manat mənfəət vergisi ödəyib ki, bu da 2018-ci illə müqayisədə 4,7 dəfə çoxdur. 2020-ci il yanvarın 1-nə Səhmdar Cəmiyyətin aktivləri 27,514 milyon manat olub ki, bu da 1 il əvvələ nisbətən 4% azdır. Hesabat dövrünə qurumun öhdəlikləri 4 dəfə artaraq 2,553 milyon manata çatıb, balans kapitalı isə 11% azalaraq 24,961 milyon manata düşüb. Xatırladaq ki, AzTV kommersiya qurumu kimi Prezident İlham Əliyevin 23 mart 2005-ci il tarixli fərmanı ilə Dövlət Televiziya və Radio Verilişləri Şirkətinin bazasında yaradılıb.

Geniş maddi-texniki bazası olan AzTV-nin bir ili 3 milyon manata yaxın ziyanla başa vurmasının səbəbləri nə ilə bağlı ola bilər?

“Cümhurriyət” qəzeti və “cebhe.info” saytının baş redaktoru Rəfail Becanov “Bakı-Xəbər”ə açıqlamasında bildirdi ki, bu faktla o da tanışdır: “İstənilən fəaliyyət sahəsinin rentabelli olması zəruridir. Dövlət televiziyasının ziyanla işləməsi maraqlı olan məsələdir. Çünki həmin televizyanın həm maddi-texniki bazası yaxşıdır, həm də dövlətin daimi dəstəyi var. Rəhbərlik dəyişəndən sonra orada yeniliklər hiss edilirdi. Verilişlərin formatındakı yeniliklər  tamaşaçıları cəlb edirdi. Maliyyə yoxlamaları zamanı və qurumun özünün açıqladığı nəticələr onu deməyə əsas verir ki, nəyi isə düz etmirlər. Prinsip etibarilə AzTV-nin gəlirləri digər televiziyalardan daha çox olmalıdır. Çünki oranın reklam bazası və yayım auditoriyası daha genişdir. Vəziyyətdən çıxış yolunu televiziya mütəxəssisləri daha yaxşı bilər. Ancaq bir jurnalist kimi medianın gəlir yerləri bizə bəllidir. Televiziya daha çox gəliri yalnız reklam bazarından əldə edə bilər. Bunun üçün də daha sevilən qonaqları televizyaya dəvət etmək lazımdır. Yeni ruhda verilişlər daha çox hazırlanmalıdır. Tamaşaçı cəlbinin çoxluğu əlavə reklam gətirəcək. Təbiidir ki, belə olan təqdirdə AzTV ili ziyanla başa vurmayacaq. Bütün bunlar barədə kanalı idarə edənlər ciddi düşünməlidir”.

Məhəmmədəli QƏRİBLİ

Son xəbərlər